ଭୁବନେଶ୍ୱର,୨୧।୨(ସ୍ପୋର୍ଟ୍ସ ବ୍ୟୁରୋ): ଦେଶର ସର୍ବବୃହତ ଘରୋଇ ଦିନିକିଆ ଟୁର୍ନାମେଣ୍ଟ ତଥା ରଣଜୀ ଦିନିକିଆ ଟ୍ରଫି ରୂପେ ଜଣାଶୁଣା ଥିବା ବିଜୟ ହଜାରେ ଟ୍ରଫି ଶନିବାରଠାରୁ ଆରମ୍ଭ ହୋଇଛି। ଏହି ଟୁର୍ନାମେଣ୍ଟରେ ଓଡ଼ିଶା ତା’ର ଅଭିଯାନ ପରାଜୟରୁ ଆରମ୍ଭ କରିଛି। ଶନିବାର ଓଡ଼ିଶା ତା’ର ପ୍ରଥମ ମ୍ୟାଚ୍ରେ କେରଳଠାରୁ ଭିଜେଡି ମେଥଡ୍ରେ ୩୪ ରନରେ ପରାସ୍ତ ହୋଇଛି। ବାଙ୍ଗାଲୋରର ଅଲୁର କ୍ରିକେଟ ଗ୍ରାଉଣ୍ଡରେ ଖେଳାଯାଇଥିବା ବର୍ଷା ବାଧାପ୍ରାପ୍ତ ଏହି ମ୍ୟାଚ୍ରେ ଟସ୍ ଜିତି କେରଳ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ବର୍ଷାଜନିତ ଓଦା ଆଉଟ୍ ଫିଲ୍ଡ ଯୋଗୁ ମ୍ୟାଚ୍ ବିଳମ୍ବରେ ଆରମ୍ଭ ହୋଇଥିଲା। ପ୍ରଥମେ ବ୍ୟାଟିଂ କରି ଓଡ଼ିଶା ୪୫ ଓଭରରେ ୮ ଉଇକେଟ ହରାଇ ୨୫୮ ରନ ସଂଗ୍ରହ କରିଥିଲା। ଜବାବରେ କେରଳ ୩୮.୨ ଓଭରରେ ୪ ଉଇକେଟ ହରାଇ ୨୩୩ ରନ ସଂଗ୍ରହ କରିଥିଲା। ଫଳରେ ଭିଜେଡି ନିୟମରେ କେରଳକୁ ୩୪ ରନରେ ବିଜୟୀ ଘୋଷିତ କରାଯାଇଥିଲା। ଡକ୍ଓ୍ବର୍ଥ- ଲୁଇସ୍ ନିୟମ ଭଳି ବର୍ଷା ବାଧାପ୍ରାପ୍ତ ମ୍ୟାଚ୍ଗୁଡିକରେ ଫଳାଫଳ ହାସଲ ପାଇଁ ଭିଜେଡି ମେଥଡର ବ୍ୟବହାର ହୋଇଥାଏ। ଓଡ଼ିଶା ଏବେ ବେଙ୍ଗାଲୁରୁର ଏମ୍. ଚିନ୍ନାସ୍ବାମୀ ଷ୍ଟାଡିୟମରେ ୨୨ ତାରିଖ ସୋମବାର ତା’ର ଦ୍ୱିତୀୟ ମ୍ୟାଚ୍ ରେଲଓ୍ବେ ବିପକ୍ଷରେ ଖେଳିବ।
କେରଳ ତରଫରୁ ରବିନ ଉଥାପ୍ପା ସର୍ବାଧିକ ୧୦୭ ରନର ଶତକୀୟ ପାଳି ଖେଳିଥିଲେ। ଅଧିନାୟକ ସଚିନ ବେବି ୪୦, ବିଷ୍ଣୁ ବିନୋଦ ୨୮, ଉଇକେଟକିପର ବ୍ୟାଟ୍ସମ୍ୟାନ ସଞ୍ଜୁ ସାମସନ ୪ ରନକରି ଆଉଟ ହୋଇଥିବା ବେଳେ ଭଥସାଲ ଗୋବିନ୍ଦ ୨୯ ଓ ମହମ୍ମଦ ଆଝାରୁଦ୍ଦିନ ୨୩ ରନ କରି ଅପରାଜିତ ରହିଥିଲେ। ବୋଲିଂରେ ଓଡ଼ିଶା ତରଫରୁ ସୌରଭ କାନୋଜ ସର୍ବାଧିକ ୩ ଓ ସୂର୍ଯ୍ୟକାନ୍ତ ପ୍ରଧାନ ଗୋଟିଏ ଉଇକେଟ ଅକ୍ତିଆର କରିଥିଲେ।
ପୂର୍ବରୁ ପ୍ରଥମେ ବ୍ୟାଟିଂ କରିଥିବା ଓଡ଼ିଶା ତରଫରୁ ଓପନର ସନ୍ଦୀପ ପଟ୍ଟନାୟକ ସର୍ବାଧିକ ୬୬ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ସେହିପରି ଓପନର ଗୌରବ ଚୌଧୁରୀ ୫୭ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ଅନ୍ୟମାନଙ୍କ ମଧ୍ୟରେ ଦେବବ୍ରତ ପ୍ରଧାନ ୨୭, ରେଜେଶ ଧୂପର ୨୦, ଅଭିଷେକ ଯାଦବ ୧୩, ଶୁଭ୍ରାଂଶୁ ସେନାପତି ୪, ଅଧିନାୟକ ଶାନ୍ତନ୍ୟୁ ମିଶ୍ର ୭ ଓ ସୂର୍ଯ୍ୟକାନ୍ତ ବିନା ସ୍କୋରରେ ଆଉଟ ହୋଇଥିଲେ। କାର୍ତ୍ତିକ ବିଶ୍ୱାଳ ୪୫ ଓ ସୌରଭ କାନୋଜ ୯ ରନ କରି ଅପରାଜିତ ରହିଥିଲେ। ପ୍ରଥମ ଉଇକେଟରେ ଦୁଇ ଓପନର ସନ୍ଦୀପ ଓ ଗୌରବ ୧୩୪ଟି ବଲ୍ ଖେଳି ୧୧୯ ରନକରି ଦଳକୁ ଭଲ ଆରମ୍ଭ ପ୍ରଦାନ କରିଥିଲେ। ବୋଲିଂରେ କେରଳ ତରଫରୁ ଶ୍ରୀସନ୍ଥ, ଏମ୍.ଡି. ନିଦ୍ଧେଶ ଓ ଜଲାଜ ସାକସେନା ୨ଟି ଲେଖାଏ, ସଚିନ ବେବି ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଓଡ଼ିଶା ୪୫ ଓଭରରେ ୨୫୮/୮
(ସନ୍ଦୀପ- ୬୬, ଗୌରବ- ୫୭, କାର୍ତ୍ତିକ- ୪୫*, ଦେବବ୍ରତ- ୨୭, ଶ୍ରୀସନ୍ଥ- ୨/୪୧, ନିଦ୍ଧେଶ- ୨/୪୩, ସାକସେନା- ୨/ ୪୩)।
କେରଳ ୩୮.୨ ଓଭରରେ ୨୩୩/୪
(ଉଥାପ୍ପା- ୧୦୭, ସଚିନ- ୪୦, ଆଝାରୁଦ୍ଦିନ- ୨୩*, ବିଷ୍ଣୁ- ୨୮, ଗୋବିନ୍ଦ- ୨୯*, ସୌରଭ- ୩/୪୩)।
