ଆଇପିଏଲ ୨୦୨୧ର ୧୪ତମ ସିଜନକୁ ଅର୍ନିଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ଆଇପିଏଲର ସ୍ଥଗିତାଦେଶ ପରେ ଖେଳାଳିମାନେ ନିଜ ନିଜ ଘରକୁ ଫେରୁଛନ୍ତି। ଏହି କ୍ରମରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଅଧିନାୟକ ବିରାଟ କୋହଲି ମଧ୍ୟ ମୁମ୍ବାଇରେ ଥିବା ନିଜ ଘରକୁ ଫେରିଛନ୍ତି। ଏବେ ସେ ତାଙ୍କ ସ୍ତ୍ରୀ ତଥା ଅଭିନେତ୍ରୀ ଅନୁଷ୍କା ଶର୍ମାଙ୍କ ସହ ମିଶି ସଙ୍କଟ ସମୟରେ ଦେଶକୁ ସାହାଯ୍ୟ କରିବେ। ନିକଟରେ ଅନୁଷ୍କା ତାଙ୍କ ଜନ୍ମଦିନରେ ଏକ ବଡ଼ ଘୋଷଣା କରିଥିଲେ। ସୋସିଆଲ ମିଡିଆରେ ଜନ୍ମଦିନର ଶୁଭେଚ୍ଛା ଜଣାଇ ପ୍ରଶଂସକଙ୍କୁ ଧନ୍ୟବାଦ ଜଣାଇ ଏକ ଭିଡିଓ ଶେୟାର କରଥିଲେ। ଭିଡିଓରେ ସେ କହିଥିଲେ ଯେ, ଏହି କଠିନ ସମୟରେ ତାଙ୍କ ଜନ୍ମଦିନ ପାଳନ କରିବା ଉଚିତ୍ ନୁହେଁ। ଭିଡିଓରେ ଅନୁଷ୍କା ମଧ୍ୟ ତାଙ୍କ ପ୍ରଶଂସକମାନଙ୍କୁ ନିବେଦନ କରିଛନ୍ତି ଯେ, ଏହି ସଙ୍କଟରେ ଦେଶକୁ ଏକଜୁଟ ହୋଇ ସମର୍ଥନ କରନ୍ତୁ। ସେ ଏହା ମଧ୍ୟ ପ୍ରକାଶ କରିଛନ୍ତି ଯେ ବିରାଟ କୋହଲି ଏବଂ ସେ ମିଶି ଦେଶ ପାଇଁ କାର୍ଯ୍ୟ କରୁଛନ୍ତି ଏବଂ ସେମାନେ ଖୁବ ଶୀଘ୍ର ଏହା ବିଷୟରେ ସୂଚନା ବାଣ୍ଟିବେ।
ସୂଚନାଯୋଗ୍ୟ,ଆଇପିଏଲର ସ୍ଥଗିତାଦେଶକୁ ସମସ୍ତ ଦଳ ସ୍ବାଗତ କରିଛନ୍ତି। ତେବେ ଯାତ୍ରା ପ୍ରତିବନ୍ଧକ ହେତୁ ବିଦେଶୀ ଖେଳାଳିମାନେ ନିରାପଦରେ ଘରକୁ ଫେରିବା ପାଇଁ ବିସିସିଆଇର ଆଦେଶକୁ ଅପେକ୍ଷା କରିଛନ୍ତି। ଆମେ ସେମାନଙ୍କୁ ଘରକୁ ପଠାଇବା ଆବଶ୍ୟକ ଏବଂ ଆମେ ଏହା କରିବା ପାଇଁ ଏକ ଉପାୟ ଖୋଜିବୁ ବୋଲି ବିସିସିଆଇ ପକ୍ଷରୁ କୁହାଯାଇଛି। ଏବେ ଆଇପିଏଲର ଅବଶିଷ୍ଟ ମ୍ୟାଚ୍ କେବେ, କେଉଁଠାରେ ଏବଂ କିପରି ଖେଳାଯିବ ସେ ସମ୍ବନ୍ଧରେ କୌଣସି ନିଷ୍ପତ୍ତି ନିଆଯାଇ ନାହିଁ। ଏଭଳି ପରିସ୍ଥିତିରେ ଖେଳାଳିମାନେ ମଧ୍ୟ ନିଜ ନିଜ ଘରକୁ ଫେରୁଛନ୍ତି। ଏହି ଏପିସୋଡରେ ଆରସିବି ଅଧିନାୟକ ବିରାଟ କୋହଲି ମଧ୍ୟ ମୁମ୍ବାଇ ଫେରିଛନ୍ତି।
