ନୂଆଦିଲ୍ଲୀ,୬ା୧୧: ଆର୍. ବୈଶାଳୀ ଏବଂ ଭିଦିତ ଗୁଜରାଠୀ ଫିଡେ ଗ୍ରାଣ୍ଡ୍ ସୁଇସ୍ ଚେସ୍ ପ୍ରତିଯୋଗିତାରେ ଯଥାକ୍ରମେ ମହିଳା ଓ ଓପନ କାଟାଗୋରୀରେ ଚାମ୍ପିୟନ ହୋଇଛନ୍ତି। ବିଶ୍ୱସ୍ତରରେ ସେମାନେ ଭାରତ ପାଇଁ ବିରଳ ଡବଲ ସଫଳତା ଆଣିଦେଇଛନ୍ତି। ଏଥିସହିତ ଦୁହେଁ କ୍ୟାଣ୍ଡିଡେଟ୍ସ ଟୁର୍ନାମେଣ୍ଟ ପାଇଁ ଯୋଗ୍ୟତା ଅର୍ଜନ ମଧ୍ୟ କରିଛନ୍ତି।
ପ୍ରତିଯୋଗିତାର ୧୧ତମ ଓ ଫାଇନାଲ ରାଉଣ୍ଡରେ ବୈଶାଳୀ ମଙ୍ଗୋଲିଆର ବାତ୍ଖୁୟାଗ ମୁଙ୍ଗୁଟୁଲ ସହ ଗେମ୍ ଡ୍ର ରଖିଥିବା ବେଳେ ଭିଦିତ ସର୍ବିୟାର ଆଲେଜାଣ୍ଡର ପ୍ରିଡେକି ଇଭେଣ୍ଟରେ ତାଙ୍କ ୭ମ ବିଜୟ ସହ ଓପନ ବିଭାଗରେ ଶୀର୍ଷ ସ୍ଥାନ ଅଧିକାର କରିନେଇଥିଲେ। ଉଭୟ ବୈଶାଳୀ ଓ ଭିଦିତ ୮.୫ ପଏଣ୍ଟ ଲେଖାଏ ଅର୍ଜନ କରିଥିଲେ ଏବଂ ସେମାନଙ୍କ ନିକଟତମ ପ୍ରତିଦ୍ୱନ୍ଦ୍ୱୀଙ୍କଠାରୁ ଅଧା ପଏଣ୍ଟ ଆଗରେ ରହିଥିଲେ। ଆସନ୍ତାବର୍ଷ ଏପ୍ରିଲରେ କାନାଡାରେ ଖେଳାଯିବାକୁ ଥିବା କ୍ୟାଣ୍ଡିଡେଟ୍ସ ଟୁର୍ନାମେଣ୍ଟ ଲାଗି ଯୋଗ୍ୟତା ଅର୍ଜନ ସହ ବୈଶାଳୀ ୨୫,୦୦୦ ଆମେରିକୀୟ ଡଲାର (୨୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ) ଆର୍ଥିକ ପୁରସ୍କାର ଲାଭ କରିଛନ୍ତି। ଅନ୍ୟପକ୍ଷରେ ଭିଦିତ ୮୦,୦୦୦ ଡଲାର (୬୬ ଲକ୍ଷ ଟଙ୍କାରୁ ଅଧିକ) ପୁରସ୍କାର ଲାଭ କରିଛନ୍ତି।
