ଭୁବେନଶ୍ବର,୧୪ା୧(ବ୍ୟୁରୋ): ରାଜ୍ୟରେ ସଡ଼କ ଦୁର୍ଘଟଣା ଏବଂ ଏଥିଜନିତ ମୃତ୍ୟୁକୁ ନେଇ ଚିନ୍ତା ବଢ଼ିବାରେ ଲାଗିଛି। ଗତବର୍ଷ ଜାନୁଆରୀରୁ ଅକ୍ଟୋବର ମାସ ମଧ୍ୟରେ ଦୁର୍ଘଟଣାଜନିତ ମୃତ୍ୟୁ ପ୍ରାୟ ୮.୫% ବଢ଼ିଛି। ଅଭ୍ୟାସଗତ ନିୟମ ଉଲ୍ଲଙ୍ଘନକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାର ଚିନ୍ତା କରୁଛନ୍ତି। କେବଳ ଯୋଗ୍ୟ ଚାଳକ ଯେପରି ଡ୍ରାଇଭିଂ ଲାଇସେନ୍ସ (ଡିଏଲ) ପାଇବେ, ତାହାକୁ ଗୁରୁତ୍ୱ ଦିଆଯାଉଛି।
ଦୁର୍ଘଟଣାଜନିତ ମୃତ୍ୟୁ କମାଇବାକୁ ପ୍ରତି ଗାଁରେ ଯୁବପିଢ଼ି/ସ୍ବେଚ୍ଛାସେବୀଙ୍କୁ ତାଲିମ ଦିଆଯିବ। ସଡ଼କ ଦୁର୍ଘଟଣାଗ୍ରସ୍ତ ଆହତଙ୍କୁ ଏହି ସ୍ବେଚ୍ଛାସେବୀମାନେ ଫାଷ୍ଟ-ଏଡ ଦେବା ସହ ନିକଟସ୍ଥ ଟ୍ରମା କେୟାର ସେଣ୍ଟର (ଟିସିସି)କୁ ସ୍ଥାନାନ୍ତରିତ କରିବେ। ପ୍ରତି ଗାଁରେ ୧୦ରୁ ୧୫ ଜଣଙ୍କୁ ଏଥିପାଇଁ ତାଲିମ ଦେବାକୁ ସରକାର ନିଷ୍ପତ୍ତି ନେଇଛନ୍ତି। ସେହିପରି ସଚେତନତା ସୃଷ୍ଟି କ୍ଷେତ୍ରରେ ସ୍ବୟଂ ସହାୟିକା ଗୋଷ୍ଠୀ (ଏସ୍୍ଏଚ୍ଜି) ସଦସ୍ୟାଙ୍କୁ ସାମିଲ କରାଯିବ। ଅପରପକ୍ଷେ ବାରମ୍ବାର ଟ୍ରାଫିକ ନିୟମ ଭଙ୍ଗ କରୁଥିବା ଚାଳକଙ୍କୁ ଅଧିକ ଦଣ୍ଡିତ କରାଯିବ। ସେମାନଙ୍କ ଯାନର ବୀମା ପ୍ରିମିୟମକୁ ବଢ଼ାଇ ଦିଆଯିବ। ଏନେଇ ବୀମା କମ୍ପାନୀଗୁଡ଼ିକ ସହ ସରକାର ଆଲୋଚନା କରିବେ। ରାଜ୍ୟ ସଡ଼କ ସୁରକ୍ଷା ପରିଷଦର ଦ୍ବିତୀୟ ବୈଠକ ବିବରଣୀରୁ ଏହି ସୂଚନା ମିଳିଛି। ଉକ୍ତ ବୈଠକରେ ଅଧ୍ୟକ୍ଷତା କରି ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁ କହିଥିଲେ, ଆମ ସମସ୍ତଙ୍କ ପାଇଁ ସଡ଼କ ସୁରକ୍ଷା ହେଉଛି ଚିନ୍ତାର