ନୂଆଦିଲ୍ଲୀ, ୧୫।୧୨: ଦେଶରେ କରୋନା ମହାମାରୀ ଯୋଗୁ ଆତଙ୍କ ସୃଷ୍ଟି ହୋଇଛି। ଅପରପକ୍ଷରେ ନୂଆ ଭାରିଆଣ୍ଟର ସଂକ୍ରମଣ ବଢ଼ିଚାଲିଛି। ଏପରିସ୍ଥଳେ ସର୍ବାଧିକ ଟିକାକରଣ ଉପରେ ଧ୍ୟାନ ଦିଆଯାଉଛି। ଅପରପକ୍ଷରେ, ନୀତି ଆୟୋଗର ସଦସ୍ୟ ଡ.ଭି.କେ ପଲଙ୍କ ବିବୃତ୍ତି ନେଇ ଅଜଣା ବିପଦର ଆଶଙ୍କା କରାଯାଉଛି।
ପଲ କହିଛନ୍ତି ଯେ ପରିବର୍ତ୍ତିତ ପରିସ୍ଥିତିରେ ବର୍ତ୍ତମାନର କରୋନା ଟିକା ପ୍ରଭାବହୀନ ହେବାର ଆଶଙ୍କା ରହିଛି। ତେଣୁ କରୋନାର ନଆ ଭାରିଆଣ୍ଟ ବିରୋଧରେ ଲଢ଼େଇ ପାଇଁ ସଭିଏଁ ଏକଜୁଟ ହେବା ଆବଶ୍ୟକ। ଏହା ସହିତ ନୂଆ ଟିକାପ୍ରସ୍ତୁତି ଉପରେ ସେ ଗୁରୁତ୍ୱାରୋପ କରିଛନ୍ତି। ଇଣ୍ଡିଆ ଟୁଡେ ଖବର ଅନୁଯାୟୀ, ପଲ କହିଛନ୍ତି ଯେ ବର୍ତ୍ତମାନ ଟିକା କିପରି ବିଶ୍ୱସ୍ତରରେ ପହଞ୍ଚିବା ଏବଂ କେହି ଯେପରି ଏକ୍ଷେତ୍ରରେ ପଛରେ ନ ପଡ଼ିଯାଆନ୍ତି ତାହା ନିଶ୍ଚିତ କରିବା ହେଉଛି ପ୍ରାଥମିକତା।
ମହାମାରୀର ମୁକାବିଲା ପାଇଁ ବିଜ୍ଞାନରେ ବିନିଯୋଗ ଉପରେ ମଧ୍ୟ ଗୁରୁତ୍ୱାରୋପ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ପାଲ ସିଆଇଆଇ ପାର୍ଟନରଶିପ୍ ସମ୍ମିଳନୀରେ ଯୋଗଦେଇ ଏଭଳି କହିଛନ୍ତି।
ଭାରତରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ଇତିମଧ୍ୟରେ ୬୧କୁ ବୃଦ୍ଧି ପାଇଛି। ଏଥି ସହିତ, ଏହା ବ୍ରିଟେନରେ ମଧ୍ୟ ଦ୍ରୁତ ଗତିରେ ବ୍ୟାପୁଛି। ବ୍ରିଟେନରେ ଚଳିତ ବର୍ଷ ଜାନୁଆରୀ ପରେ ଏବେ ସର୍ବାଧିକ କୋଭିଡ ଆକ୍ରାନ୍ତ ସଂଖ୍ୟାକୁ ରେକର୍ଡ କରିଛି।
କେବଳ ବ୍ରିଟେନରେ, ଓମିକ୍ରନ ଭାରିଆଣ୍ଟର ୫ ହଜାର ଆକ୍ରାନ୍ତଙ୍କୁ ଚିହ୍ନଟ କରାଯାଇଛି।
