ମୁମ୍ବାଇ,୨୮।୭ : ମହାରାଷ୍ଟ୍ରରେ କ୍ଷମତା ପରିବର୍ତ୍ତନ ହେବାର ପ୍ରାୟ ଏକ ମାସ ବିତିଗଲାଣି। କିନ୍ତୁ ଏପର୍ଯ୍ୟନ୍ତ କ୍ୟାବିନେଟର ସମ୍ପ୍ରସାରଣ ହୋଇନାହିଁ। ଏନେଇ ସମ୍ପ୍ରସାରଣ ନେଇ ଅନିଶ୍ଚିତତା ଲାଗି ରହିଛି। ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ୩୦ଜୁନ ରେ ଶପଥ ଗ୍ରହଣ କରିଥିଲେ। ସେବେଠାରୁ ପ୍ରଶ୍ନ ଉଠିଛି ଯେ କ୍ୟାବିନେଟର ସମ୍ପ୍ରସାରଣ କେବେ ହେବ? ଏଥିପାଇଁ ଅପେକ୍ଷା ସହିତ ନାନା ପ୍ରକାର ଚର୍ଚ୍ଚା ଜାରି ରହିଛି। ଅପରପକ୍ଷରେ ସିଏମ ଶିନ୍ଦେ ନିଜେ ଘୋଷଣା କରିଛନ୍ତି ଯେ ତିନି ଦିନ ମଧ୍ୟରେ କ୍ୟାବିନେଟ ବିସ୍ତାର କରିବାକୁ ଯାଉଛି। ଗଣମାଧ୍ୟମ ସହ କଥାବାର୍ତ୍ତା କରି ଶିନ୍ଦେ କହିଛନ୍ତି ଯେ କ୍ୟାବିନେଟ ବିସ୍ତାରରେ ବିଳମ୍ବ ହୋଇଛି। କିନ୍ତୁ ଏ ସମ୍ପର୍କରେ କୌଣସି ବିବାଦ ସାମ୍ନାକୁ ଆସିନାହିଁ। ଆସନ୍ତା ତିନି ଦିନ ମଧ୍ୟରେ କ୍ୟାବିନେଟ ବିସ୍ତାର କରାଯିବାର ସମ୍ଭାବନା ରହିଛି।
ତେବେ କ୍ୟାବିନେଟର ସମ୍ପ୍ରସାରଣ ସମ୍ପର୍କରେ ଦାବି କରାଯାଉଥିଲେ ମଧ୍ୟ ଏପର୍ଯ୍ୟନ୍ତ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ମଧ୍ୟରେ କୌଣସି ଚୁକ୍ତିନାମା ହୋଇନାହିଁ। କ୍ୟାବିନେଟର ସମ୍ପ୍ରସାରଣ ଗୋଟିଏ ପର୍ଯ୍ୟାୟରେ କିମ୍ବା ଦୁଇଟି ପର୍ଯ୍ୟାୟରେ କରାଯିବା ଉଚିତ କି ନାହିଁ ତାହା ସ୍ଥିର ହୋଇନାହିଁ। କୁହାଯାଉଛି ଯେ ଯଦି ଦୁଇଟି ଭିନ୍ନ ପର୍ଯ୍ୟାୟରେ କ୍ୟାବିନେଟକୁ ବିସ୍ତାର କରାଯାଏ, ତେବେ ୧୯ ଜଣ ମନ୍ତ୍ରୀଙ୍କୁ ସାମିଲ କରାଯିବ। ଏଥିରେ ୧୨ ଜଣ ଭାଜପାରୁ ଆସିଥିବାବେଳେ ଶିନ୍ଦେ କ୍ୟାମ୍ପର ୭ ଜଣ ନେତାଙ୍କୁ ମନ୍ତ୍ରୀ କରାଯାଇପାରେ। ଯଦି ଗୋଟିଏ ପର୍ଯ୍ୟାୟରେ ବିସ୍ତାର କରାଯାଏ, ତେବେ ୨୬ ଜଣ ଭାଜପା ସଦସ୍ୟଙ୍କୁ ଅନ୍ତର୍ଭୁକ୍ତ କରାଯିବାର ଯୋଜନା ରହିଛି। ଏଥିରେ, ଶିନ୍ଦେଙ୍କ ଗୋଷ୍ଠୀର ୧୪-୧୫ ନେତା ଏକ ସୁଯୋଗ ପାଇବେ।
ଇତିମଧ୍ୟରେ ଏକନାଥ ଶିନ୍ଦେ ବୁଧବାର ରାତିରେ ଦିଲ୍ଲୀ ଯିବା ପାଇଁ ଥିବା ତାଙ୍କ କାର୍ଯ୍ୟକ୍ରମକୁ ସ୍ଥଗିତ ରଖିଛନ୍ତି। ଏଥିପାଇଁ କୌଣସି କାରଣ ଦିଆଯାଇ ନାହିଁ। କ୍ୟାବିନେଟ ସମ୍ପ୍ରସାରଣକୁ ନେଇ କଳ୍ପନା ଜଳ୍ପନାର ଅନ୍ତ ଘଟାଇ ଶିନ୍ଦେଙ୍କ ଦିଲ୍ଲୀ ଗସ୍ତ ଘୋଷଣା ପରେ ଚର୍ଚ୍ଚା ହେଉଥିଲା ଯେ ଭାଜପାର ବରିଷ୍ଠ ନେତାମାନଙ୍କୁ ଭେଟିବା ପରେ ଶିନ୍ଦେ ଶୀଘ୍ର ନିଷ୍ପତ୍ତି ନେଇପାରନ୍ତି।
