ଜୟପୁର,୨।୨: ଆଜିକାଲି ରାଜସ୍ଥାନର ଜୟପୁରରେ ରାଷ୍ଟ୍ରୀୟ ସ୍ବୟଂ ସେବକ ସଂଗଠନର (ଆରଏସ୍ଏସ୍) କାର୍ଯ୍ୟକ୍ରମ ଚାଲିଛି। ସଂଗଠନର ଅନେକ ଅଧିକାରୀ ମଧ୍ୟ ଏହି କାର୍ଯ୍ୟକ୍ରମରେ ଭାଗ ନେବାକୁ ପହଞ୍ଚିଛନ୍ତି। ଏହି କାର୍ଯ୍ୟକ୍ରମରେ ଆରଏସ୍ଏସ୍ ସାଧାରଣ ସମ୍ପାଦକ ଦତ୍ତାତ୍ରେୟ ହୋସବାଲେ କହିଛନ୍ତି, ଯେଉଁମାନେ ବାଧ୍ୟତାମୂଳକ ଭାବେ ଭାରତରେ ଗୋମାଂସ ଖାଉଛନ୍ତି ସେମାନେ ମଧ୍ୟ ଘରକୁ ଫେରିପାରିବେ, କାରଣ ଭାରତରେ ରହୁଥିବା ପ୍ରତ୍ୟେକ ବ୍ୟକ୍ତି ଜନ୍ମରୁ ହିନ୍ଦୁ ଅଟନ୍ତି।
ହୋସବାଲେ କହିଛନ୍ତି, ଦେଶରେ କିଛି ଲୋକ ଏମିତି ଅଛନ୍ତି, ଯେଉଁମାନେ ବାଧ୍ୟତାଭୂଳକ ଭାବେ ଗୋମାଂସ ଖାଇଥିବେ। କିନ୍ତୁ ସେମାନଙ୍କ ପାଇଁ ଆମେ କବାଟ ବନ୍ଦ କରିପାରିବୁ ନାହିଁ। ସେମାନଙ୍କୁ ହିନ୍ଦୁ ଧର୍ମକୁ ଫେରାଇ ଆଣିପାରିବୁ। ଭାରତରେ ବାସ କରୁଥିବା ସମସ୍ତ ନାଗରିକ ହିନ୍ଦୁ ଅଟନ୍ତି, କାରଣ ସେମାନଙ୍କର ପୂର୍ବପୁରୁଷମାନେ ହିନ୍ଦୁ ଥିଲେ। ସେମାନଙ୍କର ପୂଜା ପଦ୍ଧତି ଭିନ୍ନ ହୋଇପାରେ, କିନ୍ତୁ ସମସ୍ତଙ୍କର ସମାନ ଡିଏନଏ ଅଛି। ଦେଶରେ ଗଣତନ୍ତ୍ର ପ୍ରତିଷ୍ଠା ପାଇଁ ଆରଏସଏସ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି।
ଏହି କାର୍ଯ୍ୟକ୍ରମରେ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ, ଭାରତୀୟ ଜନତା ପାର୍ଟିର ପୂର୍ବତନ ରାଜ୍ୟ ସଭାପତି ଡା. ମହେଶ ଚନ୍ଦ୍ର ଶର୍ମା, ଅଶୋକ ପରନାମୀ ଏବଂ ବିରୋଧୀ ଦଳର ନେତା ଗୁଲାବଚନ୍ଦ କାଟରିଆ ମଧ୍ୟ ଉପସ୍ଥିତ ଥିଲେ।
