ଭୁବନେଶ୍ୱର, ୫।୯ (ତପନ ସ୍ବାଇଁ): ସର୍ବଭାରତୀୟ ଫୁଟ୍ବଲ ଫେଡେରେଶନ (ଏଆଇଏଫ୍ଏଫ୍), ଫୁଟ୍ବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ଓ ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ମିଳିତ ଆନୁକୂଲ୍ୟରେ ମଙ୍ଗଳବାରଠାରୁ ଭୁବନେଶ୍ୱରରେ ଆରମ୍ଭ ହେବାକୁ ଯାଉଛି ବି.ସି. ରୟ ଟ୍ରଫି ଜାତୀୟ ଜୁନିୟର ଫୁଟ୍ବଲ ଟୁର୍ନାମେଣ୍ଟ। ଏହି ସମ୍ମାନଜନକ ପ୍ରତିଯୋଗିତାରେ ବିଭିନ୍ନ ରାଜ୍ୟରୁ ୧୬ଟି ଦଳ ଅଂଶଗ୍ରହଣ କରିବେ। ଭୁବନେଶ୍ୱରରେ ପ୍ରଥମଥର ପାଇଁ ଏହି ଟୁର୍ନାମେଣ୍ଟ ଆୟୋଜନ ହେବାକୁ ଯାଉଛି। ମ୍ୟାଚଗୁଡ଼ିକ ୟୁନିଟ-୩ସ୍ଥିତ କ୍ୟାପିଟାଲ ଫୁଟବଲ ଆରେନା ଏବଂ ୭ମ ବାଟାଲିୟନ ପରିସରରେ ଥିବା ଓଡ଼ିଶା ଫୁଟ୍ବଲ ଏକାଡେମୀ ପଡ଼ିଆରେ ଅନୁଷ୍ଠିତ ହେବ। ଅଂଶଗ୍ରହଣକାରୀ ଦଳଗୁଡ଼ିକୁ ୪ଟି ଗ୍ରୁପ୍ରେ ବିଭକ୍ତ କରାଯାଇଛି। ପ୍ରତି ଗ୍ରୁପ୍ରେ ୪ଟି ଲେଖାଏ ଦଳ ସ୍ଥାନ ପାଇଛନ୍ତି।
ଗ୍ରୁପ୍ ‘ସି’ରେ ଓଡ଼ିଶା
ଗ୍ରୁପ୍ ‘ଏ’ରେ ମିଜୋରାମ, କର୍ନାଟକ, ଝାଡ଼ଖଣ୍ଡ, ମହାରାଷ୍ଟ୍ର ଏବଂ ଗ୍ରୁପ୍ ‘ବି’ରେ ମେଘାଳୟ, କେରଳ, ପଶ୍ଚିମବଙ୍ଗ ଓ ଜମ୍ମୁ-କଶ୍ମୀର ଦଳ ସ୍ଥାନ ପାଇଛି। ଗ୍ରୁପ୍ ‘ସି’ରେ ରହିଛି ଓଡ଼ିଶା। ଏହି ଗ୍ରୁପ୍ର ଅନ୍ୟ ଦଳଗୁଡ଼ିକ ହେଲେ ଉତ୍ତର ପ୍ରଦେଶ, ହରିୟାଣା ଓ ଛତିଶଗଡ଼। ସେହିପରି ଗ୍ରୁପ୍ ‘ଡି’ରେ ପଞ୍ଜାବ, ଗୋଆ, ତାମିଲନାଡ଼ୁ ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ସ୍ଥାନ ପାଇଛି। ମଙ୍ଗଳବାର କ୍ୟାପିଟାଲ ଆରେନାରେ ଉଦ୍ଘାଟନୀ ଉତ୍ସବ ଅନୁଷ୍ଠିତ ହେବ। ପ୍ରଥମ ଦିବସରେ ୪ଟି ମ୍ୟାଚ୍ ଖେଳାଯିବ। ପୂର୍ବାହ୍ନ ୮ଟାରେ କ୍ୟାପିଟାଲ ଆରେନାରେ ମିଜୋରାମ-ଝାଡ଼ଖଣ୍ଡ ଏବଂ ଓଡ଼ିଶା ଫୁଟବଲ ଏକାଡେମୀରେ କର୍ନାଟକ-ମହାରାଷ୍ଟ୍ର ମ୍ୟାଚ୍ ଅନୁଷ୍ଠିତ ହେବ। ସେହିପରି ଅପରାହ୍ନ ୩ଟା ୩୦ରେ କ୍ୟାପିଟାଲ ଆରେନାରେ ଓଡ଼ିଶା-ହରିୟାଣା ଏବଂ ଓଡ଼ିଶା ଫୁଟ୍ବଲ ଏକାଡେମୀରେ ଉତ୍ତର ପ୍ରଦେଶ-ଛତିଶଗଡ଼ ମ୍ୟାଚ୍ ଖେଳାଯିବ। ହରିୟାଣା ବିପକ୍ଷରୁ ଓଡ଼ିଶା ଏହାର ଅଭିଯାନ ଆରମ୍ଭ କରିବାପରେ ୭ ତାରିଖରେ ଦ୍ୱିତୀୟ ମ୍ୟାଚ୍ରେ ଉତ୍ତର ପ୍ରଦେଶ ଏବଂ ୯ରେ ତୃତୀୟ ମ୍ୟାଚ୍ରେ ଛତିଶଗଡ଼କୁ ଭେଟିବ। ୧୩ ତାରିଖରେ ୨ଟି ସେମିଫାଇନାଲ ଏବଂ ୧୫ରେ ଫାଇନାଲ ଅନୁଷ୍ଠିତ ହେବ।
ଓଡ଼ିଶାରେ ୬ଷ୍ଠ
ଏହାକୁ ମିଶାଇ ଓଡ଼ିଶାରେ ୬ଷ୍ଠ ଥର ପାଇଁ ବି.ସି. ରୟ ଟ୍ରଫି ଜାତୀୟ ଫୁଟ୍ବଲ ଖେଳ ହେବାକୁ ଯାଉଛି। ତେବେ ଭୁବନେଶ୍ୱରରେ ଏହା ପ୍ରଥମ। ପୂର୍ବରୁ ୫ ଥର ଏହା କଟକରେ ଅନୁଷ୍ଠିତ ହୋଇଥିଲା। କଟକରେ ୧୯୬୫ରେ ଏହା ପ୍ରଥମଥର ପାଇଁ ଆୟୋଜିତ ହୋଇଥିଲା ଏବଂ ଫାଇନାଲରେ ଆନ୍ଧ୍ର ପ୍ରଦେଶକୁ ୧-୦ ଗୋଲରେ ହରାଇ ଦିଲ୍ଲୀ ଚାମ୍ପିୟନ ହୋଇଥିଲା। ୪ ବର୍ଷ ପରେ ୧୯୬୯ରେ ଏହା ଦ୍ୱିତୀୟ ଥର ପାଇଁ କଟକରେ ହୋଇଥିଲା। ଓଡ଼ିଶା ଓ କେରଳ ମଧ୍ୟରେ ଅନୁଷ୍ଠିତ ଫାଇନାଲ ଗୋଲଶୂନ୍ୟ ରହିବାରୁ ଉଭୟ ଦଳକୁ ଯୁଗ୍ମ ବିଜେତା ଘୋଷଣା କରାଯାଇଥିଲା। ୧୯୭୭ରେ କଟକରେ ଏହା ତୃତୀୟ ଥରପାଇଁ ଆୟୋଜିତ ହୋଇଥିଲା। ପୂରା ଟୁର୍ନାମେଣ୍ଟରେ ପ୍ରଭାବୀ ପ୍ରଦର୍ଶନ କରିଥିବା ଓଡ଼ିଶା ଫାଇନାଲରେ ବେଙ୍ଗଲଠାରୁ ୦-୧ ଗୋଲରେ ହାରି ରନରଅପ୍ରେ ସନ୍ତୁଷ୍ଟ ରହିଥିଲା। ୧୯୭୯ରେ ଅନୁଷ୍ଠିତ ଟୁର୍ନାମେଣ୍ଟର ଫାଇନାଲରେ ଆନ୍ଧ୍ର ପ୍ରଦେଶକୁ ୧-୦ ଗୋଲରେ ହରାଇ କର୍ନାଟକ ଟ୍ରଫି ଜିତିଥିଲା। କଟକରେ ଶେଷ ଥର ପାଇଁ ଏହା ୨୦୧୮-୧୯ରେ ଆୟୋଜିତ ହୋଇଥିଲା। ଏହାର ଫାଇନାଲରେ ପଞ୍ଜାବକୁ ୧-୦ ଗୋଲରେ ହରାଇ ମିଜୋରାମ ଟାଇଟଲ ଜିତିଥିଲା।
