କେନ୍ଦୁଝର,୪।୧୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଦୈତାରୀ ଲୁହାପଥର ଖଣିରେ ଲୋଡିଂ ଟୋକନ ବଣ୍ଟନକୁ ନେଇ ଦୁଇ ଟ୍ରକ ମାଲିକ ସଂଘ ମୁହାଁମୁହିଁ ହୋଇଛନ୍ତି। ଏନେଇ ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି। ଘଟଣାସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଛି। ଅତିରିକ୍ତ ଏସ୍ପିଙ୍କ ନେତୃତ୍ୱରେ ୨ ଏସ୍ଡିପିଓ, ୪ ଇନ୍ସପେକ୍ଟରଙ୍କ ସହ ୫ ପ୍ଲାଟୁନ ଫୋର୍ସ ମୁତୟନ ହୋଇଛନି
ପ୍ରକାଶ ଯେ, ଉକ୍ତ ଖଣିରୁ ଲୁହାପଥର ପରିବହନ ପାଇଁ ଏକ ଟ୍ରକ ସଂଘ ରହିଥିଲା। ଏବେ ଆଉ ଏକ ନୂଆ ଟ୍ରକ ମାଲିକ ସଂଘ ଗଠନ କରାଯାଇଛି । କିଛି ଟ୍ରକ ମାଲିକ ଖଣିରୁ ଲୁହାପଥର ପରିବହନ ଦାୟିତ୍ୱ ହାତେଇବା ପାଇଁ ନୂଆ ସଂଘ କରିଥିବା ଏବଂ ଖଣି କାର୍ଯ୍ୟରୁ ପୁରୁଣା ସଂଘକୁ ବାଦ୍ ଦେବାକୁ ଉଦ୍ୟମ କରୁଥିବା ଅଭିଯୋଗ ହେଇଛି ।
ଏନେଇ ସୋମବାର ଟୋକନ ବଣ୍ଟନକୁ ନେଇ ଦୁଇ ସଂଘ ମଧ୍ୟରେ ମହାଁମୁହିଁ ପରିସ୍ଥିତି ଉପୁଜି ଥିଲା । ନୂଆ ସଂଘ ସମ୍ପୂର୍ଣ୍ଣ ବେଆଇନ ଏବଂ ସରକାରୀ ଅଧିକାରୀଙ୍କୁ ଚଞ୍ଚକତା କରି ଏହାର ପଞ୍ଜିକରଣ କରିଥିବା ପୁରୁଣା ସଂଘର ସଦସ୍ୟମାନେ ଅଭିଯୋଗ କରୁଥିବା ବେଳେ ପୁରୁଣା ଟ୍ରକ ମାଲିକ ସଂଘ ବ୍ୟାପକ ଦୁର୍ନୀତିରେ ବୁଡି ରହି ଟ୍ରକ ମାଲିକଙ୍କୁ ଶୋଷଣ କରୁଥିବା ଏବଂ ସ୍ଥାନୀୟ ଅଞ୍ଚଳର ବିକାଶ କରୁ ନ ଥିବା ନୂଆ ସଂଘର ସଦସ୍ୟମାନେ ଅଭିଯୋଗ କରିଛନ୍ତି ।
ଏହାକୁ ନେଇ ଦୈତାରୀ ଲୁହାପଥର ଖଣିରେ ଉତ୍ତେଜନା ଲାଗି ରହିଛି । ଏହି ଘଟଣାକୁ ନେଇ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି। ଏପରିକି ପୋଲିସ ରାସ୍ତାରେ ଗାଡ଼ି ଅଟକାଇ ଯାତାୟତ କରୁଥିବା ଲୋକଙ୍କୁ ଯାଞ୍ଚ କରି ଛାଡୁଥିବା ଦେଖିବାକୁ ମିଳିଛି। ଆଇନ ଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା ରହୁଥିବାରୁ ପୋଲିସ ଘଟଣାସ୍ଥଳରେ ସଜାଗ ରହିଛି। ଅତିରିକ୍ତ ଏସ୍ପି ଦିଲୀପ କୁମାର ନାୟକ କହିଛନ୍ତି, ପରିସ୍ଥିତି ଏବେ ଶାନ୍ତିପୂର୍ଣ୍ଣ ରହିଛି। ନିଷ୍ପତ୍ତି ଅନୁଯାୟୀ ଖଣିଜ ପଥର କ୍ରେତା ଟୋକନ୍ ବାଣ୍ଟୁଛନ୍ତି। ଫଳରେ ଲୁହାପଥର ପରିବହନ ସ୍ବାଭାବିକ ରହିଛି।
