କୋଣାର୍କ,୯।୪(ଡି.ଏନ୍.ଏ.): ଗୋଟିଏ ଘର ଭିତରେ ୫ବର୍ଷ ହେଲା ବନ୍ଦୀ ଜୀବନ କାଟୁଛନ୍ତି ବିଷ୍ନୁପ୍ରସାଦ ବେହେରା। ନା ହସଖୁସି ନା ଖୋଲା ଜୀବନ। ମାନସିକ ବିକାରଗ୍ରସ୍ତ ଯୋଗୁ ପରିବାର ଲୋକ ତାଙ୍କୁ ଗୋଟିଏ କୋଠରି ଭିତରେ ବନ୍ଦ କରି ରଖିଛନ୍ତି। କୋଣାର୍କ ଥାନାନ୍ତର୍ଗତ ନଳକଣ ଗ୍ରାମର ଗଙ୍ଗାଧର ବେହେରାଙ୍କ ପୁଅ ବିଷ୍ଣୁ(୪୦ବର୍ଷ)ମାନସିକ ଭାବେ ବିକାର ଗ୍ରସ୍ତ। ରୋଗ ବିଷୟରେ ଜଣାପଡିବା ପରେ ତାଙ୍କ ବାପା ବିଷ୍ଣୁଙ୍କ ଚିକିତ୍ସା ପାଇଁ କଟକ ବଡ ମେଡିକାଲ ନେଇଥିଲେ। ଡାକ୍ତର ତାଙ୍କୁ ଔଷଧ ଦେଇ ଘରକୁ ଫେରାଇ ଦେଇଥିଲେ। ଘରେ ରହି ବିଷ୍ଣୁଙ୍କ ଚିକିତ୍ସା ଆରମ୍ଭ କରାଯାଇଥିଲା। ବିଷ୍ଣୁ କିଛି ଦିନ ଔଷଧ ଖାଇବା ପରେ ପରେ ଆଉ ଖାଇ ନ ଥିଲେ। ଫଳରେ ଧୀରେ ଧୀରେ ମାନସିକ ହରାଇବା ସହ ଘର ଭିତର ଆସବାବପତ୍ର ଫିଙ୍ଗା ଫୋପଡ଼ା କରି ସମସ୍ତଙ୍କୁ ମାରଧର କରିଥିଲେ। ପୁଅର ଏଭଳି ଅବସ୍ଥା ଦେଖି ପରିବାର ଲୋକେ ବହୁତ ଭାଙ୍ଗି ପଡ଼ିଥିଲେ। କିଛିଦିନ ପରେ ବିଷ୍ଣୁ ଘରୁ ବାହାରି କୋଣାର୍କ-ପୁରୀ ବେଳାମାର୍ଗ ଗରୁଡ଼େଶ୍ୱର ମନ୍ଦିର ନିକଟରେ ରହିଥିଲେ। ସେଠାରେ କିଛି ବର୍ଷ ରହି ପୁଣି ପୂର୍ବଭଳି ବ୍ୟବହାର କଲେ। ବିଷ୍ଣୁଙ୍କ ଏଭଳି ଆଚରଣରେ ମନ୍ଦିର ସେବାୟତମାନେ ତାଙ୍କୁ ଘରେ ଛାଡ଼ି ଦେଇଗଲେ। ସେହିଦିନଠାରୁ ପୁଅକୁ ପରିବାର ଲୋକେ ଘର ଭିତରେ ବନ୍ଦ କରି ରଖିଲେ। ଖାଇବା ସମୟ ହେଲେ ଝରକା ପାଖରେ ଖାଇବାକୁ ଦିଆଯାଏ। ଘର ଭିତରେ ଗୋଟିଏ ଖଟିଆ ପଡିଛି। ଖାଇବାଠାରୁ ଆରମ୍ଭ କରି ନିତ୍ୟକର୍ମ ସବୁ ସେଇ ଗୋଟିଏ ଘର ଭିତରେ। ଏ ସମ୍ପର୍କରେ ବିଷ୍ଣୁଙ୍କ ବାପା ଓ ମା କୁହନ୍ତି, ଚିକିତ୍ସା ପାଇଁ ଅର୍ଥ ବାଧକ ସାଜିଥିବାରୁ ଆମେ ନିରୁପାୟ। ପୁଅର ନିଜର ନିୟନ୍ତ୍ରଣ ସ୍ଥିତି ହରାଇଥିବାରୁ ଆମେ ବାଧ୍ୟ ହୋଇ ତାକୁ ଗୋଟିଏ ଘର ଭିତରେ ବନ୍ଦ କରି ରଖିଛୁ। ଯଦି କୌଣସି ସ୍ବେଚ୍ଛାସେବୀ ସଂଗଠନ କିମ୍ବା ସରକାରଙ୍କ ପକ୍ଷରୁ ସହାୟତା ମିଳେ, ତେବେ ପୁଅର ଅବସ୍ଥା ଭଲ ହୋଇପାରେ ବୋଲି ମାବାପା ଆଶାବାଦୀ ଅଛନ୍ତି।
