ନ୍ୟୁୟର୍କ,୫ା୯: ଟେନିସ୍ ଗ୍ରାଣ୍ଡସ୍ଲାମ ୟୁଏସ୍ ଓପନ ପୁରୁଷ ସିଙ୍ଗଲ୍ସ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି ସର୍ବିୟାର ନୋଭାକ୍ ଜୋକୋଭିଚ୍। କ୍ୱାଲିଫାୟର ଖେଳି ଚତୁର୍ଥ ରାଉଣ୍ଡରେ ପ୍ରବେଶ କରିଥିବା ବୋର୍ନା ଗୋଜୋଙ୍କୁ ୬-୨, ୭-୫ ଓ ୬-୪ର ସିଧାସଳଖ ସେଟ୍ରେ ପରାସ୍ତ କରିଛନ୍ତି ଜୋକୋଭିଚ୍। ୫ ସେଟ୍ ବିଶିଷ୍ଟ ମୁକାବିଲା ଖେଳି ଚତୁର୍ଥ ରାଉଣ୍ଡରେ ପ୍ରବେଶ କରିଥିବା ଜୋକୋଭିଚ୍ ରବିବାର ଚମତ୍କାର ପ୍ରତ୍ୟାବର୍ତ୍ତନ କରିଥିଲେ। ସତର୍କତା ଓ ନିୟନ୍ତ୍ରଣର ସହିତ ଖେଳିଥିବା ବେଳେ ମାତ୍ର ୧୨ଟି ଅନ୍ଫୋର୍ସଡ ଏରର୍ କରିଥିଲେ। ଗୋଜୋ ଏହି ମ୍ୟାଚରେ ୪୦ ଅନଫୋର୍ସଡ ଏରର କରିଥିଲେ। ଏହି ବିଜୟ ସହିତ ଆସନ୍ତା ସପ୍ତାହର ଏଟିପି ର଼୍ୟାଙ୍କିଙ୍ଗରେ ଜୋକୋଭିଚ୍ ପ୍ରଥମ ସ୍ଥାନକୁ ଫେରିବାକୁ ଯାଉଛନ୍ତି। କ୍ୱାର୍ଟର ଫାଇନାଲରେ ଜୋକୋଭିଚ୍ ୨୫ ବର୍ଷୀୟ ଟେଲର ଫ୍ରିଟ୍ଜଙ୍କୁ ଭେଟିବେ। ପୂର୍ବରୁ ୭ ଥର ସେ ଟେଲରଙ୍କୁ ଭେଟିଥିବା ବେଳେ ପ୍ରତ୍ୟେକ ଥର ବିଜୟୀ ହୋଇଛନ୍ତି। ୟୁଏସ୍ ଓପନରେ ଏହା ଜୋକୋଭିଚ୍ଙ୍କର ୧୩ତମ କ୍ୱାର୍ଟର ଫାଇନାଲ ହୋଇଥିବା ବେଳେ ଟେଲର ପ୍ରଥମ ଥର ପାଇଁ କ୍ୱାର୍ଟରରେ ପ୍ରବେଶ କରିଛନ୍ତି। ଅନ୍ୟ ଦୁଇ ଆମେରିକୀୟ ଖେଳାଳି ଫ୍ରାନ୍ସିସ୍ ଟିଆଫୋ ଓ ବେନ୍ ଶେଲ୍ଟନ୍ ମଧ୍ୟ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଶେଷ ଥର ପାଇଁ ୨୦୦୫ରେ ଆନ୍ଦ୍ରେ ଆଗାସୀ, ଜେମ୍ସ ବ୍ଲେକ୍ ଓ ରବି ଗିନେପ୍ରି ଏହି କୃତିତ୍ୱ ହାସଲ କରିଥିଲେ। ଜୋକୋଭିଚ୍-ଟେଲରଙ୍କ ମ୍ୟାଚର ବିଜେତା ସେମି ଫାଇନାଲରେ ଫ୍ରାନ୍ସିସ୍ ଟିଆଫୋ ଓ ବେନ୍ ଶେଲ୍ଟନ୍ ମଧ୍ୟରେ ଖେଳାଯିବାକୁ ଥିବା ମ୍ୟାଚ୍ର ବିଜେତାକୁ ଭେଟିବେ।
