ହାଟଡିହୀ/ଛେନାପଦୀ,୧୫।୮(ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ହାଟଡିହୀ ବ୍ଲକ ଛେନାପଦି ଛକର ଯୁବ ବ୍ୟବସାୟୀ ତଥା ବଞ୍ଚୋ ପଞ୍ଚାୟତର ସରପଞ୍ଚ ପ୍ରଶାନ୍ତ ରାଉତଙ୍କ ସାନଭାଇ ସୁଶାନ୍ତ ରାଉତ ଓରଫ ପାର୍ଥ (୪୮ ବର୍ଷ)ଙ୍କର ଅକାଳ ବିୟୋଗ ଘଟିଛି। ଜଣେ ମେଳାପୀ, ସହଯୋଗୀ ଏବଂ ଅନ୍ୟର ସୁଖଦୁଃଖରେ ସାମିଲ ହେଉଥିବା ଯୁବକ ଭାବେ ପରିଚିତ ପାର୍ଥଙ୍କ ଏପରି ଅକାଳ ମୃତ୍ୟୁ ହାଟଡିହୀ ବ୍ଲକ ସମେତ ସମଗ୍ର ଅଞ୍ଚଳବାସୀଙ୍କୁ ଗଭୀର ଭାବେ ମର୍ମାହତ କରିଛି।
ଗତ ଶୁକ୍ରବାର ସନ୍ଧ୍ୟା ସମୟରେ ଅମୃତପୁର ନିକଟରେ ସୁଶାନ୍ତ ରାଉତ ବିଦ୍ୟୁତ୍ ଆଘାତର ଶିକାର ହୋଇ ଗୁରୁତର ହୋଇପଡ଼ିଥିଲେ। ଘଟଣା ପରେ ସ୍ଥାନୀୟ ଲୋକେ ତାଙ୍କୁ ତୁରନ୍ତ ଶାଳଣିଆଁ ଡାକ୍ତରଖାନାକୁ ନେଇଥିଲେ। ମାତ୍ର ସେଠାରେ ତାଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ଥିବାରୁ ଡାକ୍ତରଙ୍କ ପରାମର୍ଶକ୍ରମେ ତାଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ତାଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ଆନନ୍ଦପୁର ଡାକ୍ତରଖାନା ପରିସରରେ ସାଙ୍ଗସାଥୀ, ସମ୍ପର୍କୀୟ, ଛେନାପଦି ଛକର ବ୍ୟବସାୟୀ ଓ ବିଭିନ୍ନ ଅଞ୍ଚଳରୁ ଆସିଥିବା ଶହ ଶହ ଲୋକଙ୍କ ଭିଡ଼ ଜମିଥିଲା। ଶନିବାର ତାଙ୍କ ପାର୍ଥିବ ଶରୀର ଛେନାପଦିକୁ ଅଣାଯିବା ପରେ ଛେନାପଦି ଛକ ବ୍ୟବସାୟୀ ସଂଘ ପକ୍ଷରୁ ଶ୍ରଦ୍ଧାଞ୍ଜଳି ଜ୍ଞାପନ କରାଯିବା ସହ ଶୋକାକୁଳ ବରିଷ୍ଠ ବ୍ୟବସାୟୀ ଓ ସ୍ଥାନୀୟ ଲୋକଙ୍କ ଉପସ୍ଥିତିରେ ବଜାର ପରିକ୍ରମା କରାଯାଇଥିଲା। ଏହି ସମୟରେ ଏକ ଭାବବିହ୍ୱଳ ପରିବେଶ ସୃଷ୍ଟି ହୋଇଥିଲା। ପରେ ବଞ୍ଚୋ ଗ୍ରାମବାସୀଙ୍କ ପକ୍ଷରୁ ଶବ ଶୋଭାଯାତ୍ରା କରାଯାଇ ବୈତରଣୀ ନଦୀ କୂଳରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଥିଲା।
ଏହି ଶେଷଯାତ୍ରାରେ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ, ଭାଜପା ନେତା ଆଲୋକ ସେଠୀ, ହାଟଡିହୀ ବ୍ଲକ ଅଧ୍ୟକ୍ଷା ସାବିତ୍ରୀ ସେଠୀ, ଉପାଧ୍ୟକ୍ଷ ରତିକାନ୍ତ ରାଉତ, MP ପ୍ରତିନିଧି ଜ୍ଞାନ ରଞ୍ଜନ ସାମନ୍ତସିଂହାର, ବିଡିଓ ରଞ୍ଜନ କୁମାର ପରିଡ଼ା, ବ୍ୟବସାୟୀ ସଂଘ ସଭାପତି କୃଷ୍ଣ ଚନ୍ଦ୍ର ଜେନା, ସମ୍ପାଦକ କିଶୋର ଆଚାର୍ଯ୍ୟଙ୍କ ସମେତ ବିଭିନ୍ନ ରାଜନୈତିକ ଦଳର କର୍ମୀ, ଜନପ୍ରତିନିଧି, ସାମାଜିକ କର୍ମୀ ଓ ଶହ ଶହ ଗ୍ରାମବାସୀ ସାମିଲ ହୋଇ ପାର୍ଥଙ୍କୁ ଅଶ୍ରୁଳ ବିଦାୟ ଜଣାଇଥିଲେ।
ଏହି ଅପୂରଣୀୟ କ୍ଷତିରେ ପରିବାରବର୍ଗ ଓ ଛେନାପଦି ଛକ ବ୍ୟବସାୟୀ ସମାଜ ମଧ୍ୟରେ ଗଭୀର ଶୋକର ଛାୟା ଖେଳିଯାଇଛି। ଏନେଇ ନନ୍ଦିପଦା ପୋଲିସ ଏକ ଅପମୃତ୍ୟୁ ମାମଲା (ନଂ ୧୭/୨୦୨୬) ରୁଜୁ କରି ଘଟଣାର ତଦନ୍ତ ଜାତି ରଖିଥିବା ଥାନାଧିକାରୀ ଧର୍ମେନ୍ଦ୍ର ଶାନ୍ତି ସୂଚନା ଦେଇଛନ୍ତି।
