ମସ୍କୋ,୧।୩: ରୁଷିଆ ୟୁକ୍ରେନ୍ ଉପରେ ଆକ୍ରମଣ କରିବା ପରେ ଆମେରିକା, ବ୍ରିଟେନ ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ଏହା ଉପରେ ପ୍ରତିବନ୍ଧକ ବଢ଼ାଇବାରେ ଲାଗିଛନ୍ତି। ରୁଷିଆର କେତେକ ବ୍ୟାଙ୍କକୁ ସ୍ବିଫ୍ଟ ସିଷ୍ଟମରୁ ବାଦ୍ ଦେବାକୁ ଆମେରିକା ସମେତ ପାଶ୍ଚାତ୍ୟ ଦେଶଗୁଡ଼ିକ ନିଷ୍ପତ୍ତି ନେବା ପରେ ସୋମବାର ରୁବଲ୍ ଭୁଶୁଡ଼ି ପଡ଼ିଛି। ରୁଷୀୟମାନେ ସେମାନଙ୍କ ଜମା ଅର୍ଥ ଉଠାଇ ନେବାକୁ ବ୍ୟଗ୍ର ହୋଇପଡ଼ିଛନ୍ତି। ପାଶ୍ଚାତ୍ୟ କଟକଣାରେ ପ୍ରଭାବିତ ହୋଇଥିବା ରୁଷିଆରୁ ରାଷ୍ଟ୍ର ପୁଞ୍ଜିବାଦର ଅନ୍ତ ଘଟାଇବାକୁ ଆହ୍ବାନ ଦିଆଗଲାଣି। ପଶ୍ଚିମ ରାଷ୍ଟ୍ରଗୁଡ଼ିକର ପ୍ରତିବନ୍ଧକ ପରେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ କ୍ଷୁବ୍ଧ ହୋଇଛନ୍ତି। ସେ କେନ୍ଦ୍ରୀୟ ବ୍ୟାଙ୍କ ମୁଖ୍ୟ ଏଲ୍ଭିରା ନବିଉଲ୍ଲିନା ଏବଂ ସର୍ବବୃହତ ଋଣପ୍ରଦାନକାରୀ ସଂସ୍ଥା ସବେରବ୍ୟାଙ୍କର ସିଇଓ ଜର୍ମାନ ଗ୍ରେଫ୍ଙ୍କ ସମେତ ଉଚ୍ଚ ପଦାଧିକାରୀମାନଙ୍କୁ ବୈଠକ ଡାକିଥିଲେ। ଉକ୍ତ ବୈଠକରେ ପୁଟିନ୍ ୟୁରୋପୀୟ ସଂଘକୁ ମିଥ୍ୟାର ସାମ୍ରାଜ୍ୟ ବୋଲି କହିଛନ୍ତି। ମିଛର ସାମ୍ରାଜ୍ୟ ଆମ ଦେଶ ବିରୋଧରେ କଟକଣା ଲଗାଉଛି। ପାଶ୍ଚାତ୍ୟ ସହଯୋଗୀ ଦେଶଗୁଡ଼ିକର କଟକଣା ପରେ ସପ୍ତାହର ପ୍ରଥମ ଦିନରେ ରୁଷିଆର ଅର୍ଥନୀତିରେ ଅଚଳାବସ୍ଥା ଦେଖାଦେଇଛି। ସ୍ବିଫ୍ଟ ବ୍ୟାଙ୍କ ମେସେଜିଂ ସିଷ୍ଟମରୁ ରୁଷିଆର କେତେକ ବ୍ୟାଙ୍କ ବାଦ୍ ପଡ଼ିଥିବାବେଳେ ଏହାର କେନ୍ଦ୍ରୀୟ ବ୍ୟାଙ୍କ ସମ୍ପତ୍ତିକୁ ଅଚଳ କରିଦିଆଯାଇଛି। ପୁଟିନ୍ଙ୍କ ୟୁକ୍ରେନ୍ ଆକ୍ରମଣକୁ ଅରବପତି ମିଖାଇଲ୍ ଫ୍ରିଡମାନ୍ ବିରୋଧ କରିଥିବାବେଳେ ରାଷ୍ଟ୍ର ପୁଞ୍ଜିବାଦ ଅନ୍ତ ଘଟିବା ସମୟ ଆସିଯାଇଛି ବୋଲି ରୁଷିଆର ଅନ୍ୟତମ ଟାଇକୁନ୍ ଓଲେଗ ଡେରିପାସ୍କା କହିଛନ୍ତି। ସେହିପରି ବିଲୟନେୟାର ଓଲେଗ ଟିଙ୍କୋଭ୍ ଯୁଦ୍ଧକୁ ବିରୋଧ କରିବା ସହ ଔଷଧ ଓ ଗବେଷଣାରେ ସରକାର ଅର୍ଥ ବ୍ୟୟ କରିବା ଆବଶ୍ୟକ ବୋଲି କହିଛନ୍ତି।
