ୟୁଏଇ,୨୦।୮:ସଂଯୁକ୍ତ ଆରବ ଏମିରେଟ୍ସ (ୟୁଏଇ) କ୍ରିକେଟ ଦଳ ଇତିହାସ ସୃଷ୍ଟି କରିଛି। ପ୍ରଥମ ଥର ପାଇଁ ଅନ୍ତର୍ଜାତୀୟ କ୍ରିକେଟରେ ନ୍ୟୁଜିଲାଣ୍ଡକୁ ପରାସ୍ତ କରିଛି। ୟୁଏଇ ତିନି ଟି-୨୦ ସିରିଜର ଦ୍ୱିତୀୟ ମ୍ୟାଚରେ କିୱି ଦଳକୁ ୭ ଉଇକେଟରେ ପରାସ୍ତ କରିଛି। ଅନ୍ତର୍ଜାତୀୟ ଟି-୨୦ ଇତିହାସରେ ଦୁଇ ଦଳ ମଧ୍ୟରେ ଏହା ଦ୍ୱିତୀୟ ମ୍ୟାଚ ଥିଲା। ଏହାପୂର୍ବରୁ ସିରିଜର ଓପନିଂ ମ୍ୟାଚରେ ନ୍ୟୁଜିଲାଣ୍ଡ ୧୯ ରନରେ ଜିତିଥିଲା। ୧୯୯୬ରେ ଏପର୍ଯ୍ୟନ୍ତ ଉଭୟ ଦିନିକିଆରେ ମୁହାଁମୁହିଁ ହୋଇଥିଲେ, ଯାହା ନ୍ୟୁଜିଲାଣ୍ଡ ଜିତିଥିଲା। ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୮ ଉଇକେଟ ହରାଇ ୧୪୨ ରନ୍ ସ୍କୋର କରିଥିଲା। ଜବାବରେ ୟୁଏଇ ୧୫.୪ ଓଭରରେ ୩ ଉଇକେଟ ହରାଇ ୧୪୪ ରନ୍ କରିଥିଲା।
ପ୍ରଥମ ଥର ପାଇଁ ନ୍ୟୁଜିଲ୍ୟାଣ୍ଡ ଏକ ଆସୋସିଏଟ୍ ଦଳ ବିପକ୍ଷରେ ହାରିଛି। ଏହା ବ୍ୟତୀତ ଅନ୍ତର୍ଜାତୀୟ କ୍ରିକେଟରେ ଏକ ରେକର୍ଡ କରାଯାଇଥିଲା। ଆଇସିସିର ସମସ୍ତ ୧୨ ଜଣ ପୂର୍ଣ୍ଣକାଳୀନ ସଦସ୍ୟ ଦଳ ବର୍ତ୍ତମାନ ଆସୋସିଏଟ୍ ଦଳ ବିପକ୍ଷରେ ହାରିଛନ୍ତି। ଟି-୨୦ରେ ୟୁଏଇର ଏହି ବିଜୟ ଦୀର୍ଘ ଦିନ ପାଇଁ ସ୍ମରଣୀୟ ହୋଇ ରହିବ । ଆଇସିସି ଟି-୨୦ ର଼୍ୟାଙ୍କିଙ୍ଗରେ ନ୍ୟୁଜିିଲାଣ୍ଡ ଦଳ ତୃତୀୟ ସ୍ଥାନରେ ଏବଂ ୟୁଏଇ ୧୬ତମ ସ୍ଥାନରେ ରହିଛି।
