ଯୋଡ଼ା,୧୫ା୧୦(ଡି.ଏନ.ଏ): କେନ୍ଦୁଝର ଜିଲା ଯୋଡ଼ା ଖଣି କ୍ଷେତ୍ରରେ ମାଓବାଦୀ ପୋଷ୍ଟର ଦେଖିବାକୁ ମିଳିଛି। ପୋଷ୍ଟର ମାଧ୍ୟମରେ ସରକାରଙ୍କ ନିୟମକାନୁନ ନ ମାନିବା ପାଇଁ ଖୋଲାଖୋଲି ଆହ୍ବାନ ଦିଆଯାଇଛି। ଏହି ପୋଷ୍ଟର ମିଳିବା ପରେ ଅଞ୍ଚଳରେ ମାଓବାଦୀ ପୁଣି ସେମାନଙ୍କର ଉପସ୍ଥିତି ଜାହିର କରିଥିବା ବେଳେ ଖଣି ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି।
ଅନୁଯାୟୀ, ଶୁକ୍ରବାର ସକାଳେ ଯୋଡ଼ା ଥାନା ଅଧୀନ ତଥା ସହର ଉପକଣ୍ଠ ରଣାଶାଳ ଘାଟିରେ ମାଓବାଦୀ ପୋଷ୍ଟର ଦେଖିବାକୁ ମିଳିଥିଲା। ପୋଷ୍ଟରରେ ଭାରତ ପବ୍ଲିକ୍ କମ୍ୟୁନିଷ୍ଟ ପାର୍ଟି (ମାର୍କସବାଦୀ) ଲେଖା ହୋଇଛି। ସଂଗଠନର ନିଜସ୍ବ ଆଇନ ରହିଛି ଓ ନିଜସ୍ବ ଢଙ୍ଗରେ ଏହା କାମ କରିଥାଏ। ସରକାରଙ୍କ କୌଣସି ନିୟମକୁ ସେମାନେ ମାନନ୍ତି ନାହିଁ। ସରକାରଙ୍କ ସହିତ ସେମାନଙ୍କର କୌଣସି ସମ୍ପର୍କ ନାହିଁ ବୋଲି ପୋଷ୍ଟରରେ ଉଲ୍ଲେଖ କରାଯାଇଛି। ଶେଷରେ ଲାଲ ସଲାମ ବୋଲି ଧଳା କପଡ଼ାରେ ନାଲି ଅକ୍ଷରରେ ଲେଖାଯାଇଛି। ସରକାରଙ୍କ କୌଣସିି ନିୟମ ନ ମାନିବାକୁ ମଧ୍ୟ ପୋଷ୍ଟରରେ ଚେତାବନୀ ଦିଆଯାଇଛି। ଏ ନେଇ ବଡ଼ବିଲ୍ ଏସ୍ଡିପିଓ ସନ୍ତୋଷ ବାରିକ୍ କୁହନ୍ତି, ଏହା କାହା ଦ୍ୱାରା ଏକ ବାଚଳାମି। ତଥାପି ସବୁ ଦିଗକୁ ଦୃଷ୍ଟି ଦେବାକୁ ସେ ଯୋଡ଼ା ଥାନାଧିକାରୀଙ୍କୁ କହିଛନ୍ତି। ଏଥିସହ ପାଖରେ ଥିବା ସିସିଟିଭି ଫୁଟେଜ୍ ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିବା ଏସ୍ଡିପିଓ କହିଛନ୍ତି।
