ଆଶଙ୍କା ଭିତରେ ଭଲ ଫଳକୁ ଅପେକ୍ଷା

ଭୁବନେଶ୍ୱର,୧୭।୬: ଦେଶରେ କୋଭିଡ୍‌ ସଂକ୍ରମଣ ଯୋଗୁ ଶିକ୍ଷା ବ୍ୟବସ୍ଥା ବେଶ୍‌ ପ୍ରଭାବିତ ହୋଇଛି। ୨୦୧୯-୨୧ ଶିକ୍ଷାବର୍ଷର କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ(ସିବିଏସ୍‌ଇ) ଦ୍ୱାଦଶ ଛାତ୍ରୀଛାତ୍ରମାନେ ପାଠପଢ଼ାଠାରୁ ଆରମ୍ଭ କରି ପରୀକ୍ଷାଫଳକୁ ନେଇ ଏବେବି ଚିନ୍ତିତ ରହିଛନ୍ତି। ଏଭଳି ସ୍ଥିତିରେ ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ଗୁରୁବାର ଛାତ୍ରୀଛାତ୍ରଙ୍କ ପରୀକ୍ଷାଫଳର ମୂଲ୍ୟାୟନ କିପରି ରହିବ ସେନେଇ ସିବିଏସ୍‌ଇ ପକ୍ଷରୁ ସତ୍ୟପାଠ ଦାଖଲ କରାଯାଇଛି। ୩୦-୩୦-୪୦ ଫର୍ମୁଲାରେ ଛାତ୍ରୀଛାତ୍ରଙ୍କ ପ୍ରଦର୍ଶନକୁ ଆଧାର କରି ମୂଲ୍ୟାୟନ କରାଯିବ ଏବଂ ଜୁଲାଇ ୩୧ରେ ଫଳ ପ୍ରକାଶ ପାଇବ ବୋଲି ଏକ ୧୩ଜଣିଆ କମିଟି ନିଷ୍ପତ୍ତି ନେଇଥିବା କୁହାଯାଇଛି। ଦଶମ, ଏକାଦଶର ୩୦ପ୍ରତିଶତ ଓ ଦ୍ୱାଦଶ ଶ୍ରେଣୀର ପ୍ରି ବୋର୍ଡ ପରୀକ୍ଷାର ଫଳାଫଳର ୪୦ପ୍ରତିଶତ ମୂଲ୍ୟକୁ ଗ୍ରହଣ କରାଯାଇ ଚୂଡ଼ାନ୍ତ ଫଳ ପ୍ରକାଶ ପାଇବ। ତେବେ ବୋର୍ଡର ଏଭଳି ନିଷ୍ପତ୍ତିକୁ ଅନେକେ ସ୍ବାଗତ କରିଥିବାବେଳେ କିଛି ଛାତ୍ରୀଛାତ୍ର, ଅଭିଭାବକ ଓ ଶିକ୍ଷାବିତ୍‌ଙ୍କ ମନରେ ଅନେକ ପ୍ରଶ୍ନ ଉଠିଛି। ସମସ୍ତେ ଏକ ପ୍ରକାର ଆଶଙ୍କା ଭିତରେ ରହି ଭଲ ଫଳକୁ ଅପେକ୍ଷା କରିଛନ୍ତି।

ଦ୍ୱନ୍ଦ୍ୱ ଦୂର ହୋଇଛି
ଦ୍ୱାଦଶ ପରୀକ୍ଷାଫଳ ହେଉଛି ପିଲାଙ୍କ ଭାଗ୍ୟରେଖା। ଏହି ଫଳାଫଳକୁ ନେଇ ପିଲାମାନଙ୍କ ମନରେ ରହିଥିବା ଦ୍ୱନ୍ଦ୍ୱ ଦୂରହୋଇଛି। ସିବିଏସ୍‌ଇ ବୋର୍ଡ ପକ୍ଷରୁ ନିଆଯାଇଥିବା ନିଷ୍ପତ୍ତି ଅତ୍ୟନ୍ତ ସ୍ବାଗତଯୋଗ୍ୟ। ବର୍ତ୍ତମାନର ମହାମାରୀ ସମୟରେ ପିଲାମାନେ ପାଠପଢ଼ାକୁ ନେଇ ବେଶ୍‌ ଚିନ୍ତିତ ଥିଲେ। ଫଳ ପ୍ରକାଶନ ହେଲେ ଆଗାମୀ ଶିକ୍ଷା ସମ୍ପର୍କରେ ଯୋଜନା ପ୍ରସ୍ତୁତ କରିବା ସହ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସହଜ ହେବ। ଫଳ ପ୍ରକାଶ ହେବା ପରେ ପିଲା ନିଜ ଯୋଗତ୍ୟ ଓ କ୍ଷମତା ଅନୁସାରେ ଆଗାମୀ ଶିକ୍ଷାନୁଷ୍ଠାନକୁ ଯାଇପାରିବେ ବୋଲି ସେ କହିଛନ୍ତି।

