ଦେଶର ଅଖଣ୍ଡତା ଲାଗି ଏକତା ଜରୁରୀ। ଏହା ଦ୍ୱାରା ଦେଶବାସୀ ଏକଜୁଟ ହୋଇ ବିଭିନ୍ନ ସମସ୍ୟାର ସଫଳ ସମାଧାନ କରିବାକୁ ସକ୍ଷମ ହୋଇଥା’ନ୍ତି। କରୋନା ମହାମାରୀ ଲଢ଼େଇରେ ଦେଶର ଜନସାଧାରଣଙ୍କ ମଧ୍ୟରେ ଦେଖାଦେଇଥିବା ଏକତାକୁ ବିଶ୍ୱସ୍ତରରେ ପ୍ରଶଂସା କରାଯାଉଛି।
ସ୍ବାଧୀନ ଭାରତର ପ୍ରଥମ ଉପପ୍ରଧାନମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜନ୍ମଦିନ ସ୍ମୃତିରେ ରାଷ୍ଟ୍ରୀୟ ଏକତା ଦିବସ ପାଳନ ପାଇଁ ୨୦୧୪ରେ ଭାରତ ସରକାରଙ୍କ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଥିଲା। ସ୍ବାଧୀନ ଭାରତ ସହିତ ପ୍ରାୟ ୫୬୫ ରାଜରାଜୁଡ଼ା ଅଞ୍ଚଳକୁ ମିଶାଇବାରେ ପଟେଲଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ଭାରତର ଏକୀକରଣରେ ପଟେଲ ନୂଆ ଇତିହାସ ସୃଷ୍ଟି କରିଥିଲେ। ସେ ୧୮୭୫ ଅକ୍ଟୋବର ୩୧ରେ ଗୁଜରାଟର ନାଦିଆଦ୍ଠାରେ ଜନ୍ମ ଗ୍ରହଣ କରିଥିଲେ। ଅଖଣ୍ଡ ଭାରତ ଗଠନରେ ତାଙ୍କର କାର୍ଯ୍ୟକୁ ମନେରଖିବା ଲାଗି ଦେଶରେ ଅକ୍ଟୋବର ୩୧ରେ ଜାତୀୟ ଏକତା ଦିବସ ପାଳିତ ହେଉଛି। ପଟେଲ ଲୌହ ମାନବ ଭାବେ ବେଶ୍ ଜଣାଶୁଣା।
ଜାତୀୟ ଏକତା ଦିବସ ଏକତା, ଅଖଣ୍ଡତା ଏବଂ ନିରାପତ୍ତା ପ୍ରତି ବିପଦକୁ ପ୍ରତିହତ କରିବା ପାଇଁ ଆମ ଦେଶର ଅନ୍ତର୍ନିହିତ ଶକ୍ତି ଏବଂ ସ୍ଥିରତାକୁ ପୁନଃ ସ୍ଥାପନ କରିବାର ସୁଯୋଗ ପ୍ରଦାନ କରିଥାଏ। ଲୋକଙ୍କ ମଧ୍ୟରେ ଭାଇଚାରାକୁ ସୁଦୃଢ଼ କରିବାରେ ସହାୟକ ହୋଇଥାଏ।
ଏହି ଦିବସ ପାଳନ ଅବସରରେ ଲୋକଙ୍କୁ ଶପଥପାଠ କରାଯାଇଥାଏ। ତାହା ହେଉଛି, ମୁଁ ପ୍ରତିଶ୍ରୁତି ଦେଉଛି ଯେ, ମୁଁ ଦେଶର ଏକତା, ଅଖଣ୍ଡତା ଏବଂ ନିରାପତ୍ତା ରକ୍ଷା ଲାଗି ନିଜକୁ ଉତ୍ସର୍ଗ କରିବି ଏବଂ ମୋର ସାଥୀ ଦେଶବାସୀଙ୍କ ମଧ୍ୟରେ ଏହି ବାର୍ତ୍ତା ପ୍ରସାର କରିବାକୁ ମଧ୍ୟ ଚେଷ୍ଟା କରିବି। ମୁଁ ମୋର ଦେଶର ଏକୀକରଣର ଆତ୍ମା ସହିତ ଏହି ପ୍ରତିଶ୍ରୁତି ଗ୍ରହଣ କରି ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଦର୍ଶନ ଏବଂ କାର୍ଯ୍ୟକୁ ସଫଳ କରିବାର ପ୍ରୟାସ କରିବି। ମୋ ଦେଶର ଆଭ୍ୟନ୍ତରୀଣ ସୁରକ୍ଷା ସୁନିଶ୍ଚିତ କରିବା ପାଇଁ ମୁଁ ନିଜର ଅବଦାନ ଯୋଗାଇ ଦେବାକୁ ଦୃଢ଼ ଭାବେ ସଂକଳ୍ପବଦ୍ଧ।
ଭାରତ ସରକାରଙ୍କ ପକ୍ଷରୁ ଆଇରନ୍ ମ୍ୟାନ ଅଫ୍ ଇଣ୍ଡିଆଙ୍କ ସ୍ମୃତିରେ ଗୁଜରାଟର ନର୍ମଦା ନଦୀ ନିକଟରେ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଏକ ବିରାଟ ପ୍ରତିମୂର୍ତ୍ତି ନିର୍ମାଣ କରାଯାଇଛି। ଏହା ‘ଷ୍ଟାଚ୍ୟୁ ଅଫ୍ ୟୁନିଟି’ ଭାବେ ପରିଚିତି ହାସଲ କରିଛି।
