ତିହିଡି଼,୨୨।୧୧(ସଞ୍ଜିତ ବଳ):ଭଦ୍ରକ -ଚାନ୍ଦବାଲି ରାଜ୍ୟ ରାଜପଥର ପୀରହାଟ ଥାନା ଅଧୀନ ସିନ୍ଦୋଳ ଠାରେ ଶନିବାର ଏକ ମର୍ମନ୍ତୁଦ ଦୁର୍ଘଟଣା ଘଟିଛି । ଏକ ସ୍କୁଟିକୁ ଯାତ୍ରୀବାହୀ ବସ୍ ଧକ୍କା ଦେବା ଫଳରେ ଘଟଣାସ୍ଥଳରେ ୨ ସ୍କୁଟି ଆରୋହୀଙ୍କ ମୃତ୍ୟୁ ଘଟିଛି। ମୃତ ସ୍କୁଟି ଆରୋହୀଙ୍କ ନାଁ ଗୋଲେଖ ଦାସ (୪୫) ଓ ଦୈତାରୀ ପୁହାଣ (୩୮) ଏବଂ ତାଙ୍କ ଘର ତିହିଡି଼ ଥାନା ସୟା ପଞ୍ଚାୟତ ଅଧୀନ ବାଲିଚତୁରୀ ଗ୍ରାମରେ ବୋଲି ଜଣାପଡିଛି। ତେବେ ଏହି ଅଭାବନୀୟ ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିବା ବେଳେ ଉତ୍ତ୍ୟକ୍ତ ଲୋକମାନେ ରାସ୍ତା ଅବରୋଧ କରିଛନ୍ତି । ତିହିଡି଼ ଥାନା ଆଇଆଇସି ସତ୍ୟବ୍ରତ ଗ୍ରହାଚାର୍ଯ୍ୟ, ପୀରହାଟ ଥାନା ଆଇଆଇସି ରୋଜାଲିନ ବେହେରା ପ୍ରମୁଖ ଉତ୍ତେଜନାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ ମଧ୍ୟ ରାସ୍ତାରୋକୋ ଅବ୍ୟାହତ ଥିବା ଜଣାଯାଇଛି । ଅତିରିକ୍ତ ତହସିଲଦାର ନମିତା ଧଳ ମଧ୍ୟ ଘଟଣାସ୍ଥଳରେ ଉପସ୍ଥିତ ଥିଲେ। ପ୍ରକାଶ ଯେ ଗୋଲେଖ ଓ ଦୈତାରୀ ଘରୁ ଏକ ଅଲେଖ ମେଳାରେ ଯୋଗଦେବାକୁ ସ୍କୁଟି ଯୋଗେ ଚାନ୍ଦବାଲି ଯାଉଥିଲେ। ସିନ୍ଦୋଳ ନିକଟରେ ବିପରୀତ ଦିଗରୁ ଚାନ୍ଦବାଲିରୁ ଭୁବନେଶ୍ୱର ଅଭିମୁଖେ ଯାଉଥିବା ହାସାମ ନାମକ ଏକ ବସ (ନଂ ଓଡ଼ି ୦୫ ଏ ଡବ୍ଲ୍ୟୁ ୭୯୫୫) ତାଙ୍କୁ ଧକ୍କା ଦେଇଥିଲା। l ଯାହାଫଳରେ ଘଟଣାସ୍ଥଳରେ ସ୍କୁଟି ଆରୋହୀ ୨ଜଣଙ୍କ ମୃତ୍ୟୁ ଘଟିଥିଲା । ମୃତକଙ୍କ ମଧ୍ୟରୁ ଦୈତାରୀ ତିହିଡି଼ ବ୍ଲକ ଅଧ୍ୟକ୍ଷା ଅବନ୍ତୀ ଦାସଙ୍କ ଭାଇ ହୋଇଥିବା ବେଳେ ମୃତକ ୨ଜଣ ଅଲେଖ ଧର୍ମାବଲମ୍ବୀ ବୋଲି ଜଣାଯାଇଛି।