-ଅମରେନ୍ଦ୍ର ଦାସ, ବରିଷ୍ଠ ଶିକ୍ଷାବିତ୍‌ , ଭୁବନେଶ୍ୱର

ସ୍ବାଗତଯୋଗ୍ୟ ନିଷ୍ପତ୍ତି
ଅପେକ୍ଷାର ଫଳ ମିଠା ହୋଇଥାଏ। ସିବିଏସ୍‌ଇ ପକ୍ଷରୁ ଅବଲମ୍ବନ କରାଯାଇଥିବା ନିୟମାବଳୀ ଓ ପରୀକ୍ଷାଫଳ ମୂଲ୍ୟାୟନ ପଦ୍ଧତି ବେଶ୍‌ ସ୍ବାଗତଯୋଗ୍ୟ। ପିଲାଙ୍କ ଭବିଷତ୍ୟକୁ ନେଇ ସମସ୍ତେ ଚିନ୍ତିତ ଅଛନ୍ତି। ପରୀକ୍ଷାଫଳ ପିଲାଙ୍କ ଯୋଗ୍ୟତା ଓ ପୂର୍ବବର୍ଷର ଫଳାଫଳକୁ ନେଇ ଚୂଡ଼ାନ୍ତ ଫଳ ପ୍ରକାଶ କରାଯିବ ବୋଲି ବୋର୍ଡ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ଶେଷ ହୋଇ ନ ଥିଲେ ମଧ୍ୟ ଯାହା ଖବର ରହିଛି ପିଲାଙ୍କ ଭଲ ପାଇଁ ବୋର୍ଡ ନିଷ୍ପତ୍ତି ନେବ। ଫଳରେ ପିଲା ଆଗାମୀ ଦିନରେ କୌଣସି ସମସ୍ୟାର ସମ୍ମୁଖୀନ ନ ହୋଇ ଆଗାମୀ ଶିକ୍ଷା ପାଇଁ ପ୍ରସ୍ତୁତ ହୋଇପାରିବେ ।

– ଡ. ଏସ୍‌. ମୀନକେତନ, ବରିଷ୍ଠ ଶିକ୍ଷାବିତ୍‌, ଭୁବନେଶ୍ୱର

ଫଳଠାରୁ ମାର୍କ ପ୍ରତିଶତ ବଡ଼
କରୋନା ମହାମାରୀ ଯୋଗୁ ପିଲାମାନେ ଗତ ୨ବର୍ଷ ହେଲା ପାଠ ପଢ଼ିପାରି ନାହାନ୍ତି। ବିଶେଷକରି ୨୦୧୯-୨୧ ଶିକ୍ଷାବର୍ଷର ପିଲାମାନେ ପାଠପଢ଼ା ଓ ପରୀକ୍ଷାକୁ ନେଇ ଚିନ୍ତିତ ଥିଲେ। ସେ ସବୁ ଯାହା ଯେମିତି ହୋଇଗଲା କିନ୍ତୁ ଗତ ୪ ମାସରୁ ଊର୍ଦ୍ଧ୍ୱ ସମୟ ପରେ ଫଳ ପ୍ରକାଶ ପାଇବ। ଦ୍ୱାଦଶ ଫଳ ପ୍ରକାଶ ପାଇଁ ବୋର୍ଡ ଯେଉଁ ପଦ୍ଧତି ଆପଣାଇଛି ତାହା କିଛି ମାତ୍ରାରେ ଭଲ ହେଲେ ମଧ୍ୟ ମେଧାବୀ ପିଲାମାନେ ମାନସିକ ଭାବେ ଭାଙ୍ଗି ପଡୁଛନ୍ତି। ବର୍ତ୍ତମାନ ସମୟରେ ପିଲାଙ୍କ ପାଇଁ ଫଳାଫଳଠାରୁ ମାର୍କ ପ୍ରତିଶତ ବଡ଼ ହୋଇଯାଇଛି।

