ନୂଆଦିଲ୍ଲୀ,୨୯।୫: ବିରୋଧୀ ଦଳର କେଉଁ ନେତାଙ୍କୁ ଆପଣ ବହୁତ ପସନ୍ଦ କରନ୍ତି? ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଏ ସମ୍ପର୍କରେ ଖୁଲାସା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଯେତେବେଳେ ପ୍ରଧାନମନ୍ତ୍ରୀ ମୋଦିଙ୍କୁ ପଚରାଯାଇଥିଲା କି, ବିରୋଧୀ ଦଳର କେଉଁ ନେତାଙ୍କୁ ସେ ସବୁଠୁ ଅଧିକ ପସନ୍ଦ କରନ୍ତି? ଏହି ପ୍ରଶ୍ନର ଉତ୍ତରରେ ପିଏମ କହିଛନ୍ତି, ‘ଯଦି ମୁଁ ନାଁ କହିବି ତେବେ ଏହା ଭଲ ଦେଖାଯିବ ନାହିଁ। କିନ୍ତୁ ଆପଣଙ୍କୁ କହିବାକୁ ଚାହେଁ, ଯଦିଓ ଓକିଲମାନଙ୍କୁ କୋର୍ଟ ଭିତରେ ବାକ୍ଯୁଦ୍ଧ କରୁଥିବାର ଦେଖିଥିବେ, କିନ୍ତୁ ସେମାନଙ୍କର ମଧ୍ୟରେ ସମ୍ପର୍କ ବହୁତ ନିବିଡ’। ଓକିଲଙ୍କ ଉଦାହରଣ ଦେଇ ମୋଦି କହିବାକୁ ଚାହିଁଛନ୍ତି ଯେ, ଯଦିଓ ମଇଦାନରେ ବିରୋଧୀଙ୍କ ସହ କଡ଼ା ଟକ୍କର ହୁଏ କିନ୍ତୁ ବ୍ୟକ୍ତିଗତ ଭାବେ ଆମେ ପରସ୍ପର କଥା ବୁଝିବା ସହ ଭଲମନ୍ଦ ବୁଝିଥାଉ।
ପ୍ରଧାନମନ୍ତ୍ରୀ ମୋଦି ଆହୁରି କହିଛନ୍ତି, ‘ରାଜନୈତିକ କ୍ଷେତ୍ରରେ ଅନେକ ଘଟଣା ଘଟିବା ପରେ ମଧ୍ୟ ଆମ ମଧ୍ୟରେ ନିଜରପଣ ରହିଛି’। ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ କଂଗ୍ରେସରେ ଥିଲୋ। ମୋର ମନେ ଅଛି, ‘୨୦୧୯ ନିର୍ବାଚନ ସମୟରେ ମୁଁ ତାଙ୍କୁ ୩-୪ ଥର କଲ କରିଛି। ଫୋନରେ କଥା ହେବା ସମୟରେ ପ୍ରଣବଜୀ କହୁଥିଲେ, ଏତେ ପରିଶ୍ରମ କରୁଛ, ତୁମ ସ୍ବାସ୍ଥ୍ୟର ଯତ୍ନ କିଏ ନେବ?
ସେ ଜଣେ କଂଗ୍ରେସ କର୍ମୀ, ଆଉ ଭାଜପାର। କଂଗ୍ରେସକୁ ପରାଜିତ କରିବା ପାଇଁ ମୁଁ ରଣନୀତି ପ୍ରସ୍ତୁତ କରୁଥିଲି। ତଥାପି ସେ ମୋତେ ଫୋନ କରି କଥା ହେଉଥିଲେ। ମୁଁ ମଧ୍ୟ ତାଙ୍କୁ ବହୁତ ସମ୍ମାନ କରେ ବୋଲି ମୋଦି କହିଛନ୍ତି।
ସେହିପରି ସାକ୍ଷାତକାରରେ କଂଗ୍ରେସ ନେତା ରାହୁଲ ଗାନ୍ଧୀ ଓ ସୋନିଆ ଗାନ୍ଧୀଙ୍କ ସମ୍ପର୍କରେ ଉଲ୍ଲେଖ କରି ସେ କହିଛନ୍ତି, ‘ନିର୍ବାଚନ ସମୟରେ ଥରେ ମହାରାଷ୍ଟ୍ରରେ ରାହୁଲ ଗାନ୍ଧୀଙ୍କ ହେଲିକପ୍ଟରରେ ତ୍ରୁଟି ଦେଖାଦେଇଥିଲା। େଯେତେବେଳେ ମୁଁ ଜାଣିବାକୁ ପାଇଲି ମୁଁ ତୁରନ୍ତ ତୁରନ୍ତ ଫୋନ କରି ତାଙ୍କ ଭଲମନ୍ଦ ସମ୍ପର୍କରେ ବୁଝିଥିଲି। ଆଉଥରେ ସୋନିଆ ଗାନ୍ଧୀ କାଶୀରେ ମୋ ବିପକ୍ଷରେ ରୋଡ ଶୋ’ କରୁଥିଲେ। ଏହି ସମୟରେ ତାଙ୍କ ସ୍ବାସ୍ଥ୍ୟ ହଠାତ ଖରାପ ହୋଇଗଲା। ଯେତେବେଳେ ମୁଁ ଏ ବିଷୟରେ ସୂଚନା ପାଇଲି, ସଙ୍ଗେ ସଙ୍ଗେ ଏକ ସ୍ବତନ୍ତ୍ର ବିମାନ ପଠାଇ ଦିଲ୍ଲୀ ମେଡିକାଲରେ ତାଙ୍କର ବ୍ୟବସ୍ଥା କଲି’ ବୋଲି ମୋଦି କହିଛନ୍ତି।
