ପୁରୀ ଅଫିସ,୧୬ା୭: ନୂଆ ରୂପ ନେବ ସ୍ବର୍ଗଦ୍ୱାର। ବଦଳିବ ଏହାର ଚେହେରା। ପୁରୀ ପାଇଁ ଯେଉଁ ବିକାଶର ଚିତ୍ର ପରିକଳ୍ପନା କରାଯାଇଛି ସେଥିରେ ସ୍ବର୍ଗଦ୍ୱାରକୁ ସାମିଲ କରାଯାଇଛି। ଦୂରଦୂରାନ୍ତରୁ ମୃତଦେହ ଦାହ ପାଇଁ ଆସୁଥିବା ସମ୍ପର୍କୀୟମାନେ ଯେପରି କୌଣସି ପ୍ରକାର ତିକ୍ତ ଅନୁଭୂତି ନ ସାଉଁଣ୍ଟିବେ ସେଥିପ୍ରତି ଗୁରୁତ୍ୱ ଦିଆଯାଇଛି। ସ୍ବର୍ଗଦ୍ୱାରର ପୁନରୁଦ୍ଧାର ପାଇଁ ରାଜ୍ୟ ସରକାର ୫ କୋଟି ଟଙ୍କା ମଞ୍ଜୁର କରିଥିବା ବେଳେ ଏହା ପରିସର ପୁରୁଣା କୋଠା ଉଚ୍ଛେଦ ମଧ୍ୟ କରାଯାଇଥିଲା। ଏପରି କି ପୁନରୁଦ୍ଧାର କାମ ପାଇଁ ଭୂମିପୂଜା ଅନୁଷ୍ଠିତ ହୋଇଥିଲା। ମାତ୍ର କରୋନା ପାଇଁ କାମ ଅଟକି ରହିଥିଲା। ପୁଣି କାମ ଆରମ୍ଭ କରିବା ଲାଗି ବୁଧବାର ଜିଲାପାଳ ବଲୱନ୍ତ ସିଂ ସ୍ବର୍ଗଦ୍ୱାର ପରିସରକୁ ଯାଇ ସମୀକ୍ଷା କରିଛନ୍ତି।
କାମ ନେଇଥିବା ସଂସ୍ଥାର କର୍ମଚାରୀ, ପୁରୀ ପୌର ନିର୍ବାହୀ ଅଧିକାରୀ ବିଜୟ କୁମାର ଦାଶ, ଗୋବର୍ଦ୍ଧନ ମଠ ମୁଖପାତ୍ର ମନୋଜ ରଥ ପ୍ରମୁଖ ଜିଲାପାଳଙ୍କ ସହ ସ୍ବର୍ଗଦ୍ୱାର ପରିସର ବୁଲିଥିଲେ। ଖୁବଶୀଘ୍ର କାମ ଆରମ୍ଭ କରିବା ଲାଗି ଜିଲାପାଳ ନିର୍ମାଣକାରୀ ସଂସ୍ଥାକୁ କହିଛନ୍ତ। ସେହିପରି ସ୍ବର୍ଗଦ୍ୱାର ପରିସର ଗୋବର୍ଦ୍ଧନ ମଠର ଶିବ ମନ୍ଦିରକୁ ମଧ୍ୟ ସୌନ୍ଦର୍ଯ୍ୟକରଣ କରାଯିବ। ଏହା ପରିସର ଡିଜାଇନ କିପରି ହେବ ସେ ନେଇ ଏକ ନକ୍ସା ପ୍ରସ୍ତୁତ କରାଯିବ। ଏହି ନକ୍ସାକୁ ଜଗଦ୍ଗୁରୁ ଶଙ୍କରାଚାର୍ଯ୍ୟ ଦେଖିବା ପରେ ତାଙ୍କ ପରାମର୍ଶ ଅନୁଯାୟୀ କାମ ହେବ ବୋଲି ଜଣାପଡିଛି।
ସୂଚନାଥାଉ କି, ମହାପ୍ରସ୍ଥାନମ୍ କ୍ରିମେଟୋରିୟମ୍ ଢାଞ୍ଚାରେ ପୁରୀ ସ୍ବର୍ଗଦ୍ୱାର ହେବ। ଏହାମଧ୍ୟରେ ଏଠାରେ ଏକାସଙ୍ଗରେ ୧୪ଟି ଦାହ ପିଣ୍ଡି କରାଯିବ। ଏହାସହ ପ୍ରତ୍ୟେକ ପିଣ୍ଡି ଉପରେ ଛୋଟ ଶେଡ ରହିବ। ସେହିପରି ସମୁଦ୍ର କୂଳରେ ଏକ ଘାଟ କରାଯିବ। ଏହି ଘାଟକୁ ଯିବା ପାଇଁ ରୋଡ ଓଭର ବ୍ରିଜ୍ (ଆରଓବି) ନିର୍ମାଣର ମଧ୍ୟ ଯୋଜନା ରହିଛି। ତେବେ ସ୍ବର୍ଗଦ୍ୱାରର ପ୍ରବେଶ ପଥ ଫାଟକ ସବୁଠୁ ଆକର୍ଷଣୀୟ ହେବ ବୋଲି ଡିଜାଇନ ପ୍ରସ୍ତୁତ ସରିଛି।
