ଭଞ୍ଜନଗର,୧୩/୭(ବାବୁଲା ପ୍ରଧାନ)- ପୋଷଣ ଅଭିଯାନ ଅବସରରେ ବର୍ତ୍ତମାନ ଓଜନ ଉତ୍ସବ ରାଜ୍ୟରେ ଚାଲିଛି। ଏହିଭଳି ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡରେ ମଧ୍ୟ ଓଜନ ଉତ୍ସବ ପ୍ରଥମ ପର୍ଯ୍ୟାୟ ଚାଲିଛି। ଏହା ଆସନ୍ତା ୨୫ ତାରିଖ ପର୍ଯ୍ୟନ୍ତ ଚାଲିବ। ଭଞ୍ଜନଗର ଉପଜିଲାପାଳ ଉମା ଶଙ୍କର ବେହେରା ବିଭିନ୍ନ କେନ୍ଦ୍ର ପରିଦର୍ଶନ କରି କାର୍ଯ୍ୟକ୍ରମର ସମୀକ୍ଷା କରିଛନ୍ତି। ଏହି ସମୟରେ ଭଞ୍ଜନଗର ସିଡିପିଓ ମିଲିମା କୁମାରୀ ପଣ୍ତା ସମେତ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ।
ଅପରପକ୍ଷେ ସୁପୋଷିତ ଓଡ଼ିଶା ମିଶନ ହେଉଛି ରାଜ୍ୟ ସରକାରଙ୍କ ଏକ ଗୁରୁତ୍ୱପୂର୍ଣ୍ଣ ପୋଷଣ କାର୍ଯ୍ୟକ୍ରମ। ଏହାର ମୂଳ ଉଦ୍ଦେଶ୍ୟ ହେଉଛି ରାଜ୍ୟର ଶିଶୁମାନଙ୍କ ମଧ୍ୟରେ ଥିବା କୁପୋଷଣକୁ ଦୂର କରିବା ଏବଂ ସେମାନଙ୍କୁ ସୁସ୍ଥ ଓ ଅଳ୍ପ ଓଜନ ସମସ୍ୟା ହ୍ରାସ କରିବା। ଏଥିସହ ସମସ୍ତ ଅଙ୍ଗନବାଡ଼ି କେନ୍ଦ୍ରକୁ ‘ସୁପୋଷିତ ଅଙ୍ଗନବାଡ଼ି’ କେନ୍ଦ୍ରରେ ପରିଣତ କରିବା। ଶିଶୁମାନଙ୍କର ନିୟମିତ ଉଚ୍ଚତା ଓ ଓଜନ ମାପି ସେମାନଙ୍କର ପୋଷଣ ସ୍ଥିତି ନିରୀକ୍ଷଣ କରିବା। ଗର୍ଭବତୀ ଓ ପ୍ରସୂତି ମହିଳାଙ୍କ ପୋଷଣ ଏବଂ ସ୍ବାସ୍ଥ୍ୟର ଉନ୍ନତି କରିବା।
ପ୍ରକାଶ ଯେ ରାଜ୍ୟରେ ଥିବା ୭୨୨୨୩ରୁ ଅଧିକ ଅଙ୍ଗନବାଡ଼ି କେନ୍ଦ୍ରକୁ ପର୍ଯ୍ୟାୟକ୍ରମେ ସୁପୋଷିତ ଅଙ୍ଗନବାଡ଼ିରେ ପରିଣତ କରାଯିବ। ତେଣୁ ସରକାର ଅଙ୍ଗନୱାଡି କର୍ମୀ ମାନଙ୍କ ମାଧ୍ୟମରେ ଶିଶୁ ମାନଙ୍କ ପୋଷଣ ତଥ୍ୟ ସଂଗ୍ରହ କରନ୍ତି। ବର୍ତ୍ତମାନ ପୋଷଣ ଟ୍ରାକର ମାଧ୍ୟମରେ ଶିଶୁମାନଙ୍କ ଡିଜିଟାଲ ଭାବେ ନିରୀକ୍ଷଣ କରାଯିବ। ଏଥିରେ ରାଜ୍ୟର ବିଭିନ୍ନ ମହାବିଦ୍ୟାଳୟର ୧୦୦୦୦ରୁ ଉଦ୍ଧର୍ବ ଜାତୀୟ ସେବା