ଖଜୁରିପଡ଼ା,୪ା୯(ବିଦୁର ବେହେରା): ଦୀର୍ଘ ଦିନରୁ ଶାଖା କେନାଲ ସମସ୍ୟା ଲାଗି ରହିଥିଲେ ବି ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ ନ କରାଯିବାରୁ ଜମି ଫସଲ ସୁରକ୍ଷା ପାଇଁ ଗ୍ରାମବାସୀ ଅଣ୍ଟା ଭିଡ଼ି କେନାଲ ସଫା କଲେ। ଖଜୁରିପଡ଼ା ବ୍ଲକ ବଲସକୁମ୍ପା ପଞ୍ଚାୟତର ନବଗୁବା ଗ୍ରାମରେ ଶ୍ରାବଣ ମାସର ଲଗାଣ ବର୍ଷାରେ ଚାଷୀମାନେ ଧାନ ଚାଷ କରିଛନ୍ତି। କିନ୍ତୁ ଶାଖା କେନାଲ ମରାମତି ହେଉ ନ ଥିବା ଯୋଗୁ ଚାଷ ଜମିକୁ ପାଣି ପହଞ୍ଚି ପାରୁ ନାହିଁ। ଏ ନେଇ ନବଗୁବା ଗ୍ରାମବାସୀ ଇରିଗେଶନ ବିଭାଗକୁ ଜଣାଇଛନ୍ତି କିନ୍ତୁ ବୈଶାଖ, ଜ୍ୟେଷ୍ଠ ମାସ ବିତି ଯାଇଥିଲେ ସୁଦ୍ଧା କେନାଲ ସଫା କି ମରାମତି କରାଗଲା ନାହିଁ; ଯଦ୍ଦ୍ବାରା ଚାଷ ଉପଯୋଗୀ କେନାଲ ପାଣି ନଦୀରେ ବୋହି ଯାଉଛି। ପିଲା ସାଲୁଙ୍କି ଜଳ ଭଣ୍ଡାର ସଂଲଗ୍ନ ଶାଖା କେନାଲଗୁଡିକ ଦୀର୍ଘଦିନ ହେଲା ସଫେଇ ହେଉ ନ ଥିବାରୁ କେନାଲ ମଝିରେ ଅନାବନା ଗଛ ଉଠିବା ସହିତ ମାଟି ଭରି ହୋଇଯାଇଛି। ପିଲା ସାଲୁଙ୍କି ଜଳ ଭଣ୍ଡାରର ଗଚ୍ଛିତ ଜଳ ସହଜରେ ଚାଷୀର ଚାଷ ଜମିକୁ ଯାଇ ପାରୁ ନ ଥିଲା; ଯାହାକୁ ନେଇ ନବଗୁବାବାସୀ ବିଭାଗୀୟ ଅଧିକାରୀଙ୍କୁ ଅଭିଯୋଗ କଲା ପରେ ମଧ୍ୟ କୌଣସି ସୁଫଳ ମିଳି ପାରି ନ ଥିଲା। ଫଳରେ ନିଜର ଚାଷ ଜମିର ସୁରକ୍ଷା ପାଇଁ ନବଗୁବାର ଶତାଧିକ ଯୁବକ ଏକାଠି ହୋଇ କେନାଲରେ ଜମି ରହିଥିବା ଆବର୍ଜନା ସଫା କରିଛନ୍ତି। ତେଣୁ ପ୍ରଶାସନ ଏଥିପ୍ରତି ଦୃଷ୍ଟିଦେବା ସହ ଏହାର ସ୍ଥାୟୀ ସମାଧାନ କରିବା ପାଇଁ ସେମାନେ ଗୁହାରି କରିଛନ୍ତି।
