ନୂଆଦିଲ୍ଲୀ, ୯।୪(ପି.ଟି.)-ଏକ ଐତିହାସିକ ଘଟଣା କ୍ରମରେ ପ୍ରଥମ ଥରପାଇଁ ଅଲିମ୍ପିକ୍ସରେ ୪ ଜଣ ଭାରତୀୟ ସେଲର ଅଂଶଗ୍ରହଣ କରିବାକୁ ଯାଉଛନ୍ତି। ଓମାନରେ ଏସୀୟ ଯୋଗ୍ୟତା ପର୍ଯ୍ୟାୟ ପ୍ରତିଯୋଗିତା ମୁସାନା ଓପନ ଚାମ୍ପିୟନଶିପ୍ରେ ଚମତ୍କାର ପ୍ରଦର୍ଶନ କରି ବିଷ୍ଣୁ ସରଭାନନ ଏବଂ ଗଣପତି ଚେଙ୍ଗାପ୍ପା-ବରୁଣ ଠାକୁର ଯୋଡ଼ି ଟୋକିଓ ଟିକେଟ ହାସଲ କରିଛନ୍ତି। ବୁଧବାର ପ୍ରଥମ ଭାରତୀୟ ମହିଳା ସେଲରଭାବେ ନେଥ୍ରା କୁମାନନ ଅଲିମ୍ପିକ୍ସ ଯୋଗ୍ୟତା ପାଇଥିଲେ। ପ୍ରଥମଥରପାଇଁ ଭାରତ ଅଲିମ୍ପିକ୍ସରେ ୩ଟି ସେଲିଂ ଇଭେଣ୍ଟରେ ଭାଗନେବ। ପୂର୍ବରୁ ଅଲିମ୍ପିକ୍ସରେ ଭାରତ ଗୋଟିଏ ଇଭେଣ୍ଟରେ ଭାଗ ନେଇଆସୁଥିଲା। ୪ ଥର ଯାକ ୨ ଜଣ ସେଲର ଭାରତ ପକ୍ଷରୁ ପ୍ରତିନିଧିତ୍ୱ କରିଥିଲେ। ”ଭାରତୀୟ ସେଲିଂ ଇତିହାସରେ ଏଥର ନୂଆ ଫର୍ଦ୍ଦ ଯୋଗ ହୋଇଛି। ୪ ସେଲର ୩ ଇଭେଣ୍ଟରେ ଅଂଶଗ୍ରହଣ କରିବେ। ଅଲିମ୍ପିକ୍ସରେ ଭାରତ ପାଇଁ ଏହା ସର୍ବାଧିକ ପ୍ରତିଯୋଗୀ ଏବଂ ଇଭେଣ୍ଟ“ ବୋଲି ୟାଚିଂ ଆସୋସିଏଶନ ଅଫ୍ ଇଣ୍ଡିଆର ଯୁଗ୍ମ ସମ୍ପାଦକ କ୍ୟାପଟେନ ଜିତେନ୍ଦ୍ର ଦୀକ୍ଷିତ ପ୍ରକାଶ କରିଛନ୍ତି। ବର୍ଷବର୍ଷ ଧରି କଠିନ ପରିଶ୍ରମର ଏହା ଫଳ ବୋଲି ଭାରତୀୟ ସେଲିଂ କୋଚ୍ ଟୋମାଜ ଜାନୁଜେସ୍କି କହିଛନ୍ତି। ପୂର୍ବରୁ ଭାରତର ଫାରୁଖ ତାରାପୋରେ-ଧ୍ରୁବ ଭଣ୍ଡାରୀ ୧୯୮୪, ତାରାପୋରେ-କେଲି ରାଓ ୧୯୮୮, ତାରାପୋରେ-ସାଇରସ କାମା ୧୯୯୨ ଏବଂ ମାଲଭ ଶ୍ରଫ-ସୁମିତ ପଟେଲ ୨୦୦୪ ଅଲିମ୍ପିକ୍ସରେ ଅଂଶଗ୍ରହଣ କରିଥିଲେ।
