କୋଲକାତା,୨୪।୨: ପଶ୍ଚିମବଙ୍ଗରେ ରାତି ୨ଟାରେ ବିଧାନସଭା ଅଧିବେଶନ ଡକାଇଲେ ରାଜ୍ୟପାଳ। ଏହାକୁ ଶୁଣିଲେ ଯେକେହିବି ଆଶ୍ଚର୍ଯ୍ୟ ହୋଇଯିବେ। ହେଲେ କଥାଟି ହେଉଛି ଏଭଳି, କେବଳ ଟାଇପିଂ ତ୍ରୁଟି ଯୋଗୁ ବିଧାନସଭା ଅଧିବେଶନ ରାତି ୨ଟାରେ ଆରମ୍ଭ ହେବ ବୋଲି ଏକ ପ୍ରେସ୍ ବିଜ୍ଞପ୍ତିରେ ପ୍ରକାଶ ପାଇଥିଲା। ସୂଚନା ମୁତାବକ, ପଶ୍ଚିମବଙ୍ଗ ସରକାରଙ୍କ ପକ୍ଷରୁ ବିଧାନସଭା ଅଧିବେଶନ ଆରମ୍ଭ କରିବାକୁ ରାଜ୍ୟପାଳଙ୍କ ନିକଟକୁ ପ୍ରସ୍ତାବ ପଠାଯାଇଥିଲା। ସେଥିରେ ମାର୍ଚ୍ଚ ୭ ଅର୍ଥାତ୍ ସୋମବାର ଦିନ ୨ଟା ପରିବର୍ତ୍ତେ ରାତି ୨ଟା ଟାଇପ୍ ହୋଇଯାଇଥିଲା। ଗୁରୁବାର ଦ୍ୱିପ୍ରହରରେ ଏନେଇ ରାଜ୍ୟପାଳ ଜଗଦୀପ ଧନଖର ରାଜ୍ୟ ମୁଖ୍ୟ ଶାସନ ସଚିବଙ୍କୁ ଡକାଇଥିଲେ। କିନ୍ତୁ ଉକ୍ତ ବରିଷ୍ଠ ଅଧିକାରୀ ରାଜ୍ୟପାଳଙ୍କୁ ଭେଟିବାକୁ ଯାଇ ନ ଥିଲେ। ଯାହାଫଳରେ ରାଜ୍ୟପାଳ ଏକ ଟୁଇଟ କରି କହିଛନ୍ତି, ସେ କ୍ୟାବିନେଟ ପ୍ରସ୍ତାବକୁ ଅନୁମତି ପ୍ରଦାନ କରିଛନ୍ତି। କିନ୍ତୁ ରାତି ୨ ଟାରେ ଅଧିବେଶନ ଆରମ୍ଭ କରିବା ପ୍ରସ୍ତାବକୁ ସେ ଅସ୍ବାଭାବିକ ମନେ କରୁଛନ୍ତି। ଯଦି ପଶ୍ଚିମବଙ୍ଗ ବିଧାନସଭା ରାତି ୨ଟାରୁ ଆରମ୍ଭ ହୁଏ, ତେବେ ଏହା ଦେଶରେ ଏକ ନିଆରା ମାମଲା ହେବ ବୋଲି ରାଜ୍ୟପାଳ ଉକ୍ତ ଟୁଇଟରେ ଉଲ୍ଲେଖ କରିଛନ୍ତି। ଅନ୍ୟପଟେ ଏହି ଟୁଇଟର ପ୍ରତିକ୍ରିୟା ରଖି ବିଧାନସଭା ବାଚସ୍ପତି ବିମନ ବାନାର୍ଜୀ କହିଛନ୍ତି, ଏହା ଏକ ପ୍ରକାର ଟାଇପିଂ ତ୍ରୁଟି। ରାଜ୍ୟପାଳ ଏହାକୁ ସଂଶୋଧନ କରିପାରିଥାନ୍ତେ, କିନ୍ତୁ ସେ ରାତି ୨ଟାରେ ଟାଇପିଂ ତ୍ରୁଟିକୁ ଗ୍ରହଣ କରିଛନ୍ତି ଯେତେବେଳେ ବିଧାନସଭା ଅଧିବେଶନ ରାତିରେ ହିଁ ଆରମ୍ଭ ହେବ ବୋଲି ବାଚସ୍ପତି କହିଛନ୍ତି। ଅନ୍ୟପକ୍ଷରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ରାଜ୍ୟପାଳଙ୍କ ବିବାଦ ମଧ୍ୟରେ ରାଜଭବନ ପକ୍ଷରୁ ଏଭଳି ଅସ୍ବାଭାବିକ ଅନୁମୋଦନ ମିଳିବା ପଶ୍ଚିମବଙ୍ଗ ରାଜନୀତିରେ ଝଡ଼ ସୃଷ୍ଟି ହୋଇଛି।
