ଦିଗପହଣ୍ଡି,୭ା୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଏନ୍ଏସି ୧୦ ନଂ. ୱାର୍ଡ ବସଷ୍ଟାଣ୍ଡ ଅଞ୍ଚଳର ଉତ୍ତର ଓ ଦକ୍ଷିଣ ସାହିରେ ଘରକରି ରହୁଥିବା ବାସିନ୍ଦା ଓ ଦୋକାନ କରି ବ୍ୟବସାୟ କରୁଥିବା ଲୋକେ ଦୀର୍ଘ ୪ ଦିନ ହେଲା ଜଳବନ୍ଦୀ ଅବସ୍ଥାରେ ରହୁଛନ୍ତି। ସାମାନ୍ୟ ବର୍ଷା ହେଲେ ବର୍ଷାଜଳ ଓ ରାସ୍ତାକଡ ନର୍ଦ୍ଦମା ପାଣି ଘର ଓ ଦୋକାନରେ ପଶୁଛି।
ମୁଖ୍ୟରାସ୍ତାର ଉଭୟ କଡ଼ରେ ଜମି ରହୁଥିବା ବର୍ଷାପାଣି, ନାଳ ନର୍ଦ୍ଦମାର ଦୂଷିତ ଜଳର ସ୍ଥାୟୀ ନିଷ୍କାସନ ଦାବିରେ ଗୁରୁବାର ବହୁସଂଖ୍ୟକ ବାସିନ୍ଦା ତହସିଲଦାର ସନ୍ତୋଷ ସାହୁଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଶୁକ୍ରବାର ସୁଦ୍ଧା ପ୍ରଶାସନ ପକ୍ଷରୁ ସମସ୍ୟାର ସ୍ଥାୟୀ ସମାଧାନ କରା ନ ଗଲେ ବସଷ୍ଟାଣ୍ଡ ନିକଟରେ ରାସ୍ତାରୋକୋ କରାଯିବ ବୋଲି ଅଞ୍ଚଳବାସି ଚେତାବନୀ ଦେଇଛନ୍ତି ।
ଦିଗପହଣ୍ଡି ସହର ଗଞ୍ଜାମ ଜିଲାର ଏକ ପ୍ରମୁଖ ବାଣିଜ୍ୟ ପେଣ୍ଠସ୍ଥଳୀ। ଦୈନିକ ଏଠାକୁ ଆଖପାଖ ଅଞ୍ଚଳରୁ ବହୁ ସଂଖ୍ୟାରେ ଲୋକେ ବ୍ୟବସାୟ ଏବଂ ବିଭିନ୍ନ ସାମଗ୍ରୀ କ୍ରୟ ପାଇଁ ଆସିଥାନ୍ତି। ସାମାନ୍ୟ ବର୍ଷା ହେଲେ ୧୭ ନଂ. ରାଜ୍ୟ ରାଜପଥ ଅଧୀନ ଉକ୍ତ ରାସ୍ତାରେ କୁତ୍ରିମ ବନ୍ୟା ସୃଷ୍ଟି ହେଉଛି। ନାଳ ନର୍ଦ୍ଦମାର ଦୂଷିତ ପାଣି ରାସ୍ତା ଉପରେ ପ୍ରବାହିତ ହେଉଛି। ବର୍ଷା ଜଳ ଓ ନାଳ ନର୍ଦ୍ଦମାର ପାଣି ଡ୍ରେନ ଯୋଗେ ନିଷ୍କାସନ ନ ହେବାରୁ ବସଷ୍ଟାଣ୍ଡର ଉଭୟ ପାଶର୍ବରେ ୩ ଫୁଟର ପାଣି ଜମି ରହୁଛି। ଫଳରେ ସ୍ଥାନୀୟ ଲୋକେ ଓ ଅନ୍ୟମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ପୂର୍ୱରୁ ସ୍ଥାନୀୟ ବାସିନ୍ଦା ପୂର୍ତ୍ତ ବିଭାଗ ଅଧିକାରୀଙ୍କୁ ଭେଟି ସମସ୍ୟାର ସମାଧାନ ଲାଗି ଅନୁରୋଧ କରିଥିଲେ। ମାତ୍ର ଏଯାଏ କୌଣସି ସୁଫଳ ମିଳିନାହିଁ।
ଅନ୍ୟପକ୍ଷରେ ଦାବିପତ୍ର ଦେବା ପରେ ଗୁରୁବାର ଅପରାହ୍ନରେ ତହସିଲଦାରଙ୍କ ସମେତ ପୂର୍ତ୍ତ ବିଭାଗ କନିଷ୍ଠ ଯନ୍ତ୍ରୀ ଇଂ. ମନୋଜ ମହାରଣା, ଏନଏସି ନିର୍ୱାହୀ ଅଧିକାରୀ ଅବିନାଶ ମିଶ୍ର , ନଗରପାଳ ପ୍ରଫୁଲ୍ଲ ପଣ୍ଡା, କାଉନସିଲର ଦୀପକ ମିଶ୍ର, ରାଜସ୍ୱ ନିରୀକ୍ଷକ ଉପେନ୍ଦ୍ର ବେହେରା ପ୍ରଭାବିତ ଅଞ୍ଚଳରେ ପହଞ୍ଚି ଲୋକଙ୍କ ସହ ଆଲୋଚନା କରିଛନ୍ତି। ବର୍ଷାପାଣି, ନାଳ ନର୍ଦ୍ଦମା ଜଳ କିଭଳି ନିଷ୍କାସିତ ହୋଇପାରିବ ସେ ନେଇ ଗୁରୁତ୍ୱାରୋପ କରି ପ୍ରତିଶ୍ରୁତି ଦେଇ ଫେରିଥିବା ଜଣାପଡ଼ିଛି।
