ନୂଆଦିଲ୍ଲୀ,୧୩।୧୦: କଂଗ୍ରେସ ସାଂସଦ ତଥା ଲୋକ ସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ସୋମବାର ସୁପ୍ରିମକୋର୍ଟ ପର୍ଯ୍ୟନ୍ତ ଏକ ମାର୍ଚ୍ଚ କରିଥିଲେ। ଏହି ମାର୍ଚ୍ଚରେ ଇଣ୍ଡିଆ ମେଣ୍ଟର ଅନେକ ନେତା ସାମିଲ ହୋଇଥିଲେ। ଏହି ସମୟରେ ରାହୁଲ ଗାନ୍ଧୀ ଜଣେ ମହିଳା ସାମ୍ବାଦିକାଙ୍କୁ ଧକ୍କା ଦେଇଥିବା ଅଭିଯୋଗ ହୋଇଛି। ଦିଲ୍ଲୀ ଭାଜପାର ପ୍ରଦେଶ ଉପାଧ୍ୟକ୍ଷ ରାଜେଶ ଭାଟିଆ ଏହି ଅଭିଯୋଗ ଆଣିଛନ୍ତି।
ରାଜେଶ ଭାଟିଆ କହିଛନ୍ତି, ରାଜେନ୍ଦ୍ର ନଗର କାର୍ଯ୍ୟାଳୟ ନିକଟରେ ରାତି ପ୍ରାୟ ୮ଟା କିମ୍ବା ସାଢ଼େ ୮ଟା ବେଳେ ଜଣେ ଯୁବତୀ ମୋ ପାଖକୁ ଆସିଥିଲେ। ସେ ମୋତେ ଅନୁରୋଧ କରି କହିଥିଲେ ଯେ ତାଙ୍କ ଭଉଣୀ ଜଣେ ସାମ୍ବାଦିକା ଏବଂ ତାଙ୍କୁ ରାହୁଲ ଗାନ୍ଧୀ ଧକ୍କା ଦେଇଛନ୍ତି। ସେ ଗର୍ଭବତୀ ଥିଲେ ଏବଂ ତାଙ୍କୁ ଆଘାତ ଲାଗିଛି। ତାଙ୍କର ଚିକିତ୍ସା ଆବଶ୍ୟକ। ତେଣୁ ସେ ସାହାଯ୍ୟ ମାଗିଥିଲେ।
ଭାଜପା ନେତା ଆହୁରି କହିଛନ୍ତି, ମୁଁ ସେହି ସମୟରେ ଆମ ବିଧାୟକ ଉମଙ୍ଗ ବଜାଜ ଏବଂ ସ୍ଥାନୀୟ ନେତା ପ୍ରତୀକ ଶର୍ମାଙ୍କୁ ଫୋନ କରିଥିଲି। ଆମେ ତୁରନ୍ତ ହସ୍ପିଟାଲରେ ପହଞ୍ଚିଥିଲୁ। ସେହି ମହିଳା ତାଙ୍କ ସ୍ବାମୀଙ୍କ ସହ ଆସିଥିଲେ। ଆମେ ତାଙ୍କୁ ପ୍ରାଥମିକ ଚିକିତ୍ସା ଯୋଗାଇବା ସହ ଡାକ୍ତରଙ୍କ ସହ କଥା ହୋଇଥିଲୁ।
ପ୍ରଦେଶ ଉପାଧ୍ୟକ୍ଷ କହିଛନ୍ତି , ଡାକ୍ତରମାନେ ଗର୍ଭଧାରଣ ସମ୍ପର୍କିତ କିଛି ସମସ୍ୟା ଥିବା କହିଥିଲେ ଏବଂ ମହିଳାଙ୍କୁ ହସ୍ପିଟାଲରେ ଭର୍ତ୍ତି କରିବା ଆବଶ୍ୟକ ବୋଲି ଜଣାଇଥିଲେ। ଏହାପରେ ତାଙ୍କର ଏକ୍ସ-ରେ, ଅଲ୍ଟ୍ରାସାଉଣ୍ଡ ଓ ଅନ୍ୟାନ୍ୟ ଚିକିତ୍ସା କରାଯାଇ ଏକ କୋଠରିକୁ ସ୍ଥାନାନ୍ତର କରାଯାଇଥିଲା।
ରାଜେଶ ଭାଟିଆଙ୍କ କହିବା ଅନୁସାରେ, ମହିଳା ଜଣକ ଡାକ୍ତରଙ୍କ ନିରୀକ୍ଷଣରେ ଅଛନ୍ତି। ବରିଷ୍ଠ ଡାକ୍ତରମାନେ ଆସି ତାଙ୍କର ଅନ୍ୟାନ୍ୟ ପରୀକ୍ଷା କରିବେ ଏବଂ ପରବର୍ତ୍ତୀ ଚିକିତ୍ସା ଜାରି ରହିବ।
ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିକୁ ନେଇ ଇଣ୍ଡିଆ ମେଣ୍ଟର ଆନ୍ଦୋଳନ ଜାରି ରହିଛି। ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ସୋମବାର ଇଣ୍ଡିଆ ମେଣ୍ଟର ନେତାମାନେ ବାରାଖମ୍ବା ରୋଡରୁ ସୁପ୍ରିମକୋର୍ଟ ପର୍ଯ୍ୟନ୍ତ ମାର୍ଚ୍ଚ କରିଥିଲେ।
ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ପ୍ରସଙ୍ଗ ଏବଂ ସ୍ପେଶାଲ ଇଣ୍ଟେନସିଭ ରିଭିଜନ (SIR) ସହ ଜଡ଼ିତ ଅଭିଯୋଗକୁ ନେଇ ସୁପ୍ରିମକୋର୍ଟରେ ଆବେଦନ ଦାଖଲ କରିବେ ବୋଲି ଇଣ୍ଡିଆ ମେଣ୍ଟ ଘୋଷଣା କରିଥିଲା।
ଏହି ମାମଲାରେ ରାହୁଲ ଗାନ୍ଧୀଙ୍କ ପକ୍ଷରୁ ସୁପ୍ରିମକୋର୍ଟରେ ଆବେଦନ ଦାଖଲ କରାଯାଇଛି। ଏହି ମାର୍ଚ୍ଚରେ ରାହୁଲ ଗାନ୍ଧୀଙ୍କ ସହ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ, ବିହାର ବିଧାନସଭାରେ ବିରୋଧୀ ଦଳ ନେତା ତେଜସ୍ବୀଯାଦବ, ତେଲଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ, କର୍ନାଟକ ଉପମୁଖ୍ୟମନ୍ତ୍ରୀ ଡି. କେ. ଶିବକୁମାରଙ୍କ ସମେତ ବିଭିନ୍ନ ରାଜ୍ୟର ଅନେକ ପୂର୍ବତନ ମୁଖ୍ୟମନ୍ତ୍ରୀ ମଧ୍ୟ ଉପସ୍ଥିତ ଥିଲେ।
