ଭଞ୍ଜନଗର, ୨୩ା୩(ଡି.ଏନ୍.ଏ): ବିଶ୍ୱ ଜଳ ଦିବସ ବୁଧବାର ପାଳିତ ହୋଇଛି। ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ ହେଲା ଜଳର ଅପଚୟକୁ ରୋକିବା ଏବଂ ବିଶୁଦ୍ଧ ପାଣି ବ୍ୟବହାର କରିବା। କିନ୍ତୁ ଭଞ୍ଜନଗର ସହରରେ ଏହାର ଓଲଟା ଚିତ୍ର ଦେଖିବାକୁ ମିଳିଛି। ସହରରେ ପାନୀୟଜଳ ବଣ୍ଟନ ବ୍ୟବସ୍ଥା ବିଗତ କିଛି ମାସ ହେବ ବିପର୍ଯ୍ୟସ୍ତ ହୋଇପଡିଛି। କେଉଁଠି ପାଣି ପାଇପ୍ ଫାଟି ରାସ୍ତା ଉପରେ ଭାସୁଛି ତ ଆଉ କେଉଁଠି ଫଟା ପାଇପ ଦେଇ ଡ୍ରେନର ମଇଳା ପାଣି ସହରକୁ ଆସୁଥିଛି। ଏନେଇ ଖୋଦ ଜନସ୍ବାସ୍ଥ୍ୟ ବିଭାଗ ଯନ୍ତ୍ରୀ ଏବଂ ଅନ୍ୟ କର୍ମଚାରୀଙ୍କୁ ମଧ୍ୟ ଜଣାନାହିଁ। ଏ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଭେଜିପୁଟ ମହାନ୍ତି ସାହି ଛକରେ ବିଗତ ୨ ମାସ ହେବ ପାଇପ ଫାଟି ରାସ୍ତାରେ ପାଣି ଭାସୁଥିଲା। ଏନେଇ ଧରିତ୍ରୀରେ ଏକ ଖବର ପ୍ରକାଶିତ ପରେ ତାହାର ମରାମତି କରାଯାଇଛି। ଏହିଭଳି ଭଞ୍ଜନଗର ମେଡିକାଲ ସମ୍ମୁଖ ଗଳିରେ ଆଜକୁ ପ୍ରାୟ ୪୦ ଦିନ ହେବ ପାଇପ ଫାଟି ରାସ୍ତା ଉପରେ ପାଣି ଭାସୁଛି। ସାହି ବାସିନ୍ଦା ଏନେଇ ବିଭାଗୀୟ ଯନ୍ତ୍ରୀଙ୍କୁ ବାରମ୍ବାର ଘଟଣା ସମ୍ପର୍କରେ ଅବଗତ କରାଇଥିଲେ ମଧ୍ୟ ଫଟା ପାଇପ ମରାମତି ହେଉନାହିଁ। ଉକ୍ତ ପାଇପ କାମ ଠିକାଦାର ପ୍ରାୟ ୨ ମାସ ପୂର୍ବେ କରିଥିଲେ। ଏହାପରେ ମାଟି ପୋତିବା କଥା ତାହା କରାଯାଇନାହିଁ। ତେଣୁ ପାଇପ ଫାଟି ପାଣି ଏଣେତେଣେ ଭାସୁଛି। ଏହାଦ୍ବାରା ସମ୍ପୃକ୍ତ ଅଞ୍ଚଳର ଘରକୁ ପାଣି ଠିକ ଭାବେ ଆସୁନାହିଁ। ଏଥିସହ ମାସ ମାସ ଧରି ପାଣି ଏକ ଖାତରେ ରହିବା ଦ୍ୱାରା ଡେଙ୍ଗୁ ହେବାର ସମ୍ଭାବନା ରହିଛି।
ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ନିତ୍ୟାନନ୍ଦ ବେହେରାଙ୍କ ସହ ଯୋଗାଯୋଗ କରିବାରୁ ମାଲସାହିି ଅଞ୍ଚଳରେ କେଉଁଠି ପାଇପ ଫାଟି ଥିବା ଖବରକୁ ସେ ଖଣ୍ଡନ କରିଛନ୍ତି। ଏଥିସହ କେଉଁଠି ପାଇପ ପାଇଁ ମାଟି ଖୋଳା ହୋଇନାହିଁ ବୋଲି କହିଛନ୍ତି। ବିଭାଗୀୟ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟିଦେଇ ତୁରନ୍ତ ଆବଶ୍ୟକ ପଦକ୍ଷେପ ନେବା ପାଇଁ ସାଧାରଣରେ ଦାବି ହୋଇଛି।
