ନୂଆଦିଲ୍ଲୀ,୭ା୨: କେନ୍ଦ୍ର କୃଷି ସଚିବ ସଞ୍ଜୟ ଅଗ୍ରଓ୍ବାଲ ଓ ଶକ୍ତି ସଚିବ ଆଲୋକ କୁମାରଙ୍କୁ ଖୁବ୍ଶୀଘ୍ର ସେମାନଙ୍କ କ୍ୟାଡର ରାଜ୍ୟ ଉତ୍ତର ପ୍ରଦେଶକୁ ଫେରାଇ ନିଆଯାଇପାରେ। ଏହି ଦୁଇ ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀ ୨,୨୬୮ କୋଟି ଟଙ୍କାର ଭବିଷ୍ୟନିଧି ପାଣ୍ଠି (ପିଏଫ୍) ଦୁର୍ନୀତି ମାମଲାରେ ସମ୍ପୃକ୍ତ ଥିବା ଅଭିଯୋଗ ରହିଛି। ୟୁପି ବିଧାନସଭା ନିର୍ବାଚନକୁ ମାତ୍ର ୪ ଦିନ ବାକିଥିବାବେଳେ ଏହି ଦୁର୍ନୀତିର ତଦନ୍ତ ପାଇଁ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ସରକାରଙ୍କୁ ଅନୁମତି ମାଗିଛି। ଦୁଇ ସିନିୟର ଅଫିସରଙ୍କ ବିରୋଧରେ ତଦନ୍ତ କରାଗଲେ ରାଜ୍ୟର ଯୋଗୀ ଓ କେନ୍ଦ୍ରର ମୋଦି ସରକାରଙ୍କୁ ଲଜ୍ଜିତ ହେବାକୁ ପଡ଼ିବ। ତେଣୁ କେନ୍ଦ୍ର ସରକାର ସଞ୍ଜୟ(୧୯୮୪ ବ୍ୟାଚ୍) ଏବଂ ଆଲୋକ (୧୯୮୮ ବ୍ୟାଚ୍)ଙ୍କୁ କୌଣସି ମୁହୂର୍ତ୍ତରେ ୟୁପିକୁ ପ୍ରତ୍ୟର୍ପଣ କରିପାରନ୍ତି ବୋଲି କେତେକ ଜାତୀୟ ଗଣମାଧ୍ୟମରେ ଚର୍ଚ୍ଚା ଜୋର୍ ଧରିଛି। କେନ୍ଦ୍ର ସରକାର ଆଇଏଏସ୍ କ୍ୟାଡର ରୁଲ୍ସ, ୧୯୫୪ରେ ସଂଶୋଧନ ଆଣି ରାଜ୍ୟଗୁଡ଼ିକର ବିନା ଅନୁମତିରେ ଅମଲାତନ୍ତ୍ରୀମାନଙ୍କୁ କେନ୍ଦ୍ରୀୟ ଡେପୁଟେଶନକୁ ନେବା ପାଇଁ ମସୁଧା ଚଳାଉଥିବାବେଳେ ଦୁର୍ନୀତି ଅଭିଯୁକ୍ତ ବିଭିନ୍ନ ମନ୍ତ୍ରଣାଳୟର ସଚିବମାନଙ୍କୁ କ୍ୟାଡର ରାଜ୍ୟକୁ ଫେରାଇବା ଉଦ୍ୟମ ସମସ୍ତଙ୍କୁ ଚକିତ କରିଛି।
ପ୍ରକାଶିତ ରିପୋର୍ଟ ଅନୁସାରେ ଉତ୍ତର ପ୍ରଦେଶ ପାଓ୍ବାର କର୍ପୋରେଶନ ଲିମିଟେଡ୍ (ୟୁପିପିସିଏଲ୍)ର ଭବିଷ୍ୟନିଧି ପାଣ୍ଠିକୁ ଘରୋଇ କମ୍ପାନୀ ଦଓ୍ବୋନ ହାଉସିଂ ଫାଇନାନ୍ସ ଲିମିଟେଡ୍ (ଡିଏଚ୍ଏଫ୍ଏଲ୍)ରେ ଦୁଇ ବରିଷ୍ଠ ଅଧିକାରୀ ଆଲୋକ ଓ ସଞ୍ଜୟ ନିବେଶ କରିଥିଲେ। ପରେ ଡିଏଚ୍ଏଫ୍ଏଲ୍ କେତେକ ଜାଲ୍ କମ୍ପାନୀ ଜରିଆରେ ୩୧,୦୦୦ କୋଟି ଟଙ୍କା ବ୍ୟାଙ୍କ ଋଣ ଉଠାଇ ଚଳୁ କରିଦେଇଥିଲା। ଡିଏଚ୍ଏଫ୍ଏଲ୍ କମ୍ପାନୀର ସ୍ପିମ୍ରେ ୟୁପିପିସିଏଲ୍ର ୪,୧୨୨ କୋଟି ଟଙ୍କା ଶର୍ଟ-ଟର୍ମ ଫିକ୍ସଡ୍ ଡିପୋଜିଟ୍ କରାଯାଇଥିଲା। ଡିଏଚ୍ଏଫ୍ଏଲ୍ ସେଥିରୁ ୧,୮୫୪ କୋଟି ଟଙ୍କା ଏଫ୍ଡି ମାଚୁରିଟି ସମୟରେ ଫେରାଇଥିବାବେଳେ ୨,୨୬୮ କୋଟି ଟଙ୍କା ଦେଇନାହିଁ। ସଞ୍ଜୟ ଅଗ୍ରଓ୍ବାଲ ୨୦୧୩ରୁ ୨୦୧୭ ମଧ୍ୟଭାଗ ପର୍ଯ୍ୟନ୍ତ ୟୁପିପିସିଏଲ୍ ଅଧ୍ୟକ୍ଷ ଭାବେ କାର୍ଯ୍ୟ କରିଥିଲେ। ସେହି ସମୟରେ ସେ ୟୁପିପିସିଏଲ୍ କର୍ମଚାରୀମାନଙ୍କ ଭବିଷ୍ୟନିଧି ପାଣ୍ଠି ଅର୍ଥକୁ ଡିଏଚ୍ଏଫ୍ଏଲ୍ରେ ନିବେଶ କରିଥିଲେ। ଡିଏଚ୍ଏଫ୍ଏଲ୍ କମ୍ପାନୀରେ ନିବେଶ ହେଉଛି ସରକାରୀ ଗାଇଡ୍ଲାଇନ୍ର ଉଲ୍ଲଂଘନ। କାରଣ ପିଏଫ୍ ଟଙ୍କାକୁ ସିଡ୍ୟୁଲ୍ ବ୍ୟାଙ୍କ ଭାବେ ମାନ୍ୟତା ପାଇ ନ ଥିବା କୌଣସି ଅର୍ଥ ଲଗାଣକାରୀ ସଂସ୍ଥାରେ ନିବେଶ କରାଯାଇପାରିବ ନାହିଁ ବୋଲି ନିୟମ ରହିଛି। ସଞ୍ଜୟ ଅଗ୍ରଓ୍ବାଲ କେନ୍ଦ୍ରୀୟ ଡେପୁଟେଶନରେ ଯିବା ପରେ ଆଲୋକ କୁମାରଙ୍କୁ ୟୁପିପିସିଏଲ୍ ଅଧ୍ୟକ୍ଷ ଭାବେ ନିଯୁକ୍ତ କରାଯାଇଥିଲା। ଆଲୋକ ମଧ୍ୟ ସଞ୍ଜୟଙ୍କୁ ଅନୁସରଣ କରି ୟୁପିପିସିଏଲ୍ ଭବିଷ୍ୟନିଧି ପାଣ୍ଠିକୁ ଡିଏଚ୍ଏଫ୍ଏଲ୍ କମ୍ପାନୀର ସ୍କିମ୍ଗୁଡ଼ିକରେ ନିବେଶ କରିବାରେ ଲାଗିଥିଲେ। ଦୁଇବର୍ଷ ପରେ ସେ କେନ୍ଦ୍ରୀୟ ଡେପୁଟେଶନରେ ଯାଇଥିବାବେଳେ ଅଦ୍ୟାବଧି ଶକ୍ତି ସଚିବ ଭାବେ କାର୍ଯ୍ୟରତ। ଦୁଇ ବରିଷ୍ଠ ଅଧିକାରୀଙ୍କ ବେଆଇନ ଅର୍ଥ ନିବେଶ ମାମଲାରେ ସିବିଆଇ ପକ୍ଷରୁ ତଦନ୍ତ ନିମନ୍ତେ ସ୍ବରାଷ୍ଟ୍ର ମନ୍ତ୍ରଣାଳୟକୁ ଅନୁମତି ମଗାଯାଇଥିବା କୁହାଯାଉଛି।
