ପଟ୍ଟାମୁଣ୍ଡାଇ,୬ା୪(ସ୍ବ.ପ୍ର.): ଯୁଗ ସହ ତାଳ ଦେଇ ନ ପାରିବାରୁ ଆଜି ଅନେକ କୌଳିକ ବୃତ୍ତି ହଜିଯିବାକୁ ବସିଲାଣି। ଅନ୍ୟସବୁ କୌଳିକ ବୃତ୍ତି ପରି ଚାଷୀମାନଙ୍କ ହାତ ବାରିଶି ସାଜୁଥିବା କମାରଶାଳରେ ଆଗଭଳି ଠକ୍ଠକ୍ ଶବ୍ଦ କମିବାରେ ଲାଗିଲାଣି। ଏହାକୁ ନେଇ ଲୁହାରେ ନିଜର ଲହୁ ଢ଼ାଳୁ ଥିବା କମାର ପରିବାର ଏବେ ଚିନ୍ତାରେ ପଡ଼ିଛନ୍ତି। ତେଣୁ କମାର ଶାଳ ଚଳାଇଲେ ସମ୍ପ୍ରଦାୟର ଲୋକଙ୍କ ପେଟ ଅପୋଷା ରହିଛି। ଫଳରେ ବୃତ୍ତିହରା କମାର ଯୁବକମାନେ ଦାଦନ ଖଟିବାକୁ ଯାଉଛନ୍ତି।
ପଟ୍ଟାମୁଣ୍ଡାଇର କମାର ଦୀନବନ୍ଧୁ ଓଝା କୁହନ୍ତି, ଚାଷ କାର୍ଯ୍ୟ ଅବ୍ୟବହିତ ପୂର୍ବରୁ ଲଙ୍ଗଳ, କୋଦାଳ ସହ ଅନ୍ୟ ଚାଷ ଉପକରଣ ପାଇଁ ବରାଦ ଆସେ। ହେଲେ ଆଧୁନିକ ଜ୍ଞାନକୌଶଳ ଯୋଗୁ ଚାଷୀମାନେ ବିଭିନ୍ନ ଅତ୍ୟାଧୁନିକ ଯନ୍ତ୍ରପାତି ସହାୟତାରେ ଚାଷ କାର୍ଯ୍ୟ କରି କମ୍ ସମୟ ଓ ପରିଶ୍ରମରେ ଅଧିକ କାମ ହାସଲ କରି ପାରୁଛନ୍ତି। ଏବେ ଆଧୁନିକ ସଭ୍ୟତାରେ ଏସବୁ ସାମଗ୍ରୀ ହାଟ ବଜାରରେ ସୁବିଧାରେ ମିଳୁଥିବାରୁ ଗଁା ଗଣ୍ଡାରେ କମାର ଶାଳ ଅଲୋଡ଼ା ହୋଇ ଧୀରେ ଧୀରେ ଲୋପ ପାଇବାକୁ ବସିଛି। ଆଗରୁ କମାରଶାଳ ଚଳାଇ ଜୀବନ ନିର୍ବାହ କରୁଥିବା ସମ୍ପ୍ରଦାୟର ଲୋକେ ଏବେ ବୃତ୍ତିହରା ହୋଇ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି ବୋଲି ସେ କହିଛନ୍ତି।
ନୀଳକଣ୍ଠପୁର ଗ୍ରାମର କାରିଗର ସୁଶାନ୍ତ କୁମାର ଓଝା କୁହନ୍ତି, ପୂର୍ବପୁରୁଷରୁ ଚାଲି ଆସୁଥିବା କମାର କାମ ଆଜି ବୁଡ଼ି ଯିବାକୁ ବସିଲାଣି। କମାରଶାଳ ଚଳାଇବା ପାଇଁ ଆବଶ୍ୟକ ହେଉଥିବା କାଠ କୋଇଲା କିଣିବାକୁ ପଡୁଛି। ଏହା ବର୍ତ୍ତମାନ ମହଙ୍ଗା ହେବା ସହ ସହଜରେ ଉପଲବ୍ଧ ମଧ୍ୟ ହେଉନାହିଁ। ଫଳରେ କମାରଶାଳ ଚଳାଇବା କଷ୍ଟକର ହୋଇପଡୁଛି। ଅନ୍ୟପକ୍ଷେ ପୂର୍ବଭଳି ଗ୍ରାହକଙ୍କ ଭିଡ଼ ପରିଲକ୍ଷିତ ହେଉ ନ ଥିବାରୁ ଆଶା ଜନକ ବେପାର ମଧ୍ୟ ହୋଇପାରୁନାହିଁ। ଦିନକୁ ଦିନ ଅତ୍ୟାଧୁନିକ କୃଷି ଉପକରଣର ଚାହିଦା ବୃଦ୍ଧି ପାଉଥିବାରୁ କମାରଶାଳର କାରିଗର ହାତବାନ୍ଧି ବସିଛନ୍ତି। ବିଲୁପ୍ତ ହେବାକୁ ବସିଥିବା କମାରଶାଳର କାରିଗରମାନଙ୍କୁ ପ୍ରୋତ୍ସାହନ ଦେଇ ସରକାର ଏହି କଳାକୁ ବଞ୍ଚାଇ ନ ରଖିଲେ ଏହା ସମୟ ସହିତ ତାଳ ନ ଦେଇ ବୁଡ଼ିଯିବ। ବୃଦ୍ଧିଜୀବୀ ବିଦ୍ୟାଧର ଦାଶ କୁହନ୍ତି, ପଟ୍ଟାମୁଣ୍ଡାଇ ଅଞ୍ଚଳରେ ଅତ୍ୟାଧୁନିକ ଯନ୍ତ୍ରପାତି ଟ୍ରାକ୍ଟର, ପାୱ୍ବାରଟିଲର ଓ ଧାନକଟା ମେଶିନରେ ଚାଷ କାର୍ଯ୍ୟ ହେବା ଫଳରେ କିଛିବର୍ଷ ଧରି ସ୍ଥାନୀୟ ଅଞ୍ଚଳର ବହୁ କମାରଶାଳ ବନ୍ଦ ହୋଇଗଲାଣି। ଦିନ ଥିଲା, ଗଁା ଗହଳିରେ କମାରଶାଳ ଦେଖିବାକୁ ମିଳୁଥିଲା। ଏବେ କ୍ୱେଚିତ କମାରଶାଳ ଦେଖିବାକୁ ମିଳୁଛି। ଚାଷୀମାନେ ତାଙ୍କର ନିତ୍ୟ ବ୍ୟବହାର୍ଯ୍ୟ ଜିନିଷ କୋଦାଳ, ଲଙ୍ଗଳ, ଶଗଡ଼ ବଳା, କୁରାଢ଼ି, ଧାନକଟା ଦା’, ଶାବଳ, କଟୁରି, ଖଣତି ପାଇଁ କମାରଶାଳାର କାରିଗର ଉପରେ ନିର୍ଭର କରିବାକୁ ପଡୁଥିଲା। ଫଳରେ କମାରମାନେ ଲୁହା ଜିନିଷ ବିକ୍ରି କରି ନିଜ ପରିବାର ପ୍ରତିପୋଷଣ କରୁଥିଲେ। କେଉଁ ଆବହମାନ କାଳରୁ ଏହି କୌଳିକ ବୃତ୍ତି ଚାଲି ଆସୁଥିଲା ବେଳେ ବର୍ତ୍ତମାନ ତାହା ବୁଡ଼ି ଯିବାକୁ ବସିଲାଣି।
