ନୂଆଦିଲ୍ଲୀ,୧୨।୨: ପାକିସ୍ତାନରେ ଚାଲିଥିବା ତ୍ରି-ସିରିଜର ତୃତୀୟ ମ୍ୟାଚ୍ରେ କିଛି ଏପରି ଦୃଶ୍ୟ ଦେଖିବାକୁ ମିଳିଛି, ଯାହା ସାରା ବିଶ୍ୱର କ୍ରିକେଟପ୍ରେମୀଙ୍କୁ ଚକିତ କରିଛି। ପାକିସ୍ତାନର ଦ୍ରୁତ ବୋଲର ଶାହିନ ଆଫ୍ରିଦି ଦକ୍ଷିଣ ଆଫ୍ରିକାର ଯୁବ ବ୍ୟାଟ୍ସମ୍ୟାନ ମାଥ୍ୟୁ ବ୍ରିଟ୍ଜେକେଙ୍କ ସହ ଖୋଲାଖୋଲି ଝଗଡ଼ା କରିଛନ୍ତି। ଆଫ୍ରିଦିଙ୍କ ଏହି ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେଉଛି। ଏହି ଭିଡିଓରେ, ଶାହିନ ଆଫ୍ରିଦି ପ୍ରଥମେ ଏହି ଯୁବ ବ୍ୟାଟ୍ସମ୍ୟାନଙ୍କ ସହ ଯୁକ୍ତିତର୍କ କରୁଥିବା ଏବଂ ପରେ ରନ୍ ନେବା ସମୟରେ ତାଙ୍କୁ ହଇରାଣ କରୁଥିବା ଦେଖାଯାଉଛି। ଏପରିକି ଘଟଣାକୁ ନେଇ ମଇଦାନରେ ଦୁଇ ଖେଳାଳିଙ୍କ ମଧ୍ୟରେ ବହୁତ ଉତ୍ତେଜନା ଦେଖାଯାଇଥିଲା। ପରିସ୍ଥିତି ଏପରି ହୋଇଥିଲା ଯେ ଯେକୌଣସି ମୁହୂର୍ତ୍ତରେ ହାତାହାତି ହୋଇଯିବା ଭଳି ମନେ ହୋଇଥିଲା। କିନ୍ତୁ ଅନ୍ୟ ଖେଳାଳି ଏବଂ ଅମ୍ପାୟାର ହସ୍ତକ୍ଷେପ କରିବା ପରେ ମାମଲା ଥଣ୍ଡା ପଡ଼ିଥିଲା। ଆସନ୍ତୁ ଜାଣିବା ପୂରା ଘଟଣାକ୍ରମ।
ଆଫ୍ରିଦି ଏବଂ ମାଥ୍ୟୁ ବ୍ରିଟ୍ଜେକେଙ୍କ ମଧ୍ୟରେ ଲଢ଼େଇ ୨୮ତମ ଓଭରରେ ହୋଇଥିଲା। ଶାହିନ ଆଫ୍ରିଦିଙ୍କ ପଞ୍ଚମ ବଲ୍ରେ ମାଥ୍ୟୁଙ୍କୁ ମିଡ-ଅନ୍ ଅଞ୍ଚଳରେ ଏକ ସଟ୍ ଖେଳିଥିଲେ। ଏହା ପରେ ଆଫ୍ରିଦି ମାଥ୍ୟୁଙ୍କୁ କିଛି କହିଥିଲେ। ଶାହିନ ବ୍ୟାଟ୍ସମ୍ୟାନଙ୍କ ଉପରେ ରାଗିଥିଲେ କାରଣ ସେ ଥରେ କିମ୍ବା ଦୁଇଥର ପିଚ୍ ମଝି ଆଡ଼କୁ ଦୌଡ଼ିଥିଲେ। ଅସନ୍ତୁଷ୍ଟ ହୋଇ ଆଫ୍ରିଦି ତାଙ୍କୁ କିଛି କହିବା ସହ ଆଖି ଦେଖାଇଥିଲେ। ଏହାର ଉତ୍ତର ଦେଲେ ମାଥ୍ୟୁ। ଏହା ପରେ ପରବର୍ତ୍ତୀ ବଲରେ ମାଥ୍ୟୁ ଏକ ରନ୍ ନେଇଥିଲେ। ସେ ଦୌଡ଼ୁଥିବା ସମୟରେ ଆଫ୍ରିଦି ତାଙ୍କ ମଝିରେ ଆସିଯାଇଥିଲେ। ମାମଲା ଗମ୍ଭୀର ହେଉଥିବା ଦେଖି ଅମ୍ପାୟାରଙ୍କୁ ହସ୍ତକ୍ଷେପ କରିବାକୁ ପଡିଥିଲା। କେବଳ ସେତିକି ନୁହେଁ ପରିସ୍ଥିତିକୁ ଶାନ୍ତ କରିବା ପାଇଁ ଦକ୍ଷିଣ ଆଫ୍ରିକାର ଅଧିନାୟକ ଟେମ୍ବା ବାଭୁମା ଏବଂ ମହମ୍ମଦ ରିଜୱାନଙ୍କୁ କଥାବାର୍ତ୍ତା କରିବାକୁ ପଡିଥିଲା।
It’s getting all heated out there! 🥵
Shaheen Afridi did not take kindly to Matthew Breetzke’s reaction, leading to an altercation in the middle! 🔥#TriNationSeriesOnFanCode pic.twitter.com/J2SutoEZQs
— FanCode (@FanCode) February 12, 2025
ତେବେ ଶାହିନ ଆଫ୍ରିଦି ଏଠାରେ ତାଙ୍କର ସୀମା ଲଙ୍ଘନ କରିଥିଲେ କାରଣ ଯଦି ତାଙ୍କର ମାଥ୍ୟୁଙ୍କ ସହିତ କୌଣସି ସମସ୍ୟା ଥିଲା, ସେ ଅମ୍ପାୟାରଙ୍କ ନିକଟରେ ଅଭିଯୋଗ କରିପାରିଥାଆନ୍ତେ। କିନ୍ତୁ ସେ ପ୍ରଥମେ ଯୁକ୍ତିତର୍କ କରିଥିଲେ ଏବଂ ତା’ପରେ ସେ ରନ୍ ନେବା ସମୟରେ ତାଙ୍କୁ ହଇରାଣ କରିଥିଲେ। ଏହା ପ୍ରତ୍ୟେକ କ୍ଷେତ୍ରରେ କ୍ରୀଡ଼ା ମନୋଭାବର ବିରୁଦ୍ଧ। ପାକିସ୍ତାନୀ ଖେଳାଳି କାମରାନ ଗୁଲାମ ମଧ୍ୟ ସମାନ କାରନାମା କରିଥିଲେ, ଯିଏ ଟେମ୍ବା ବାଭୁମା ରନ୍ ଆଉଟ ହେବା ପରେ ତାଙ୍କ ସମ୍ମୁଖରେ ଆକ୍ରମଣାତ୍ମକ ଭାବରେ ଉତ୍ସବ ପାଳନ କରିଥିଲେ। ସେ ତାଙ୍କ ମଝିକୁ ଆସି ଉତ୍ସବ ପାଳନ କରୁଥିବାର ଦେଖାଯାଇଥିଲା। ଟେମ୍ବା ବାଭୁମା ଏବଂ ମାଥ୍ୟୁ ଉଭୟ ପାକିସ୍ତାନ ବିପକ୍ଷରେ ଉତ୍କୃଷ୍ଟ ଇନିଂସ ଖେଳିଥିଲେ। ବାଭୁମା ୮୨ ଏବଂ ମାଥ୍ୟୁ ୮୩ ରନ କରିଥିଲେ।
