ନୂଆଦିଲ୍ଲୀ,୨୬।୮: ଏସିଆ କପ୍ରେ ପାକିସ୍ତାନ ବିପକ୍ଷରେ ପ୍ରଥମ ମୁକାବିଲା ଖେଳିବ ଭାରତ। ଏହି ମ୍ୟାଚ୍ ପୂର୍ବତନ ଅଧିନାୟକ ତଥା ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କ ପାଇଁ ଐତିହାସିକ। କାରଣ ସେ ନିଜ କ୍ୟାରିୟରର ୧୦୦ତମ ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବେ। ଏପରି କରି ସେ ତିନୋଟି ଫର୍ମାଟରେ ୧୦୦ ଏବଂ ଏଥିରୁ ଅଧିକ ମ୍ୟାଚ୍ ଖେଳିଥିବା ବିଶ୍ୱର ଦ୍ୱିତୀୟ କ୍ରିକେଟର ପାଲଟିବେ। ନ୍ୟୁଜିଲାଣ୍ଡର ପୂର୍ବତନ ମହାନ ବ୍ୟାଟ୍ସମ୍ୟାନ ରସ ଟେଲର ଦୁନିଆର ଏକମାତ୍ର ଖେଳାଳି ଯିଏ ଏହି ଉପଲବ୍ଧି ହାସଲ କରିଛନ୍ତି।
ଏବେ କୋହଲି ତିନୋଟି ଫର୍ମାଟରେ ୧୦୦ ଏବଂ ଏଥିରୁ ଅଧିକ ମ୍ୟାଚ୍ ଖେଳିଥିବା ଭାରତର ପ୍ରଥମ ଖେଳାଳି ପାଲଟିବେ। ଏହି ଟୁର୍ନାମେଣ୍ଟରେ ସେ ଟି୨୦ ଫର୍ମାଟରେ ୧୧୦୦୦ ରନ୍ ପୂରଣ କରିବାର ସୁଯୋଗ ପାଇପାରିବେ। ଏଥିଲାଗି ତାଙ୍କୁ ମାତ୍ର ୩୭୪ ରନ୍ର ଆବଶ୍ୟକତା ରହିଛି। ଦୀର୍ଘ ଏକ ମାସରୁ ଅଧିକ ସମୟ ସମୟ ପରେ କୋହଲି ଅନ୍ତର୍ଜାତୀୟ କ୍ରିକେଟକୁ ଫେରୁଥିବାରୁ ସମସ୍ତଙ୍କ ଦୃଷ୍ଟି ତାଙ୍କ ଉପରେ ରହିଛି।
