ଭାଗଲପୁର,୪।୫: କୁହାଯାଏ, ଯୋଡିସବୁ ଉପରୁ ତିଆରି ହୋଇ ଆସିଥାଏ। କିଏ କାହାର ଜୀବନସାଥୀ ହେବ ସେନେଇ ପୂର୍ବରୁ ନିର୍ଦ୍ଧାରିତ ହୋଇରହିଥାଏ। ତେବେ ବିହାରର ଭାଗଲପୁରରେ ବି କିଛି ଏଭଳି ଏକ ନିଆରା ଯୋଡିଙ୍କୁ ଦେଖିବାକୁ ମିଳିଛି। ଯାହାକୁ ଦେଖିଲେ ଲୋକେ କହୁଛନ୍ତି, ‘ରବ ନେ ବନାଦି ଯୋଡି’। ଏହି ନିଆରା ବିବାହକୁ ଦେଖିବା ପାଇଁ ବିବହାଘରେ ହଜାର ହଜାର ଲୋକଙ୍କ ସମାଗମ ହୋଇଥିବା ବେଳେ ସେଥିମଧ୍ୟରୁ ଅନେକଙ୍କୁ ନିମନ୍ତ୍ରଣ ମଧ୍ୟ କରାଯାଇ ନାହିଁ। ଲୋକଙ୍କର ବିବାହଠୁ ଅଧିକ ଉତ୍ସାହ ଏହି ବରକନ୍ୟାଙ୍କୁ ଦେଖିବା ପାଇଁ। ଏଥିପାଇଁ ଏହି ବିବାହ ସ୍ବତନ୍ତ୍ର କାରଣ ବର ୩୬ଇଞ୍ଚର ହୋଇଥିବା ବେଳେ କନ୍ୟା ହେଉଛନ୍ତି ୩୪ଇଞ୍ଚର। ଏହି ନିଆରା ଯୋଡିଙ୍କ ବିବାହକୁ ନେଇ ସହରରେ ଏବେ ଚାଞ୍ଚଲ୍ୟ ସୃଷ୍ଟି କରିଛି। ସୂଚନାଯୋଗ୍ୟ, ଭାଗଲପୁରର ଆଭିଆ ବଜାରରେ ବାସ କରୁଥିବା କିଶୋରୀ ମଣ୍ଡଳଙ୍କ ୨୪ବର୍ଷୀୟ ଝିଅ ମମତା ନବଗଛିଆଙ୍କ ବିବାହ ମସାରୁର ବିନ୍ଦେଶ୍ୱରୀ ମଣ୍ଡଳଙ୍କ ୨୬ବର୍ଷୀୟ ପୁଅ ମୁନା ଭାରତୀଙ୍କ ସହ ଅନୁଷ୍ଠିତ ହୋଇଥିଲା। ମମତା ୩୪ଇଞ୍ଚର ହୋଇଥିବା ବେଳେ ମୁନା ୩୬ଇଞ୍ଚର। ଏହି ଯୋଡିଙ୍କ ବିବାହକୁ ଦେଖିବା ପାଇଁ ସେଠାରେ ହଜାର ହଜାର ଲୋକ ପହଞ୍ଚିଥିଲେ। ବିବାହକୁ ଆସିଥିବା ଅତିଥିମାନେ ନବଦମ୍ପତିଙ୍କ ସହ ସେଲ୍ଫି ଉଠାଇବା ସହ ସେମାନଙ୍କୁ ଶୁଭକାମନା ଜଣାଇଥିଲେ। ବିବାହର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
