ଗୁଆହାଟି,୧୦।୧: ନିଜ କ୍ୟାରିୟରର ୪୫ତମ ଶତକ ମାରିଛନ୍ତି ଭାରତୀୟ ବ୍ୟାଟ୍ସମ୍ୟାନ୍ ବିରାଟ କୋହଲି। ଶ୍ରୀଲଙ୍କା ବିପକ୍ଷରେ ମଙ୍ଗଳବାର ଖେଳାଯାଉଥିବା ମ୍ୟାଚ୍ରେ ସେ ବିସ୍ଫୋରକ ବ୍ୟାଟିଂ କରି ୮୭ ବଲ୍ରେ ୧୧୩ ରନ୍ର ଇନିଂସ ଖେଳିଛନ୍ତି। ତେବେ ଏହା ଶ୍ରୀଲଙ୍କା ବିପକ୍ଷରେ କୋହଲିଙ୍କ ୧୦ମ ଶତକ ହୋଇଥିବା ବେଳେ ଘରୋଇ ମଇଦାନରେ ଏହା ୨୦ତମ ଦିନିକିଆ ଶତକ। ଏହି ଶତକ ସହ ସେ ମହାନ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ରେକର୍ଡର ନିକଟତର ହୋଇଛନ୍ତି। ସଚିନ ୪୬୩ ମ୍ୟାଚ୍ରେ ୪୯ ଶତକ ମାରିଥିବା ବେଳେ କୋହଲି ମାତ୍ର ୨୬୬ ମ୍ୟାଚ୍ରେ ୪୫ତମ ଶତକ ମାରିସାରିଲେଣି। ଏଣୁ ଆଉ ମାତ୍ର ୫ ଦିନିକିଆ ଶତକ ପରେ ସେ ବିଶ୍ୱ କ୍ରିକେଟ ଇତିହାସରେ ରେକର୍ଡ କରିବା ସ୍ପଷ୍ଟ ହୋଇଛି।
ପ୍ରକାଶ ଯେ, ଭାରତ ବିପକ୍ଷରେ ଶ୍ରୀଲଙ୍କା ଟିମ୍ର ଦିନିକିଆ ରେକର୍ଡ ବହୁତ ଖରାପ। ଉଭୟ ଟିମ୍ ମଧ୍ୟରେ ଏଯାବତ ୧୯ ଦ୍ୱିପକ୍ଷୀୟ ଦିନିକିଆ ସିରିଜ ଖେଳାଯାଇଛି। ସେଥିରୁ ଭାରତୀୟ ଟିମ୍ ୧୪ ଏବଂ ଶ୍ରୀଲଙ୍କା କେବଳ ୨ ସିରିଜରେ ବିଜେତା ହୋଇଛି। ସେହିଭଳି ୩ ସିରିଜ ଡ୍ର ରହିଛି। ୧୯୯୭ରୁ ଶ୍ରୀଲଙ୍କା ଟିମ୍ ଭାରତକୁ ଦ୍ୱିପକ୍ଷୀୟ ଦିନିକିଆ ସିରିଜରେ ପରାଜିତ କରିପାରିନାହିଁ। ଏଣୁ ଏହି ସିରିଜ ଦଳ ଲାଗି ଅଧିକ ଗୁରୁତ୍ୱ ବହନ କରୁଛି।
