ପାରଳାଖେମୁଣ୍ଡି, ୫।୫ (ଗିରିଧାରୀ ପରିଛା):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ଶନିବାର ଗଜପତି ଜିଲା ପାରଳାଖେମୁଣ୍ଡିଠାରେ ନିର୍ବାଚନ ପ୍ରଚାର କରିଛନ୍ତି। ଆୟୋଜିତ ସମାବେଶରେ ଜିଲାର ଦୁଇ ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀ ଓ ବ୍ରହ୍ମପୁର ଲୋକସଭା କ୍ଷେତ୍ରର ଏମପି ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ରାଜନୀତିରେ ଜନବିରୋଧୀ ଓ ଅପରାଧ ପୃଷ୍ଠଭୂମି ଥିବା ବ୍ୟକ୍ତି ବିଶେଷଙ୍କ ସ୍ଥାନ ନାହିଁ। ଏଣୁ ଭଲ ଲୋକଙ୍କୁ ଚିହ୍ନନ୍ତୁ ଓ ଭୋଟ ଦିଅନ୍ତୁ। ସମାବେଶରେ ବରିଷ୍ଠ ନେତା କାର୍ତ୍ତିକ ପାଣ୍ଡିଆନ କହିଥିଲେ ଯେ, କେନ୍ଦ୍ର ସରକାର ଦେଶରେ ବାର୍ଷିକ ଦୁଇ କୋଟି ନିଯୁକ୍ତି ସୁଯୋଗ ଯୋଗାଇବେ ବୋଲି ପ୍ରତିଶ୍ରୁତି ଦେଇଥିଲେ। ତେବେ ଗତ ଦଶ ବର୍ଷ ମଧ୍ୟରେ ୨୦କୋଟି ନିଯୁକ୍ତି ମିଳିବା କଥା। ସେହି ପରିପ୍ରେକ୍ଷୀରେ ଓଡ଼ିଶା ଭାଗରେ ୮୦ଲକ୍ଷ ନିଯୁକ୍ତି ମିଳିବା କଥା। ତେବେ କେନ୍ଦ୍ର ସରକାର ୮୦ଲକ୍ଷ ନିଯୁକ୍ତିର ହିସାବ ଦେଇପାରିବେ କି ବୋଲି ପ୍ରଶ୍ନ କରିଛନ୍ତି। ଏଥିସହ ମୋହନା ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀ ଅନ୍ତର୍ଯ୍ୟାମୀ ଗମାଙ୍ଗ ଓ ପାରଳାଖେମୁଣ୍ଡି ବିଧାୟକ ପ୍ରାର୍ଥୀ ରୂପେଶ ପାଣିଗ୍ରାହୀ ଓ ବ୍ରହ୍ମପୁର ଏମପି ପ୍ରାର୍ଥୀ ଭୃଗୁ ବକ୍ସିପାତ୍ରଙ୍କୁ ଆସନ୍ତା ୧୩ ତାରିଖରେ ଭୋଟ ଦେବା ପାଇଁ ଅନୁରୋଧ କରିଛନ୍ତି। ସେହିପରି ନାଁ ନନେଇ କେନ୍ଦ୍ରମନ୍ତ୍ରୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ଗତ ୧୦ ବର୍ଷ ହେଲା ମୁଖ୍ୟମନ୍ତ୍ରୀ ପ୍ରାର୍ଥୀ ହେବାକୁ ଚେଷ୍ଟାକରି ଅସଫଳ ହୋଇଥବା ଜଣେ ବ୍ୟକ୍ତି କିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶର ଭାଷା ବୁଝି ପାରିବ। ଯିଏ ନିଜ ଦଳୀୟ ଲୋକଙ୍କ ସମ୍ମୁଖରେ ବିଶ୍ୱାସଭାଜନ ହୋଇପାରିନାହାନ୍ତି ସେ ମୁଖ୍ୟମନ୍ତ୍ରୀଙ୍କ ସହ ସମକକ୍ଷ ହେବା ଚିନ୍ତା କରିବା ପୂର୍ବରୁ ନିଜ ଦଳକୁ ସଜାଡ଼ିବା ଆବଶ୍ୟକ ବୋଲି କହିଛନ୍ତି। ମୁଁ ବିକାଶର ଯେତେ ଭାଷା କହିଲେ ବି ଆପଣ ବୁଝି ପାରୁ ନାହାନ୍ତି। ପୁରୀ ଶ୍ରୀମନ୍ଦିର ରୂପାନ୍ତରଣ କଥା କହିଲେ ଆପଣ ବୁଝି ପାରୁନାହାନ୍ତି। ସ୍କୁଲ ରୂପାନ୍ତରଣ କଥା ଆପଣଙ୍କୁ ଅବୁଝା ହେଉଛି। ତେଣୁ ଆପଣଙ୍କ ରାଜନୈତିକ ଭାଷାରେ ବୁଝାଇବାକୁ ପଡ଼ୁଛି।
