ଟିଟିଲାଗଡ,୨ା୨(ଡି.ଏନ.ଏ.): ବଲାଙ୍ଗୀର ଜିଲା ଟିଟିଲାଗଡ଼ ବ୍ଳକ ଅନ୍ତର୍ଗତ ବିଜେପୁର ମଣ୍ଡିରେ ଧାନକିଣା ଟାର୍ଗେଟ ସରିଯାଇଛି। ଏହିଭଳି କୁହାଯାଇ ଚାଷୀଙ୍କ ଧାନ କିଣାଯାଉନାହିଁ। ଏହାର ପ୍ରତିବାଦ କରି ଚାଷୀମାନେ ବୁଧବାର ଟିଟିଲାଗଡ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ। ସେମାନେ ଅଭିଯୋଗ କରିଥିଲେ ଯେ, ମାସେ ପୂର୍ବରୁ ପ୍ରଶାସନ ଧାନବିକ୍ରି କରିବାକୁ ଟୋକନ ଜାରି କରିଥିଲା। ବୁଧବାର ଟୋକନ ଅବଧି ସରିଲା। ହେଲେ ଏବେ ବି ମଣ୍ଡିରେ ପ୍ରାୟ ୧୦ହଜାର କୁଇଣ୍ଟାଲ ଧାନ ବିକ୍ରି ହେବାକୁ ପଡି ରହିଛି। ଚାଷୀ ଟୋକନ ଧରି ବସିଛନ୍ତି l ଯଦି ଚାଷୀଙ୍କ ଧାନ ବିକ୍ରି ନହେବ ତେବେ ସେମାନେ କାହାକୁ ବିକିବେ ବୋଲି ଧାରଣାରେ ବସିଥିବା ବିଜେପୁର ସରପଞ୍ଚ ହୃଷିକେଶ ବାଗ ଓ ଅନ୍ୟ ଚାଷୀ କହିଛନ୍ତି। ପୂର୍ବରୁ ମଧ୍ୟ ଟୋକନ ପାଇଥିବା ଚାଷୀଙ୍କ ଟୋକନ ଲାପ୍ସ ଭୟ ଦେଖାଇ ୧୦ ରୁ ୧୫କେଜି କଟନି ଛଟନି କରାଯାଉଥିବା ଅଭିଯୋଗ ହୋଇଛି। ପ୍ରଶାସନ ପକ୍ଷରୁ ସହାୟକ ଜିଲାପାଳ ଚନ୍ଦ୍ର ଦେହୁରୀ ଚାଷୀଙ୍କ ସହ ଆଲୋଚନା କରିଥିଲେ। ପରେ ଟିଟିଲାଗଡ଼ ଉପଖଣ୍ଡ ଯୋଗାଣ ଅଧିକାରୀ ଶଙ୍କର୍ଷଣ ଭୋଇ, ଯୋଗାଣ ନିରୀକ୍ଷକ ପଦ୍ମଲୋଚନ ମାଝୀ ଧାରଣାସ୍ଥଳକୁ ଯାଇ ଚାଷୀଙ୍କୁ ବୁଝାଶୁଝା କରିଥିଲେ। ପରେ ଧାରଣାରତ ଚାଷୀଙ୍କ ସହ ତହସିଲଦାର ପ୍ରେମଲାଲ ହିଆଲ ଏବଂ ଯୋଗାଣ ବିଭାଗ ଅଧିକାରୀ ମଣ୍ଡିକୁ ଯାଇ ଗଚ୍ଛିତ ଧାନର ସ୍ଥିତି ନିରୀକ୍ଷଣ କରିଥିଲେ। ଟୋକନ ପାଇଥିବା ସମସ୍ତ ଚାଷୀଙ୍କ ଧାନ ପ୍ରଶାସନ କିଣିବ ବୋଲି ଅଧିକାରୀ ପ୍ରତିଶ୍ରୁତି ଦେବା ପରେ ଚାଷୀମାନେ ଧାରଣାରୁ ଓହରି ଥିଲେ। ଦେଇଥିବା ଜଣାଯାଇଛି।