-ଅକ୍ଷୟ ଦାସ, ଅଭିଭାବକ, ଭୁବନେଶ୍ୱର

ବିଳମ୍ବ ହେଲେ ବି ସ୍ବାଗତଯୋଗ୍ୟ
ମହାମାରୀ ପାଇଁ ପାଠପଢ଼ା କିଛି ମାତ୍ରାରେ ପ୍ରଭାବିତ ହୋଇଥିଲେ ମଧ୍ୟ ବୋର୍ଡ ପରୀକ୍ଷାଫଳକୁ ନେଇ ଆମେ ଚିନ୍ତିତ ଥିଲୁ। ଫଳ ପ୍ରକାଶ ହେଲେ ଆଗାମୀ ଶିକ୍ଷା ସମ୍ପର୍କରେ ଯୋଜନା ପ୍ରସ୍ତୁତ ସହ ନୂତନ ଶିକ୍ଷାରେ ଯୋଗଦାନ କରିବାକୁ ଆବଶ୍ୟକ ପଦକ୍ଷେପ ଗ୍ରହଣ କରିବୁ। ବିଳମ୍ବ ହେଉ ପଛେ ବୋର୍ଡ ପକ୍ଷରୁ ଗ୍ରହଣ କରାଯାଉଥିବା ପଦ୍ଧତି ସ୍ବାଗତଯୋଗ୍ୟ।

-ବିଦିଶା ଦାଶ, ଦ୍ୱାଦଶ ଛାତ୍ରୀ, ଭୁବନେଶ୍ୱର

ପିଲାଙ୍କ ଭବିଷ୍ୟତକୁ ଚିନ୍ତା କରାଯାଉ
ଦ୍ୱାଦଶ ଶ୍ରେଣୀର ଛାତ୍ରୀଛାତ୍ରମାନେ ପାଠପଢ଼ାଠାରୁ ଆରମ୍ଭକରି ପରୀକ୍ଷାଫଳ ପର୍ଯ୍ୟନ୍ତ ଏକ ପ୍ରକାର ମାନସିକ ଚିନ୍ତାରେ ରହିଥିଲେ। ଗୋଟିଏ ପଟରେ ମହାମାରୀ ଅପରପକ୍ଷରେ ଘରେ ଅଭିଭାବକଙ୍କ ସ୍ବପ୍ନ ଆମ ପାଇଁ ମୁଣ୍ଡବିନ୍ଧାର କାରଣ ସାଜିଛି। ଦଶମର ଫଳ ବହୁତ ଭଲ କରିଥିବାରୁ ଦ୍ୱାଦଶର ଫଳ ଭଲ କରିବା ସହ ଏକ ଭଲ ଶିକ୍ଷାନୁଷ୍ଠାନରେ ନିଜର ଉଚ୍ଚ ଶିକ୍ଷା ପାଇଁ ଯେଉଁ ସ୍ବପ୍ନ ରହିଛି ତାହା ବର୍ତ୍ତମାନର ସମୟ ପାଇଁ ଏକ ପ୍ରଶ୍ନବାଚୀ ହୋଇ ରହିଛି। ଭଲ ପିଲାଙ୍କ ଭବିଷ୍ୟତକୁ ଚିନ୍ତା କରାଯାଉ ବୋଲି ସେ ମତବ୍ୟକ୍ତ କରିଛନ୍ତି।
-ରୁଦ୍ରନାରାୟଣ ଦାଶ,ଦ୍ୱାଦଶ ଛାତ୍ର,ଭୁବନେଶ୍ୱର