ଯୋଜନା ସ୍ବେଚ୍ଛାସେବିନୀ ( କେବଳ ଛାତ୍ରୀ) ସାମିଲ ହେବେ। ବର୍ତ୍ତମାନ ସ୍ବେଚ୍ଛାସେବୀ ତାଲିକା ସଂଗ୍ରହ ୧୧ ତାରିଖରେ ସରିଛି। ଏହାପରେ ସେମାନଙ୍କୁ ଅନଲାଇନ ମ୍ଯଯଯମରେ ତାଲିମ ଦିଆଯିବ। ଯେଉଁମାନେ ତାଲିମରେ ଉତ୍ତୀର୍ଣ୍ଣ ହେବେ ସେମାନଙ୍କୁ ଡିଜିଟାଲ ନିରୀକ୍ଷଣ କାର୍ଯ୍ୟକ୍ରମରେ ସାମିଲ କରାଯିବ। ରାଜ୍ୟର ୩୦ଟି ଜିଲାରେ ଥିବା ପ୍ରାୟ ୭୨ ହଜାର ୨୨୩ କେନ୍ଦ୍ରରେ ଥିବା ୩୦ ଲକ୍ଷ ଶିଶୁ ଉପରେ ଏହି ନିରୀକ୍ଷଣ ହେବ। ତେଣୁ ଏହା ପୂର୍ବରୁ ଯୋଜନା ସମ୍ପର୍କରେ ବିଶ୍ୱବିଦ୍ୟାଳୟ ଜାତୀୟ ସେବା ସଂଯୋଜକ, ଜିଲା ସଂଯୋଜକ ଏବଂ ଯୋଜନା ଅଧିକାରୀ ମାନଙ୍କୁ ନେଇ ଅନଲାଇନ ମାଧ୍ୟମରେ ସମୀକ୍ଷା ସରିଛି। ଆଗାମୀ ଦିନରେ ଛାତ୍ରୀମାନଙ୍କୁ ତାଲିମ ଦିଆଯିବ। ଏହାପରେ ସେମାନେ ଜୁଲାଇ ୨୦ ତାରିଖରୁ ପୋଷଣ ଟ୍ରାକର ମାଧ୍ୟମରେ ଶିଶୁମାନଙ୍କ ଡିଜିଟାଲ ନିରୀକ୍ଷଣରେ ସାମିଲ ହେବେ। ଏହି ସମୟରେ ଶିଶୁମାନଙ୍କ ପୋଷଣ ସମ୍ବନ୍ଧୀୟ ସଂଗ୍ରହ କାରାଯିବ। ଶିଶୁମାନଙ୍କ ସୁସ୍ଥ ଶାରୀରିକ ଓ ମାନସିକ ବିକାଶକୁ ସୁନିଶ୍ଚିତ କରିବା ସହ
କୁପୋଷଣମୁକ୍ତ ଓଡ଼ିଶା ଗଠନରେ ଏହି ଯୋଜନା ସହାୟକ ହେବ। ଛାତ୍ରୀମାନେ ତଥ୍ୟ ସଂଗ୍ରହ କରି ଡାଟା ଲୋଡ କରିବେ। ଡାଟା ଅପଲୋଡ଼ ସଫଳ ହେଲେ ଛାତ୍ରୀମାନଙ୍କୁ ଦୈନିକ ୫୦୦ ଟଙ୍କା ଲେଖାଏ ସହାୟତା ରାଶି ପାଇବେ। ଏଥିସହ ସେମାନଙ୍କ ଗମନାଗମନ ସୁବିଧା କରାଯିବ। ଯୋଜନା ଅଧିକାରୀ ମାନଙ୍କୁ ମଧ୍ୟ ପ୍ରୋତ୍ସାହନ ରାଶି ମିଳିବ। ଭଞ୍ଜନଗର ବ୍ଲକରେ ଏହି କାର୍ଯ୍ୟ ସଫଳତାର ସହ କିଭଳି ହୋଇପାରିବ ସେନେଇ ଭଞ୍ଜନଗର ବ୍ଲକର ଜାତୀୟ ସେବା ଯୋଜନା ଅଧିକାରୀ ମାନେ ସିଡିପିଓ ମିଲିମା କୁମାରୀ ପଣ୍ଡାଙ୍କ ସହ ସୋମବାର ଆଲୋଚନା କରିଛନ୍ତି।
Dharitri – Odisha’s No.1 Odia Daily
