ଜାତିସଂଘ, ୨୪ା୩:ତାପମାତ୍ରା ବୃଦ୍ଧି, ଜଳବାୟୁ ପରିବର୍ତ୍ତନ ଦ୍ୱାରା ସାରା ବିଶ୍ୱ ଏବେ ପ୍ରଭାବିତ। ଆଗାମୀ ଦିନରେ ଏହା ସମଗ୍ର ଜୀବଜଗତ ପାଇଁ ବଡ଼ ବିପଦ ସୃଷ୍ଟି କରିବା ନେଇ ଆଶଙ୍କା ଉପୁଜିଛି। ଜଳବାୟୁ ପରିବର୍ତ୍ତନ ଫଳରେ ହିମବାହ ବା ବିଶାଳ ବରଫ ଖଣ୍ଡ ତରଳିବାରେ ଲାଗିଛି। ସେହିପରି ତାପମାତ୍ରା ବୃଦ୍ଧି କାରଣରୁ ହିମାଳୟ ଗିରିଶୃଙ୍ଗର ହିମବାହର ଆୟତନ କମିଛି, ଯାହାଫଳରେ ଆଗାମୀ ଦିନରେ ଏଥିରୁ ବାହାରିଥିବା ସିନ୍ଧୁ, ଗଙ୍ଗା ଏବଂ ବ୍ରହ୍ମପୁତ୍ର ନଦୀର ଜଳସ୍ରୋତ ହ୍ରାସ ପାଇବାକୁ ଥିବା ଜାତିସଂଘ (ୟୁଏନ୍) ମହାସଚିବ ଆଣ୍ଟୋନିଓ ଗୁଟେରସ୍ ଚେତାବନୀ ଦେଇଛନ୍ତ।
ବୁଧବାର ଇଣ୍ଟରନ୍ୟାଶନାଲ ଇୟର ଅଫ୍ ଗ୍ଲାସିଅର ଇଭେଣ୍ଟରେ ଯୋଗ ଦେଇ ଗୁଟେରସ କହିଛନ୍ତି, ବିଶ୍ୱର ୧୦% ଭାଗରେ ରହିଥିବା ହିମବାହ ସାରା ବିଶ୍ୱ ପାଇଁ ଓ୍ବାଟର ଟାଓ୍ବାର। ମନୁଷ୍ୟ କୃତ କିଛି କାରଣ ପାଇଁ ବାୟୁମଣ୍ଡଳ ତାପମାତ୍ରା ବୃଦ୍ଧି ପାଉଛି, ଫଳରେ ହିମବାହ ତରଳିବାରେ ଲାଗିଛି। ଅନ୍ୟପକ୍ଷେ ଜଳବାୟୁ ପରିବର୍ତ୍ତନ ପାଇଁ ମନୁଷ୍ୟକୁ ୟୁଏନ୍ ମହାସଚିବ ଗିଟେରସ୍ ଦାୟୀ କରିଛନ୍ତି। ପ୍ରତିବର୍ଷ ଆଣ୍ଟାର୍କଟିକାର ୧୫୦ ବିଲିୟନ୍ ଟନ୍ ହିମବାହ ତରଳୁଥିବାବେଳେ ଗ୍ରୀନ୍ଲାଣ୍ଡର ଆଇସ୍ କ୍ୟାପ୍ ଆୟତନ ବର୍ଷକୁ ୨୭୦ ବିଲିୟନ୍ ଟନ୍ ହ୍ରାସପାଇବାରେ ଲାଗିଛି।
ଏସିଆ ମହାଦେଶର ପ୍ରମୁଖ ୧୦ ନଦୀ ହିମାଳୟରୁ ବାହାରିଛି। ଏହି ନଦୀଜଳ ଉପରେ ବିଶ୍ୱର ୧.୩ ବିଲିୟନ୍ (୧୩୦ କୋଟି) ଲୋକ ନିର୍ଭରଶୀଳ। ଆଗାମୀ ୧୦ ବର୍ଷରେ ହିମାଳୟ ଗିରିଶୃଙ୍ଗର ହିମବାହ ତରଳିବା ନେଇ ଆଶଙ୍କା ଉପୁଜିଛି। ଫଳରେ ସିନ୍ଧୁ, ଗଙ୍ଗା ଏବଂ ବ୍ରହ୍ମପୁତ୍ର ନଦୀର ଜଳସ୍ରୋତ କ୍ରମାଗତ କମିବା ଆରମ୍ଭ କରିବ ବୋଲି ଜାତିସଂଘ ପକ୍ଷରୁ ଚେତାବନୀ ଦିଆଯାଇଛି। ଗତବର୍ଷ ହିମାଳୟ ହିମବାହ ତରଳିବା ଯୋଗୁ ପାକିସ୍ତାନରେ ପ୍ରଳୟଙ୍କରୀ ବନ୍ୟା ସୃଷ୍ଟି ହୋଇଥିଲା, ଯେଉଁଥିରେ ଅନେକ ଲୋକ ପ୍ରାଣ ହରାଇଥିଲେ।
ଜଳଚକ୍ରକୁ ଭାଙ୍ଗିବା, ଜୈବବିବିଧତା ନଷ୍ଟ କରିବା ଏବଂ ଭୂତଳ ଜଳକୁ ପ୍ରଦୂଷିତ କରିବା ପଛରେ ମନୁଷ୍ୟ ଦାୟୀ। ଅନ୍ୟପକ୍ଷେ ୧୯୦୦ ପରଠାରୁ ସମୁଦ୍ର ପତ୍ତନ କ୍ରମାଗତ ବଢ଼ିବାରେ ଲାଗିଛି। ଜଳବାୟୁ ପରିବର୍ତ୍ତନ ଓ ତାମପାତ୍ର ବୃଦ୍ଧି ବିରୋଧରେ ସାରା ବିଶ୍ୱ ଏକାଠି ହୋଇ କାର୍ଯ୍ୟ କରିବାର ଆବଶ୍ୟକତା ରହିଛି। ସମୟ ପୂର୍ବରୁ ଏହାର ସମାଧାନ ନ କଲେ ସବୁଦେଶ ଉଭେଇଯିବ ବୋଲି ଗୁଟେରସ୍ କହିଛନ୍ତି।
