ନୂଆଦିଲ୍ଲୀ, ୨୪।୯ : ଭାରତ-ତିବ୍ଦତୀୟ ସୀମା ପୋଲିସର ପର୍ବତାରୋହୀମାନେ ଇତିହାସ ସୃଷ୍ଟି କରିଛନ୍ତି। ଆଇଟିବିପି ଯବାନମାନେ ସଫଳତାର ସହିତ ଉତ୍ତର ସିକିମରେ ଅବସ୍ଥିତ ମାଉଣ୍ଟ ଡୋମ ଖାଙ୍ଗ ଉପରେ ବିଜୟ ହାସଲ କରିଛନ୍ତି। ଯବାନମାନେ ସେଠାରେ ଭାରତୀୟ ଜାତୀୟ ପତାକା ତ୍ରିରଙ୍ଗା ଉତ୍ତୋଳନ କରିଛନ୍ତି। ମାଉଣ୍ଟ ଡୋମ ଖାଙ୍ଗ ସମୁଦ୍ର ପତ୍ତନଠାରୁ ୭,୨୫୦ ମିଟର ଅର୍ଥାତ୍ ୨୩,୭୮୬ ଫୁଟ ଉଚ୍ଚରେ ଅବସ୍ଥିତ । ଏହି ସଫଳତା ସମ୍ପର୍କରେ ଆଇଟିବିପି ପକ୍ଷରୁ ସୂଚନା ପ୍ରଦାନ କରାଯାଇଛି ।
ଏହାର ଅଫିସିଆଲ ଟୁଇଟର ହ୍ୟାଣ୍ଡେଲରେ ଆଇଟିବିପି ଶନିବାର କହିଛି, ଶୀର୍ଷ ପର୍ବତାରୋହୀଙ୍କ ଦୁଇଟି ଦଳ ସଫଳତାର ସହ ଦେଶର ସର୍ବୋଚ୍ଚ ମାଉଣ୍ଟ ଡୋମ ଖାଙ୍ଗକୁ ସେପ୍ଟେମ୍ବର ୨୨ ଏବଂ ୨୩ ରେ ସଫଳତାର ସହ ଆରୋହଣ କରିଛନ୍ତି। ଆଇଟିବିପି ମୁଖପାତ୍ର ବିବେକ କୁମାର ପାଣ୍ଡେ କହିଛନ୍ତି ଯେ ଆଇଏମଏଫ ରେକର୍ଡ ଅନୁଯାୟୀ, ଏହି ଶିଖରକୁ ଆଇଟିବି ଯବାନଙ୍କ ଦଳ ପ୍ରଥମେ ଆରୋହଣ କରିଛନ୍ତି। ଆଇଟିବିପି ଯବାନମାନେ ମଧ୍ୟ ଏହି ପର୍ବତ ଆରୋହଣ କରି ଭବିଷ୍ୟତ ମିଶନ ପାଇଁ ରାସ୍ତା ଖୋଲିଛନ୍ତି।
ଲଗାତାର ଦୁଇ ଦିନ ମଧ୍ୟରେ ଦୁଇଟି ଆଇଟିବିପି ଯବାନଙ୍କ ଦଳ ଏହି ପର୍ବତ ଶିଖରକୁ ଚଢ଼ିଛନ୍ତି। ପ୍ରଥମ ଦଳ, ଯାହାକୁ ରୋପ ୱାନ କୁହାଯାଉଛି, ଡେପୁଟି କମାଣ୍ଡାଣ୍ଟ ଅନୁପ କୁମାରଙ୍କ ନେତୃତ୍ୱରେ ଏବଂ ରୋପ-୨ କମାଣ୍ଡାଣ୍ଟ ରତନ ସିଂ ସୋନାଲଙ୍କ ନେତୃତ୍ୱରେ ଆରୋହଣ କରିଛନ୍ତି। ଉଭୟ ଦଳରେ ଜଣେ ମହିଳାଙ୍କ ସମେତ ମୋଟ ୧୩ ଜଣ ଯବାନ ସାମିଲ ହୋଇଥିଲେ।
