ଦଶମନ୍ତପୁର/ଡାବୁଗାଁ/ଜୟପୁର, ୧।୩(ଡି.ଏନ୍.ଏ./ନି.ପ୍ର.) – ପ୍ରଥମରୁ ସପ୍ତମ ଶ୍ରେଣୀ ପିଲା ସୋମବାର ସ୍କୁଲ ଯାଇଛନ୍ତି। କୋରାପୁଟ ଜିଲା ଦଶମନ୍ତପୁର ବ୍ଲକ ସଦର ପଞ୍ଚାୟତସ୍ଥିତ ସରକାରୀ ନୋଡାଲ ଉଚ୍ଚ ବିଦ୍ୟାଳୟ ଶିକ୍ଷୟିତ୍ରୀ ଶିକ୍ଷକମାନେ ପିଲାମାନଙ୍କୁ ବନ୍ଦାପନା କରି ଚକୋଲେଟ ଦେଇ ସ୍ବାଗତ କରିଛନ୍ତି। ବିଜ୍ଞାନ ଶିକ୍ଷକ ବଶିଷ୍ଠ ନାୟକ, ପ୍ରଧାନଶିକ୍ଷକ ସ୍ବପ୍ନେଶ୍ୱର ନାୟକ, ଯୁଗଳ କିଶୋର ପଣ୍ଡା, ସଞ୍ଜିତ୍ ବେହେରା, କୃଷ୍ଣ ମହାରଣା, ମଧୁସ୍ମିତା ମାଣ୍ଡାଙ୍ଗି, ଅଜିତ ଖସଲା, ଜୟନ୍ତୀ ଦାଶ, ଲିଲି ବାଘ ପ୍ରମୁଖ ପିଲାମାନଙ୍କୁ ସ୍କୁଲରେ ସ୍ବାଗତ କରିଛନ୍ତି। କୋଭିଡ୍ ନିୟମାନୁସାରେ ପାଠ ପଢ଼ାଯିବ ବୋଲି ଶିକ୍ଷୟିତ୍ରୀ ଶିକ୍ଷକମାନେ କହିଛନ୍ତି। ଏଥିସହ ବିଦ୍ୟାଳୟରେ ଜାତୀୟ ବିଜ୍ଞାନ ଦିବସ ପାଳନ କରାଯାଇଥିବା ଜଣାପଡ଼ିଛି।
ଡାବୁଗାଁ ସରକାରୀ ବାଳିକା ଉଚ୍ଚ ମାଧ୍ୟମିକ ବିଦ୍ୟାଳୟରେ ସ୍ବାଗତ ଉତ୍ସବ ଓ ଜାତୀୟ ବିଜ୍ଞାନ ଦିବସ ସୋମବାର ପାଳିତ ହୋଇଯାଇଛି। ସକାଳ ୧୦ରେ ଷଷ୍ଠ ଓ ସପ୍ତମ ଶ୍ରେଣୀ ଛାତ୍ରୀମାନଙ୍କୁ ବିଦ୍ୟାଳୟକୁ ସ୍ବାଗତ କରାଯାଇଛି। ବିଦ୍ୟାଳୟ ଫାଟକ, ଶ୍ରେଣୀ ଗୃହ ଓ ଛାତ୍ରୀ ନିବାସକୁ ଫୁଲ ଓ ବେଲୁନରେ ସଗାଯିବା ସହ ରାସ୍ତର ବିଭିନ୍ନ ସ୍ଥାନରେ ସୁନ୍ଦର ଝୋଟି ପକା ଯାଇଥିଲା। ଗେଟ୍ ପାଖରେ ଶିକ୍ଷୟିତ୍ରୀ ଶିକ୍ଷକମାନେ ପିଲାଙ୍କ ଟେମ୍ପରେଚର ମାପିବା ସହ ସେମାନଙ୍କୁ ଫୁଲ ଚନ୍ଦନ ଦେଇ ସ୍ବାଗତ କରିଥିଲେ। ସ୍କୁଲ ସଭାଗୃହରେ ବିଦ୍ୟାଳୟ ପ୍ରଧାନଶିକ୍ଷକ ସୁକାନ୍ତ ସ୍ବାଇଁଙ୍କ ସଭାପତିତ୍ୱରେ ଏକ ସ୍ବାଗତ ସଭା କରାଯାଇଥିଲା। ଏହି ସଭାରେ ଡାବୁଗାଁ ବିଡିଓ ଶରତ ମାଝି ଉପସ୍ଥିତ ରହି ପିଲାଙ୍କୁ ପାଠ୍ୟ ଉପକରର ପ୍ରଦାନ କରିଥିଲେ। ଶିକ୍ଷକ ସନାତନ ଭୋଇ, ସୁକାନ୍ତ ସରକାର ଓ ମହେଶ୍ୱର ନାଥ ପ୍ରମୁଖ ବିଜ୍ଞାନ ଦିବସ ସମ୍ବନ୍ଧରେ ଛାତ୍ରୀମାନଙ୍କୁ ବୁଝାଇଥିଲେ। ଚାନ୍ଦିନୀ ପନକା ଓ ଅମିତା ଭତ୍ରା ବିଜ୍ଞାନ ଦିବସ ସମ୍ବନ୍ଧରେ ବକ୍ତବ୍ୟ ପ୍ରଦାନ କରିଥିଲେ। ଶିକ୍ଷକ ଦୀପ୍ତିରଞ୍ଜନ ବେହେରା ଓ ବରିଷ୍ଠ ଶିକ୍ଷୟତ୍ରୀ ଆରତି ବିଶୋୟୀ କାର୍ଯ୍ୟକ୍ରମ ପରିଚାଳନା କରିଥିଲେ। ଜୟପୁରର ସମସ୍ତ ପ୍ରାଥମିକ, ଉଚ୍ଚ ପ୍ରାଥମିକ ଓ ହାଇସ୍କୁଲ ଖୋଲାଯାଇଛି। ମୁଖ୍ୟ ଫାଟକରେ ପିଲାଙ୍କୁ କୋଭିଡ୍ ନିୟମାନୁଯାୟୀ ସମସ୍ତ ପରୀକ୍ଷା ନିରୀକ୍ଷା କରି ବିଦ୍ୟାଳୟକୁ ଆସିବା ପାଈଁ ଅନୁମତି ଦିଆଯାଇଛି। ଶିକ୍ଷୟତ୍ରୀ ଶିକ୍ଷକମାନେ ପିଲାଙ୍କୁ ଚିତା ଚନ୍ଦନ ଓ ଫୁଲ ଦେଇଥିଲେ। । ବିଦ୍ୟାଳୟର ସିନିୟର ଛାତ୍ରୀଛାତ୍ର ପାରମ୍ପରିକ ବାଦ୍ୟ ବଜାଇ ସେମାନଙ୍କୁ ସ୍ବାଗତ କରିଛନ୍ତି ।
