ଆପଣ ମୋ କଥାରେ ରାଜି ହୋଇପାରନ୍ତି ଅବା ନ ହୋଇପାରନ୍ତି, କିନ୍ତୁ ଏହା ଲିଓନେଲ ମେସିଙ୍କ ବିଶ୍ୱକପ୍ ବୋଲି ମୁଁ କହିବି। ବର୍ତ୍ତମାନ ସେ କେବଳ ଆର୍ଜେଣ୍ଟିନାର ନୁହନ୍ତି ବିଶ୍ୱ ଫୁଟ୍ବଲକୁ ପ୍ରତିନିଧିତ୍ୱ କରୁଛନ୍ତି। ପିଚ୍ରେ ଏବଂ ପିଚ୍ ବାହାରେ ସେ ଦଳର ନେତୃତ୍ୱ ନେଉଛନ୍ତି। ସେ ଗୋଲ୍ ସ୍କୋର କରୁଛନ୍ତି, ଅନ୍ୟମାନଙ୍କୁ ସ୍କୋର କରିବାରେ ସହାୟତା କରୁଛନ୍ତି। ପ୍ରତିପକ୍ଷ ଖେଳାଳିଙ୍କ ସହ ଝଗଡ଼ା କରିବା ଦେଖିବାକୁ ମିଳୁନି। କାତାରରେ ଲକର ରୁମ୍ରେ ସେ ସମଗ୍ର ଟିମ୍କୁ ଉତ୍ସାହିତ କରୁଥିବାର ମୁଁ ଲକ୍ଷ୍ୟ କରିଛି। ଏହି ବିଶ୍ୱକପ୍ରେ ଆର୍ଜେଣ୍ଟିନାବାସୀ ମେସିଙ୍କ ନିକଟରେ ମାରାଡୋନାଙ୍କ ଉତ୍ସାହ, ଉଦ୍ଦୀପନା,ଆବେଗ ଓ ମ୍ୟାଚ ଜିତିବାର କ୍ଷୁଧା ଦେଖିବାକୁ ପାଉଛନ୍ତି। ବିଶ୍ୱକପ୍ ସଫଳତା ହାସଲ ପାଇଁ ଆଉ ମାତ୍ର ଗୋଟିଏ ମ୍ୟାଚ ବାକି ରହିଛି, ଯେଉଁଥିପାଇଁ ଆମ ଦେଶ ୩୬ବର୍ଷ ହେଲା ଅପେକ୍ଷା କରି ରହିଛି। ଆର୍ଜେଣ୍ଟିନା-କ୍ରୋଏସିଆ ସେମିଫାଇନାଲରେ ଦୁଇ ଦଳ ଆରମ୍ଭରେ ନିଜକୁ ସୁରକ୍ଷିତ ରଖି ଅଧିକ ରିସ୍କ ନ ନେଇ ଖେଳିଥିଲେ। ଆର୍ଜେଣ୍ଟିନା କିନ୍ତୁ ସବୁବେଳେ ତୁଳନାତ୍ମକ ଭାବେ ଅଧିକ ରିସ୍କ ନେଇଥାଏ। ପ୍ରଥମାର୍ଦ୍ଧର ୧୦ ମିନିଟ ପରେ କ୍ରୋଏସିଆ ବଲ୍ ଓ ଗେମ୍କୁ ନିଜ ଅକ୍ତିଆର କରିବାରେ ଲାଗିପଡ଼ିଥିଲା। ମାତ୍ର ଆର୍ଜେଣ୍ଟିନା କ୍ରସ୍ ପାସ୍, ଏକ କର୍ନର ଏବଂ ଡିଫେଣ୍ଡରମାନଙ୍କ ଆଡୁ ଉତ୍ତମ କଟ୍ ସେମାନଙ୍କୁ ଆଗେଇବାକୁ ଦେଇ ନ ଥିଲା। ୩୪ମିନିଟ୍ ଖେଳ ପରେ ଜୁଲିଆନ ଆଲ୍ଭାରେଜଙ୍କୁ ଏକ ଫ୍ରଣ୍ଟାଲ ପାସ୍ ବେଳେ ଗୋଲକିପରଙ୍କ ପାଇଁ ପେନାଲ୍ଟି ମିଳିଥିଲା। ମେସି ଏହାକୁ ଗୋଲରେ ରୂପାନ୍ତରିତ କରି ଖେଳର ଗତିପଥ ବଦଳାଇ ଦେଇଥିଲେ। ପରେ ଏକ ପ୍ରତିଆକ୍ରମଣ ବେଳେ ଆଲଭାରେଜ ବଲ୍ ସହିତ ୭୦ ମିଟର ଦୌଡ଼ ଲଗାଇ ଦଳ ପକ୍ଷରୁ ଦ୍ୱିତୀୟ ଗୋଲ ସ୍କୋର କରିଥିଲେ। ଦ୍ୱିତୀୟାର୍ଦ୍ଧ ଖେଳରେ ବିଶ୍ୱର ରନର-ଅପ୍ ଦଳ ବଲ୍କୁ ହାତେଇବା ସହ ଫରଓ୍ବାର୍ଡଙ୍କୁ ସକ୍ରିୟ କରିଥିଲା। ସେମାନେ ଗେମ୍ ଶେଷ ପର୍ଯ୍ୟନ୍ତ ଉଦ୍ୟମ ଜାରି ରଖି କେତୋଟି ଗୋଲ ସୁଯୋଗ ସୃଷ୍ଟି କରିଥିଲେ ହେଁ ସଫଳ ହୋଇ ନ ଥିଲେ। ଦ୍ୱିତୀୟାର୍ଦ୍ଧ ଖେଳର ୨୪ ତମ ମିନିଟ୍ରେ ଆର୍ଜେଣ୍ଟିନା ଦଳ ପକ୍ଷରୁ ଏକ ବଡ଼ ଉଦ୍ୟମ ହୋଇଥିଲା। ତାଙ୍କ ସହାୟତାରେ ଆଲଭାରେଜ ପୁଣି ଏକ ଗୋଲ୍ ସ୍କୋର କରିଥିଲେ। ଏହି ବିଶ୍ୱକପ୍ରେ ଆର୍ଜେଣ୍ଟିନାର ଦୁଇ ଶ୍ରେଷ୍ଠ ଖେଳାଳି ହେଲେ ମେସି ଓ ଆଲଭାରେଜ। ମେସି ବର୍ତ୍ତମାନ ଖୁସି ଅଛନ୍ତି। ବିଶ୍ୱକପ୍କୁ ପ୍ରକୃତରେ ସେ ଉପଭୋଗ କରୁଛନ୍ତି। ତାଙ୍କ ସହ ମୋର ଉତ୍ତମ ସମ୍ପର୍କ ରହିଛି। ଜାତୀୟ ଦଳ ସହ ଆମେ ବହୁ ମୁହୂର୍ତ୍ତ ବିତାଇଛୁ। ସର୍ବକାଳୀନ ତାଙ୍କୁ ମାରାଡୋନାଙ୍କ ସହ ତୁଳନା କରାଯାଉଛି। ମାତ୍ର ଏହା ତାଙ୍କୁ ଖୁବ୍ ଖରାପ ଲାଗିପାରେ। ସେ ଫୁଟ୍ବଲ ଇତିହାସରେ ଅନ୍ୟତମ ଶ୍ରେଷ୍ଠ ଖେଳାଳି ମାନ୍ୟତା ଲାଭ କରିସାରିଛନ୍ତି। ଏକ ବିଶ୍ୱକପ୍ରେ ତାଙ୍କର ପୂର୍ଣ୍ଣତାପ୍ରାପ୍ତି ହେବ।
-(ଚିଭାକ୍ ସ୍ପୋଟର୍ସ)