ଶୀଘ୍ର ଫଳ ପ୍ରକାଶ ପାଉ
ମହାମାରୀ ଯୋଗୁ ସ୍କୁଲ ବନ୍ଦ ଥିବାରୁ ଅନ୍‌ଲାଇନରେ ପାଠପଢ଼ା ହୋଇଥିଲେ ମଧ୍ୟ ଠିକ୍‌ ଭାବେ ସେସବୁ ପିଲାଙ୍କ ପକ୍ଷରେ ଗ୍ରହଣୀୟ ହୋଇପାରିନାହିଁ। ପାଠପଢ଼ା ଯାହା ବି ହେଉ ବୋର୍ଡ ପରୀକ୍ଷାଫଳକୁ ନେଇ ପିଲାଙ୍କଠାରୁ ଅଭିଭାବକ ପର୍ଯ୍ୟନ୍ତ ଚିନ୍ତିତ ଥିଲେ। ସିବିଏସ୍‌ଇ ଯାହା ବି କରୁ ଯେତେ ଶୀଘ୍ର ଫଳ ପ୍ରକାଶ କଲେ ସେହି ଅନୁସାରେ ଅଭିଭାବକମାନେ ଆଗାମୀ ଶିକ୍ଷା ସମ୍ପର୍କରେ ଯୋଜନା ପ୍ରସ୍ତୁତ କରିବେ ।

– ଚାରୁବାଳା ନନ୍ଦ, ଅଭିଭାବକ

ଏଣ୍ଟ୍ରାନ୍ସ ପାଇଁ ସମୟ ମିଳିବ
କେନ୍ଦ୍ର ସରକାରଙ୍କ ପକ୍ଷରୁ ନିଆଯାଇଥିବା ନିଷ୍ପତ୍ତିକୁ ସ୍ବୀକାର କରିବା ଛଡ଼ା ଅନ୍ୟ କୌଣସି ଉପାୟ ନାହିଁ। ଏଥିସହ ଇଚ୍ଛୁକ ଛାତ୍ରୀଛାତ୍ର ପରୀକ୍ଷା ଦେଇ ପାରିବେ ବୋଲି କୁହାଯାଇଛି। ତେବେ ଏହି ନିଷ୍ପତ୍ତି ଦ୍ୱାରା ଆଗାମୀ ଦିନରେ ହେବାକୁଥିବା ଅନ୍ୟ ଏଣ୍ଟ୍ରାନ୍ସ ପରୀକ୍ଷା ପାଇଁ ଆମକୁ ଅଧିକ ସମୟ ମିଳିଯିବ।

ବୈଜୟନ୍ତୀ ପଟ୍ଟନାୟକ, ଛାତ୍ରୀ, କଟକ

ନିଷ୍ପତ୍ତିକୁ ଗ୍ରହଣ କରିବାକୁ ପଡ଼ିବ
କରୋନା ମହାମାରୀ ସମୟରେ ଦ୍ୱାଦଶ ଛାତ୍ରୀଛାତ୍ରଙ୍କ ପାଇଁ କେନ୍ଦ୍ର ସରକାରଙ୍କ ପକ୍ଷରୁ ନିଆଯାଇଥିବା ନିଷ୍ପତ୍ତିକୁ କିଛି ପିଲା ସ୍ବାଗତ କରିଥିବା ବେଳେ କିଛି ପିଲା ନିରାଶ ହୋଇଛନ୍ତି। ତେବେ ସମସ୍ତଙ୍କୁ ସୁହାଇବା ଭଳି ସିବିଏସ୍‌ଇ ବୋର୍ଡ ପକ୍ଷରୁ ନିଷ୍ପତ୍ତି ନିଆଯାଇଛି। ତାହା ସମସ୍ତଙ୍କୁ ଗ୍ରହଣ କରିବାକୁ ପଡିବ।

