ଭୁବନେଶ୍ୱର, ୭।୭: ରାଜ୍ୟରେ ସଡ଼କ ଦୁର୍ଘଟଣା ହ୍ରାସ କରିବା ଏବଂ ସଡ଼କ ସୁରକ୍ଷାକୁ ସୁଦୃଢ଼ କରିବା ପାଇଁ ରାଜ୍ୟ ପରିବହନ ପ୍ରାଧିକରଣ (STA) କଠୋର ଆଭିମୁଖ୍ୟ ଗ୍ରହଣ କରିଛି। ଏଣିକି ଫିଟନେସ୍ ସାର୍ଟିଫିକେଟ୍, ବୈଧ ବୀମା କିମ୍ବା ପରମିଟ୍ ନ ଥାଇ ଗାଡ଼ି ଚଳାଚଳ କଲେ କେବଳ ଜରିମାନା ନୁହେଁ, ଗାଡ଼ିକୁ ମଧ୍ୟ ଜବତ କରାଯିବ। ଏ ନେଇ STA ପକ୍ଷରୁ ସମସ୍ତ ପରିବହନ ଅଧିକାରୀଙ୍କୁ ସର୍କୁଲାର ଜାରି କରାଯାଇଛି।
ସର୍କୁଲାରରେ କୁହାଯାଇଛି ଯେ, ଯେଉଁ ଯାନବାହନଗୁଡ଼ିକ ବାରମ୍ବାର ମୋଟର ଯାନ ଆଇନ ଉଲ୍ଲଙ୍ଘନ କରୁଛନ୍ତି କିମ୍ବା ଫିଟନେସ୍, ବୀମା ଓ ପରମିଟ୍ ଭଳି ଆବଶ୍ୟକ କାଗଜପତ୍ର ବିନା ଚଳାଚଳ କରୁଛନ୍ତି, ସେଗୁଡ଼ିକ ବିରୋଧରେ କଡ଼ା ଆଇନଗତ ପଦକ୍ଷେପ ନିଆଯିବ। ଏପରି ଗାଡ଼ିଗୁଡ଼ିକୁ ଜବତ କରିବା ସହ ପ୍ରଚଳିତ ଆଇନ ଅନୁଯାୟୀ ମାମଲା ରୁଜୁ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
STA ପକ୍ଷରୁ ସମସ୍ତ ଆଞ୍ଚଳିକ ପରିବହନ ଅଧିକାରୀ (RTO), ସହକାରୀ RTO ଏବଂ ମୋଟର ଯାନ ନିରୀକ୍ଷକମାନଙ୍କୁ ଯାଞ୍ଚ ପ୍ରକ୍ରିୟାକୁ ଅଧିକ କଡ଼ାକଡ଼ି କରିବାକୁ କୁହାଯାଇଛି। ଯେଉଁ ଅଧିକାରୀମାନେ ସର୍କୁଲାରରେ ଉଲ୍ଲେଖିତ ନିର୍ଦ୍ଦେଶ ପାଳନରେ ଅବହେଳା କରିବେ, ସେମାନଙ୍କ ବିରୋଧରେ ମଧ୍ୟ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବ ବୋଲି ସ୍ପଷ୍ଟ ଚେତାବନୀ ଦିଆଯାଇଛି।
ରାଜ୍ୟ ସରକାରଙ୍କ ମତରେ, ଅଯୋଗ୍ୟ ଓ ନିୟମବହିର୍ଭୂତ ଯାନବାହନ ସଡ଼କ ଦୁର୍ଘଟଣାର ଏକ ପ୍ରମୁଖ କାରଣ। ସେଥିପାଇଁ ଏଭଳି ଗାଡ଼ି ଉପରେ କଡ଼ା ନଜର ରଖି ସଡ଼କରେ ସେମାନଙ୍କ ଚଳାଚଳକୁ ରୋକିବାକୁ STA ଗୁରୁତ୍ୱ ଦେଇଛି। ଯାନମାଲିକମାନଙ୍କୁ ସମସ୍ତ ଆବଶ୍ୟକ କାଗଜପତ୍ର ସମୟମଧ୍ୟରେ ନବୀକରଣ କରି ନିୟମ ଅନୁଯାୟୀ ଗାଡ଼ି ଚଳାଇବାକୁ ମଧ୍ୟ ପରାମର୍ଶ ଦିଆଯାଇଛି।
