ଭୁବନେଶ୍ୱର,୨୮ା୧୧(ବ୍ୟୁରୋ): ଉତ୍କଳ ବିଶ୍ୱବିଦ୍ୟାଳୟ ଶିକ୍ଷା ଓ ଗବେଷଣା କ୍ଷେତ୍ରରେ ଉତ୍କର୍ଷର ଶିଖରରେ ପହଞ୍ଚତ୍ବ। ଶୁକ୍ରବାର ଉତ୍କଳ ବିଶ୍ୱବିଦ୍ୟାଳୟର ୭୮ତମ ପ୍ରତିଷ୍ଠା ଦିବସ ପାଳନ ଅବସରରେ ନବନିଯୁକ୍ତ କୁଳପତି ପ୍ରଫେସର ସବିତା ଆଚାର୍ଯ୍ୟ ଏହା କହିଛନ୍ତି। ବିଶ୍ୱବିଦ୍ୟାଳୟର ସମସ୍ତ କର୍ମଚାରୀ, ଶିକ୍ଷକ ଓ ଛାତ୍ରୀଛାତ୍ରଙ୍କୁ ସମ୍ବୋଧିତ କରି ସେ କହିଲେ, ଆସନ୍ତୁ ଉତ୍କଳକୁ ଏକ ଉତ୍କୃଷ୍ଟତର ଅନୁଷ୍ଠାନ ଭାବେ ଗଢିବାକୁ ଶପଥ ନେବା। ଏହାର ନିରନ୍ତର ବିକାଶ ପାଇଁ କାର୍ଯ୍ୟ ଜାରି ରଖିବା। ଏହି ଲକ୍ଷ୍ୟ ସାଧନ ନିମନ୍ତେ ସେ ସମସ୍ତଙ୍କ ସହଯୋଗ ଲୋଡିଛନ୍ତି। ଏଥିସହ ଡିଜିଟାଲ ଭିତ୍ତିଭୂମିର ସମ୍ପ୍ରସାରଣ, ଶିକ୍ଷାଦାନ ଓ ଶିକ୍ଷଣ ପାଇଁ ଉନ୍ନତ ଉପକରଣ ଏବଂ କ୍ୟାମ୍ପସର ପରିଷ୍କାର ପରିଚ୍ଛନ୍ନତା ହିଁ ତାଙ୍କ ଧ୍ୟାନ କେନ୍ଦ୍ର ହୋଇ ରହିବ ବୋଲି ସେ କହିଛନ୍ତି।
କୁଳପତି ପ୍ରଫେସର ସୌମେନ୍ଦ୍ର ମୋହନ ପଟ୍ଟନାୟକ ସମ୍ମାନିତ ଅତିଥି ଭାବେ ଯୋଗଦେଇ ବିଶ୍ୱବିଦ୍ୟାଳୟ ସ୍ମରଣିକା ‘ଉତ୍କଳ ଅଭିଡ଼ି’କୁ ଉନ୍ମୋଚନ କରିଥିଲେ। ବିଶ୍ୱବିଦ୍ୟାଳୟର ପ୍ରଥମ ମହିଳା କୁଳପତିଭାବେ ଯୋଗଦେଇ ପ୍ରଫେସର ଆଚାର୍ଯ୍ୟ ଇତିହାସ ରଚିଛନ୍ତି ବୋଲି ପ୍ରଫେସର ପଟ୍ଟନାୟକ କହିବା ସହ ତାଙ୍କୁ ଅଭିନନ୍ଦନ ଜଣାଇଥିଲେ। ସେ କହିଲେ, ଉତ୍କଳ ଉଚ୍ଚାଭିମୁଖୀ ଓ ପ୍ରଫେସର ଆଚାର୍ଯ୍ୟଙ୍କ ନେତୃତ୍ୱରେ ବିଶ୍ୱବିଦ୍ୟାଳୟ ମହାନ ଉଚ୍ଚତା ହାସଲ କରିବ। ଦେଶ ଓ ରାଜ୍ୟ ପ୍ରତି ଥିବା ଦାୟିତ୍ୱକୁ ମଧ୍ୟ ସୁଚାରୁରୂପେ ତୁଲାଇବେ ବୋଲି ଆଶା ଓ ବିଶ୍ୱାସ ରହିଛି। ଏହି ଅବସରରେ ପ୍ରଫେସର ପଟ୍ଟନାୟକ ‘ମିଡିଆରେ ଉତ୍କଳ’ ନାମକ ଏକ ପୁସ୍ତକକୁ ଉନ୍ମୋଚନ କରିଥିଲେ। ଏଥିରେ ଗତ ୩ବର୍ଷରେ ବିଶ୍ୱବିଦ୍ୟାଳୟ ସମ୍ବନ୍ଧରେ ହୋଇଥିବା ସମସ୍ତ ଗଣମାଧ୍ୟମ ପ୍ରକାଶନ ସ୍ଥାନ ପାଇଛି।
ଧର୍ମପଦ କନ୍ଭୋକେଶନ ହଲ୍ରେ ଅନୁଷ୍ଠିତ କାର୍ଯ୍ୟକ୍ରମରେ କୁଳସଚିବ ଅଭୟ କୁମାର ନାୟକ ବିଶ୍ୱବିଦ୍ୟାଳୟ ଉପରେ ଏକ ରିପୋର୍ଟ ଉପସ୍ଥାପନ କରି ଗତବର୍ଷର ସମସ୍ତ ସଫଳତା ସମ୍ବନ୍ଧରେ ସୂଚନା ଦେଇଥିଲେ। କୋଭିଡ୍ ଆମ ସମ୍ମୁଖରେ ଏକ ବିରାଟ ଆହ୍ବାନ ହୋଇଥିବାବେଳେ ଆମେ ଶିକ୍ଷା ଓ ଅନୁସନ୍ଧାନକୁ ବଜାୟ ରଖିବା ପାଇଁ ଯଥାସମ୍ଭବ ଚେଷ୍ଟା କରିଛୁ ବୋଲି ନାୟକ କହିଥିଲେ। ପି.ଜି. ପରିଷଦ ଅଧ୍ୟକ୍ଷ ପ୍ରଫେସର ବସନ୍ତ କୁମାର ମଲ୍ଲିକ ସ୍ବାଗତ ଭାଷଣ ଦେଇ କହିଲେ, ପ୍ରତିଷ୍ଠା ଦିବସରେ ଆମର ଲକ୍ଷ୍ୟ, ସଫଳତା ଏବଂ ତ୍ରୁଟି ବିଷୟରେ ଅନୁଧ୍ୟାନ କରି ଆଗାମୀ ଦିନରେ ନିଜକୁ ଉନ୍ନତରୁ ଉନ୍ନତ୍ତର କରିବା ପାଇଁ ଶପଥ ଗ୍ରହଣ କରିବା ଉଚିତ। ଏହି ଅବସରରେ କୁଳପତି ସମସ୍ତ ଅବସରପ୍ରାପ୍ତ ଶିକ୍ଷକ ଓ କର୍ମଚାରୀଙ୍କୁ ସମ୍ମାନିତ କରିଥିଲେ। ଛାତ୍ର କଲ୍ୟାଣ ବିଭାଗର ନିର୍ଦ୍ଦେଶକ ସୁଶାନ୍ତ ବଡ଼ମାଳୀ ଧନ୍ୟବାଦ ଦେଇଥିଲେ।