-ପ୍ରଭୁଚରଣ ମହାନ୍ତି,ସେଣ୍ଟ ଜାଭିୟର ଗ୍ରୁପ୍‌, କଟକ

ମାପକାଠି ଠିକ୍‌ ହୋଇନାହିଁ
ସିବିଏସ୍‌ଇ ସୁପ୍ରିମକୋର୍ଟରେ ଦାଖଲ କରିଥିବା ଦ୍ୱାଦଶ ଶ୍ରେଣୀ ପିଲାଙ୍କ ଉତ୍ତୀର୍ଣ୍ଣ ନେଇ ନିର୍ଦ୍ଧାରଣ ହୋଇଥିବା ମାପକାଠି ଠିକ୍‌ ହୋଇନାହିଁ। ମାଟ୍ରିକ ପରୀକ୍ଷାର ମାର୍କକୁ ବାଦ୍‌ ଦେଇ କେବଳ ଯୁକ୍ତଦୁଇର ସମସ୍ତ ପରୀକ୍ଷାର ମାର୍କକୁ ମିଶାଇ ମାପକାଠି ନିର୍ଦ୍ଧାରିତ ହୋଇଥିଲେ ଉଚିତ ହୋଇଥାନ୍ତା। ଏଭଳି ଅନେକ ଛାତ୍ରୀଛାତ୍ର ଅଛନ୍ତି ଯେଉଁମାନେ ପ୍ରିବୋର୍ଡ ପରୀକ୍ଷା ଦେଇ ନାହାନ୍ତି। ସେମାନଙ୍କ ପାଇଁ ଏହି ମାପକାଠି ସମ୍ପୂର୍ଣ୍ଣ ଭୁଲ୍‌ ହୋଇଯିବ।

-କୁମାର ରୋଶନ,

ଯାଜପୁର ରୋଡ, ଯାଜପୁର

ଭବିଷ୍ୟତକୁ ଦେଖି ନିଷ୍ପତ୍ତି ନିଆଯାଉ
ଛାତ୍ରୀଛାତ୍ରଙ୍କ ଭବିଷ୍ୟତକୁ ଦୃଷ୍ଟିରେ ରଖି ସରକାର ଯାହା ନିଷ୍ପତ୍ତି ନେବେ ଆମେ ତାକୁ ସ୍ବାଗତ କରିବୁ। ମେଧାବୀ ଛାତ୍ରୀଛାତ୍ରୀଙ୍କ କ୍ୟାରିୟର ମାର୍କିଂରେ ଯେପରି କୌଣସି ଅସୁବିଧା ନ ହୁଏ ସେଥିପାଇଁ ସରକାର ଯନତ୍ବାନ ହେବାର ଆବଶ୍ୟକତା ରହିଛି।
– ବୈଶବୀ ମହାନ୍ତି, ଯୁକ୍ତ ୨ ଛାତ୍ରୀ, ବାଲେଶ୍ୱର।


Enter your email to get our daily news in your inbox.

All Right Reserved By Dharitri.Com

ଗଜପତିରେ ୭ ପରିବର୍ତ୍ତେ ୨୧ ଦିନକୁ ବୃଦ୍ଧି କରାଗଲା ସଙ୍ଗରୋଧ ଅବଧି

ଗଜପତି,୨୯।୬(ସ୍ବ.ପ୍ର.): ଗଜପତି ଜିଲାରେ ସଙ୍ଗରୋଧ ଅବଧିକୁ ୭ ଦିନ ବଦଳରେ ୨୧ ଦିନକୁ ବୃଦ୍ଧି କରାଯାଇଛି। ସୋମବାର ଜିଲାରେ ନୂଆ ନିୟମ ଲାଗୁ କରିବାକୁ ଜିଲାପାଳ...

ଯୋଜନାରେ ସୀମିତ ସ୍ମାର୍ଟ ପ୍ରକଳ୍ପ

ଭୁବନେଶ୍ୱର,୧୯ା୯ (ବ୍ୟୁରୋ): ଗତ ୨୦୧୬ ଜାନୁୟାରୀ ମାସରେ ଭୁବନେଶ୍ୱରକୁ ଦେଶର ସ୍ମାର୍ଟସିଟି ମାନ୍ୟତା ମିଳିଥିଲା। ହେଲେ ସ୍ମାଟସିଟିର ସ୍ମାର୍ଟ ପ୍ରକଳ୍ପ ଆଜିଯାଏ ଅପହଞ୍ଚ। ପ୍ରଥମେ ହକି...

କେନ୍ଦୁଝରରେ ଝଡପବନ ସହ କୁଆପଥର ବର୍ଷା, ଲୋକେ ଆଶ୍ୱସ୍ତ

କେନ୍ଦୁଝର, ୨୮ା୫ (ସ୍ବ.ପ୍ର./ଡି.ଏନ.ଏ.)-ଗତ କିଛି ଦିନ ହେଲା କେନ୍ଦୁଝରର ପାରଦ ଆକାଶଛୁଆଁ ହେଉଥିବାରୁ ଜନଜୀବନ ବ୍ୟତିବ୍ୟସ୍ତ ହୋଇପଡିଛି। ଏଭଳି ସମୟରେ ମଙ୍ଗଳବାର ଅପରାହ୍ନରେ ହଠାତ କୁଆପଥର...

