ଶ୍ରୀନଗର,୨୩।୫:ଆସନ୍ତା ମାସରେ ଦକ୍ଷିଣ ଆଫ୍ରିକା ବିପକ୍ଷରେ ଟିମ ଇଣ୍ଡିଆକୁ ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳାଯିବ। ଏହି ସିରିଜ ପାଇଁ ବିସିସିଆଇ ପକ୍ଷରୁ ଭାରତୀୟ ଦଳ ଘୋଷଣା କରାଯାଇଛି। ଆଶା କରାଯାଉଥିବା ପରି ଏହି ଦଳରେ ଦ୍ରୁତ ବୋଲର ଉମରାନ ମଲିକଙ୍କୁ ସ୍ଥାନ ଦିଆଯାଇଛି। ଆଇପିଏଲରେ ଉମରାନ ଭଲ ପ୍ରଦର୍ଶନ କରିବାର ଫଳ ପାଇଛନ୍ତି। ଉମରାନଙ୍କ ଚୟନରେ ତାଙ୍କ ପିତା ବହୁତ ଖୁସି ଅଛନ୍ତି।
ପୁଅର ସଫଳତାରେ ଉମରାନଙ୍କ ପିତା ଅବଦୁଲ ରସିଦ ଭାବପ୍ରବଣ ହୋଇପଡିଛନ୍ତି। ରସିଦ ରାସ୍ତା କଡ଼ରେ ଫଳ ବିକ୍ରି କରନ୍ତି। ସେ ସର୍ବଦା ତାଙ୍କ ପୁଅକୁ ଭାରତୀୟ ଦଳରେ ମନୋନୀତ ହେବାର ସ୍ବପ୍ନ ଦେଖୁଥିଲେ। ସେ କହିଛନ୍ତି, ଆଇପିଏଲରେ ପୁଅର ପ୍ରଦର୍ଶନ ଏବଂ ସମଗ୍ର ଦେଶ ତାକୁ ସମର୍ଥନ କରିଥିବା ଦେଖି ଆମେ ସମସ୍ତେ ଗର୍ବିତ। ଆଜି ଆମ ବଳିଦାନର ଫଳ ମିଳିଛି। ମୋର ବିଶ୍ୱାସ ଥିଲା ଦିନେ ସେ ସଫଳତା ପାଇବ। ଦକ୍ଷତା ଏବଂ ପ୍ରତିଭା ଉପରେ ତା’ ନିଜର ସମ୍ପୂର୍ଣ୍ଣ ବିଶ୍ୱାସ ଥିଲା ଏବଂ ଏଥିପାଇଁ ସେ କଠିନ ପରିଶ୍ରମ କରିଥିଲା। ସେ କଠିନ ପରିଶ୍ରମ କଲା ଏବଂ ଆଲ୍ଲା ତାକୁ ସମର୍ଥନ କଲେ। ତେଣୁ ସଫଳତାର ଶ୍ରେୟ ମୁଁ ନେବାକୁ ଯୋଗ୍ୟ ନୁହେଁ ବୋଲି ରସିଦ କହିଛନ୍ତି।
ଜମ୍ମୁ କଶ୍ମୀରର ୨୧ ବର୍ଷୀୟ ଉମରାନ ଆଇପିଏଲର ୧୩ଟି ମ୍ୟାଚରେ ୨୧ଟି ଉଇକେଟ ନେଇଥିଲେ। କିନ୍ତୁ ଉଇକେଟ ଅପେକ୍ଷା ସେ ୧୫୦ କିଲୋମିଟର ବେଗରେ ବୋଲିଂ କରି ଚର୍ଚ୍ଚାରେ ଥିଲେ। ଦଳର ଚୟନ ପରେ ସେ କହିଛନ୍ତି, ମୋତେ ଅଭିନନ୍ଦନ ଜଣାଇବାକୁ ବହୁ ସଂଖ୍ୟାରେ ଲୋକ ଆସୁଛନ୍ତି। ମୁଁ ଏବେ ଘରକୁ ଯାଉଛି। ଜାତୀୟ ଦଳର ଜର୍ସି ପିନ୍ଧିବା ଅପେକ୍ଷା ଜୀବନରେ ଆଉ କ’ଣ ବଡ଼ ସଫଳତା ହୋଇପାରେ।
ଦକ୍ଷିଣ ଆଫ୍ରିକା ବିପକ୍ଷ ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜ ପାଇଁ ଭାରତୀୟ ଦଳରେ ଚୟନ ହୋଇଥିବାରୁ ଜମ୍ମୁ କଶ୍ମୀରର ଲେଫ୍ଟନାଣ୍ଟ ଗଭର୍ନର ମନୋଜ ସିହ୍ନା ମଧ୍ୟ ଉମରାନଙ୍କୁ ଅଭିନନ୍ଦନ ଜଣାଇଛନ୍ତି।
