କୋଲକାତା,୧୧ ।୬: ପ୍ରଫେଟ ମହମ୍ମଦଙ୍କୁ ନେଇ ନୁପୁର ଶର୍ମା ଦେଇଥିବା ଟିପ୍ପଣିକୁ ବିରୋଧ କରି ଏବେ ସାରା ଦେଶରେ ହିଂସା ପରିସ୍ଥିତି ଉପୁଜିଛି । ଭାଜପାରୁ ନିଲମ୍ବିତ ନୁପୁର ଶର୍ମାଙ୍କ ଗିରଫ ଦାବି କରି କିଛି ରାଜ୍ୟରେ ମୁସଲମାନ ସମ୍ପ୍ରଦାୟର ଲୋକେ ରାଜରାସ୍ତାକୁ ଚାଲି ଆସିଛନ୍ତି । ଦିଲ୍ଲୀର ଜାମା ମସଜିଦରେ ବିରୋଧ ପ୍ରଦର୍ଶନ ଦେଖିବାକୁ ମିଳିଥିବା ବେଳେ ରାଜଧାନୀ ରାଞ୍ଚିରେ ସବୁଠାରୁ ଅଧିକ ହିଂସା ଦେଖିବାକୁ ମିଳିଛି । କୋଲମାତା, ମଧ୍ୟ ପ୍ରଦେଶ, ରାଜସ୍ଥାନ ଆଦି ରାଜ୍ୟରେ ବି ହିଂସା ଉପୁଜିଛି ।
ବିରୋଧ ପ୍ରଦର୍ଶନ କରୁଥିବା ଲୋକେ କୋଲକାତାରେ ୨ଟି ଭାଜପା କାର୍ଯ୍ୟାଳୟ ଉପରେ ଆକ୍ରମଣ କରିଛନ୍ତି । ଏହାସହ ପ୍ରଦର୍ଶନକାରୀ ଡୋମଜୁର ଥାନାରେ ଆକ୍ରମଣ କରିବାରୁ ୧୨ ପୋଲିସ ଆହତ ହୋଇଛନ୍ତି । ଏହାପରେ ସେଠାରେ ଜୁନ ୧୩ ପର୍ଯ୍ୟନ୍ତ ଇଣ୍ଟରନେଟ ସେବାକୁ ବନ୍ଦ କରି ଦିଆଯାଇଛି ।
ରାଞ୍ଚିରେ ଶୁକ୍ରବାର ହୋଇଥିବା ହିଂସାରେ ଗୁଳି ବାଜିବାରୁ ୨ ଜଣ ବ୍ୟକ୍ତି ଆହତ ହୋଇଥିଲେ । ହସ୍ପିଟାଲରେ ସେମାନଙ୍କ ଚିକିତ୍ସା ଚାଲିଥିବା ବେଳେ ଉଭୟଙ୍କର ଶନିବାର ମୃତ୍ୟୁ ହୋଇଥିବା ସୂଚନା ମିଳିଛି । ମିଳିଥିବା ସୂଚନା ଅନୁଯାୟୀ ମୃତକ ଜଣେ ହେଲେ ମୁଦସ୍ସିର ଓରଫ କୈଫି ବୋଲି କୁହାଯାଉଛି । ରାଜେନ୍ଦ୍ର ଆର୍ୟୁବିଜ୍ଞାନ ସଂସ୍ଥାନ(ରିମ୍ସ)ରେ ଏମାନଙ୍କ ମୃତ୍ୟୁ ହୋଇଛି । ଅନ୍ୟପଟେ ଆଉ ୮ଜଣ ଆହତଙ୍କ ଚିକିତ୍ସା ଚାଲିଛି ।
ସୂଚନାଯୋଗ୍ୟ, ପ୍ରଫେଟ ମହମ୍ମଦଙ୍କ ବିରୋଧରେ ନୁପୁର ଶର୍ମା ଦେଇଥିବା ଟିପ୍ପଣିକୁ ନେଇ ସାରା ଦେଶରେ ଲୋକେ ରାଜରାସ୍ତାକୁ ଚାଲି ଆସିଛନ୍ତି । ମୁଖ୍ୟ ରାସ୍ତାରେ ମୁସଲମାନ ସମ୍ପ୍ରଦାୟର ଲୋକେ ରାଲି ବାହାର କରି ନୁପୁର ଶର୍ମାଙ୍କ ବିରୋଧରେ ସ୍ଲୋଗାନ ଦେବା ସହ ତାଙ୍କୁ ଗିରଫ କରାଯାଉ ବୋଲି ଦାବି କରିଛନ୍ତି । ଏହାସହ ନୁପୁରଙ୍କ କୁଶପୁତ୍ତଳିକା ଦାହ କରାଯିବା ଓ ଏହା ଧିରେ ଧିରେ ହିଂସାର ରୂପ ନେଇ ସାରା ଦେଶକୁ ବ୍ୟାପିଗଲାଣି କହିଲେ ଚଳେ ।