ଧଳାବାଘ ‘ସମ୍ରାଟ’ ଅସୁସ୍ଥ

ବାରଙ୍ଗ,୨୭ା୬(ଡି.ଏନ୍‌.ଏ.): ନନ୍ଦନକାନନ ପ୍ରାଣୀ ଉଦ୍ୟାନର ଅନ୍ୟତମ ଆକର୍ଷଣ ଧଳାବାଘ ସମ୍ରାଟ ଅସୁସ୍ଥ ହୋଇପଡ଼ିଛି। ତା’ର ପିଠି ବଙ୍କା ହୋଇରହିବା ସହ ସେ ଛୋଟେଇ ଛୋଟେଇ ଚାଲୁଛି।...

ନାବାଳକଙ୍କ ମୃତ୍ୟୁକୁ ନେଇ ବାଲିଆପାଳରେ ରାସ୍ତାରୋକ

ବାଲିଆପାଳ, ୨୭।୭(ସ୍ବ.ପ୍ର.): ନାବାଳକଙ୍କ ମୃତ୍ୟୁକୁ ନେଇ ବାଲିଆପାଳ କମର୍ଦା ମୁଖ୍ୟରାସ୍ତା ଉଲୁଡ଼ା ଛକ ନିକଟରେ ଶନିବାର ସକାଳେ ରାସ୍ତା ଅବରୋଧ କରାଯାଇଛି। ମୃତଦେହ ନେଇ ଆସିଥିବା...

ପର୍ଯ୍ୟଟନସ୍ଥଳରେ ପର୍ଯ୍ୟଟକଙ୍କୁ ଶୋଷଣ ଅଭିଯୋଗ : ପାର୍କିଂ ପାଇଁ ଶତାଧିକ ଟଙ୍କା ଆଦାୟକୁ ବିରୋଧ

ଦାରିଙ୍ଗବାଡ଼ି,୨୪।୧୨(ଡି.ଏନ.ଏ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ଏବେ ପର୍ଯ୍ୟଟକଙ୍କ ଭିଡ଼ ଜମୁଛି। ତେବେ ପର୍ଯ୍ୟଟନକେନ୍ଦ୍ରଗୁଡ଼ିକରେ ଗାଡ଼ି ପାର୍କିଂ ପାଇଁ ଶହ ଶହ ଟଙ୍କା ଆଦାୟ କରାଯାଉଥିବାରୁ...

ଆଜି ଜେଲରୁ ବାହାରି ପାରନ୍ତି ସାରଥି

କଟକ ଅଫିସ, ୨୫।୭: ସାରଥି ଓରଫ୍‌ ସନ୍ତୋଷ ରାଉଳ ଗୁରୁବାର ଜେଲରୁ ମୁକୁଳି ପାରନ୍ତି। କେନ୍ଦ୍ରାପଡ଼ା ଏସ୍‌ଡିଜେଏମ୍‌ଙ୍କ କୋର୍ଟରେ ବେଲ୍‌ ବଣ୍ଡ ଦାଖଲ ହୋଇଛି। ସେଠାରୁ...

ଚିଲିକା ଡଙ୍ଗାବୁଡ଼ି ଘଟଣାକୁ ବର୍ଷେ ପୂରିଲା : ବିପଜ୍ଜନକ ନୌଯାତ୍ରାରେ ଲାଗିଲାନି ଲଗାମ

ଖୋର୍ଦ୍ଧା ଅଫିସ,୧୭ା୬ : ଚିଲିକା ଡଙ୍ଗାବୁଡି ଘଟଣାକୁ ଇତିମଧ୍ୟରେ ବର୍ଷେ ବିତିଯାଇଛି। ହେଲେ ବିପଜ୍ଜନକ ନୌଯାତ୍ରାରେ ଲାଗି ପାରିଲାନି ଲଗାମ। ସ୍ଥିତିରେ କିଛିଟା ସୁଧାର ଆସିଥିଲେ...

Advertisement
Archives

Model This Week