ବିଷୟ। ଓଡ଼ିଶାରେ ଗତ ଦଶନ୍ଧିରେ ପ୍ରାୟ ୪୫ ହଜାର ଲୋକ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି। ସେମାନଙ୍କ ମଧ୍ୟରୁ ୭୦% ହେଉଛନ୍ତି ଯୁବବର୍ଗ। ଗ୍ରାମାଞ୍ଚଳରେ ଅଧିକ ସଡ଼କ ଦୁର୍ଘଟଣା ଘଟୁଥିବାରୁ ସଚେତନତା ସୃଷ୍ଟିରେ ଏସଏଚଜି ଏବଂ ଅନ୍ୟ ପଞ୍ଚାୟତିରାଜ ଅନୁଷ୍ଠାନଗୁଡ଼ିକୁ ତୃଣମୂଳସ୍ତରରେ ସାମିଲ କରିବାକୁ ମନ୍ତ୍ରୀ ଗୁରୁତ୍ବ ଦେଇଥିଲେ।
କମିସନରେଟ ପୋଲିସ ଅଞ୍ଚଳରେ ସିସିଟିଭି ସର୍ଭେଲାନ୍ସ ବ୍ୟବସ୍ଥା ଆରମ୍ଭ ହୋଇଛି। ଭୁବନେଶ୍ବରରେ ଦ୍ରୁତବେଗରେ ଗାଡ଼ି ଚାଳନା ମାମଲା ଅଧିକ ଦେଖାଯାଉଛି। ମାସକ ମଧ୍ୟରେ ସ୍ପିଡ ଲିମିଟ ଧାର୍ଯ୍ୟ କରିବାକୁ ସଡ଼କ କର୍ତ୍ତୃପକ୍ଷଗୁଡ଼ିକୁ କୁହାଯାଇଛି। ଅନ୍ୟପକ୍ଷରେ ଭୁବନେଶ୍ବର ସ୍ମାର୍ଟ ସିଟି ଲିମିଟେଡ ପକ୍ଷରୁ ମେଡିଆନ କଟ ଏବଂ ଟ୍ରାଫିକ ଲାଇଟ ପୋଷ୍ଟକୁ ସଠିକ ଭାବେ ଡିଜାଇନ କରାଯାଇନି। ଯାହାଫଳରେ ଦୁର୍ଘଟଣା ଘଟୁଛି। ଏଭଳି ସ୍ଥାନଗୁଡ଼ିକୁ ମିଳିତ ଭାବେ କମିସନରେଟ ପୋଲିସ ଏବଂ ପରିବହନ ଆୟୁକ୍ତଙ୍କ ଏକ ବୈଷୟିକ ଦଳ ଯାଞ୍ଚ କରିବେ। ସହର ରାସ୍ତା ଡିଜାଇନ କରିବା ସମୟରେ କମିସନରେଟ ପୁଲିସ ସହ ଭୁବନେଶ୍ବର ସ୍ମାର୍ଟ ସିଟି ଲିମିଟେଡ ପରାମର୍ଶ କରିବ। ସେହିପରି ରାଜପଥ କଡ଼ ଗ୍ରାମରେ ରହୁଥିବା ଲୋକେ ବେଆଇନ ଭାବେ ହମ୍ପସ ର୍ନିମାଣ କରୁଛନ୍ତି। ଏପରି ନ କରିବାକୁ ସେମାନଙ୍କୁ ବୁଝାଯିବ। ସରକାରଙ୍କ ତରଫରୁ ସିସିଟିଭି ସର୍ଭେଲାନ୍ସ ବ୍ୟବସ୍ଥା ଯୋଗାଇ ଦିଆଯିବ। ଭୁବନେଶ୍ବର ସହରର ବିଭିନ୍ନ କାନ୍ଥରେ ସଡ଼କ ସୁରକ୍ଷା ବାର୍ତ୍ତା ସମ୍ବଳିତ ଚିତ୍ର କରିବାକୁ ବିଏମସି ଏବଂ ସ୍ମାର୍ଟ ସିଟିକୁ ଅନୁରୋଧ କରାଯିବ।