ବିଦା ହେଲେ ସ୍ବିଟେକ୍: ମହିଳା ସିଙ୍ଗଲ୍ସରେ ବିଶ୍ୱ ମାନ୍ୟତାର ଏକ ନମ୍ବର ସ୍ଥାନରେ ଥିବା ଇଗା ସ୍ବିଟେକ୍ ଚତୁର୍ଥ ରାଉଣ୍ଡରୁ ବିଦାୟ ନେଇଛନ୍ତି। ଡିଫେଣ୍ଡିଂ ଚାମ୍ପିୟନ ତଥା ଦେଢ ବର୍ଷ ଧରି ଏକ ନମ୍ବର ସ୍ଥାନରେ ରହିଥିବା ସ୍ବିଟେକ୍ ଜେଲେନା ଓଷ୍ଟାପେଙ୍କୋଙ୍କ ନିକଟରୁ ୩-୬, ୬-୩ ଓ ୬-୧ ସେଟ୍ରେ ପରାଜିତ ହୋଇଛନ୍ତି। ୨୦୧୭ ଫ୍ରେଞ୍ଚ ଓପନ ଚାମ୍ପିୟନ ଓଷ୍ଟାପେଙ୍କୋ ପ୍ରଥମ ସେଟ୍ ହାରିଥିଲେ ହେଁ ପରବର୍ତ୍ତୀ ଦୁଇ ସେଟ୍କୁ ଜିତି ନେଇଥିଲେ। ଏହା ସହିତ ସ୍ବିଟେକ୍ ଆସନ୍ତା ସପ୍ତାହର ର଼୍ୟାଙ୍କିଙ୍ଗରେ ଦୁଇ ନମ୍ବର ସ୍ଥାନକୁ ଖସିବା ସ୍ପଷ୍ଟ ହୋଇଛି। ୨ ନମ୍ବର ସ୍ଥାନରେ ଥିବା ଆରିନା ସାବାଲେଙ୍କା କ୍ୟାରିୟରରେ ପ୍ରଥମ ଥର ଏକ ନମ୍ବର ସ୍ଥାନ ହାସଲ କରିବାକୁ ଯାଉଛନ୍ତି। ରବିବାର ମ୍ୟାଚ୍ରେ ପ୍ରଥମ ସେଟ୍ରେ ପରାଜିତ ହେବା ପରେ ଦ୍ୱିତୀୟ ସେଟ୍ରେ ୪-୧ରେ ଆଗୁଆ ରହିଥିଲେ ଓଷ୍ଟାପେଙ୍କୋ। ତେବେ ପଏଣ୍ଟ ବ୍ରେକ୍ କରିବା ସହିତ ସ୍ବିଟେକ୍ ୪-୩କୁ ପ୍ରତ୍ୟାବର୍ତ୍ତନ କରିଥିଲେ। ତେବେ ଏହାପରେ ଓଷ୍ଟାପେଙ୍କୋ ଆଉ ପ୍ରତ୍ୟାବର୍ତ୍ତନର ସୁଯୋଗ ଦେଇ ନ ଥିଲେ। ଅନ୍ୟ ଏକ ଚତୁର୍ଥ ରାଉଣ୍ଡ ମ୍ୟାଚ୍ରେ କାରୋଲିନ୍ ଓଜ୍ନିଆକିଙ୍କୁ ପରାସ୍ତ କରିଛନ୍ତି କୋକୋ ଗଫ୍। ୬-୩, ୩-୬, ୬-୧ ସେଟ୍ରେ ମ୍ୟାଚ୍କୁ ଜିତିବା ସହିତ ସେରେନା ଓ୍ବିଲିୟମ୍ସଙ୍କ ପରେ ଦ୍ୱିତୀୟ ଆମେରିକୀୟ ମହିଳା ଖେଳାଳି ଭାବରେ ଗଫ୍ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଓଷ୍ଟାପେଙ୍କୋ ଓ ଗଫ୍ ପରସ୍ପରକୁ ଦୁଇ ଥର ଲେଖାଏ ଭେଟିଥିବା ବେଳେ ଉଭୟ ଥରେ ଲେଖାଏ ବିଜୟୀ ହୋଇଛନ୍ତି।
