ନରସିଂହପୁର,୨ା୬ (ସ୍ବ.ପ୍ର.): କଟକ ଜିଲା ଆଠଗଡ଼ ବନଖଣ୍ଡ ଅଧୀନ ନରସିଂହପୁର ପୂର୍ବାଞ୍ଚଳ ରେଞ୍ଜ ଜଙ୍ଗଲରେ ୨ ମାଈ ହାତୀ ଅସୁସ୍ଥ ହୋଇପଡ଼ିଥିବା ବନ ବିଭାଗ ପକ୍ଷରୁ ସୂଚନା ମିଳିଛି। ଏହି ୨ ଅସୁସ୍ଥ ହାତୀଙ୍କର ଚିକିତ୍ସା ଏବେ ଡାକ୍ତରୀ ଟିମ୍ ଦ୍ୱାରା ଜାରି ରହିଥିବା ଜଣାପଡିଛି। ରେଞ୍ଜ ଅଧୀନ ସେରମୁଣ୍ଡା ରିଜର୍ଭ ଜଙ୍ଗଲରେ ଗୋଟିଏ ମାଈ ହାତୀର ଆଗ ବାମ ଗୋଡ଼ରେ ଆଘାତ କାରଣରୁ ହାତୀଟି ଚାଲିପାରୁନାହିଁ ବୋଲି ବନ ବିଭାଗର କର୍ମଚାରୀ ଦେଖିବାକୁ ପାଇଥିଲେ। ଏହା ପରେ ବନ ବିଭାଗ ପକ୍ଷରୁ ହାତୀଟିର ଚିକିତ୍ସା ପାଇଁ ନରସିଂହପୁର ପ୍ରାଣୀ ଚିକିତ୍ସକ ଓ ସାତକୋଶିଆ ବନ୍ୟପ୍ରାଣୀ ଡାକ୍ତରଙ୍କ ସହାୟତା ନିଆଯାଇଛି। ଡାକ୍ତରୀ ଟିମ୍ ହାତୀଟିକୁ ପ୍ରଥମେ ପାଚିଲା ପଣସରେ ଔଷଧ ମିଶାଇ ଖାଇବାକୁ ଦେଇଥିଲେ। ହାତୀଟି ପଣସର କିଛି ଅଂଶ ଖାଇଥିବା ବେଳେ ବଳକା ଅଂଶକୁ ଫୋପାଡି ଦେଇଥିଲା। ସେହିଭଳି ବୁଧବାର ଓଲବ ରିଜର୍ଭର ଜଡାପଡା ଜଙ୍ଗଲରେ ଏକ ୧୫ ବର୍ଷୀୟା ମାଈ ହାତୀ ଅସୁସ୍ଥ ହୋଇପଡ଼ିଥିବା ବନ ବିଭାଗ ସୂତ୍ରରୁ ଖବର ମିଳିଛି। ହାତୀଟିର ପଛ ପାଖ ଡାହାଣ ଗୋଡ଼ରେ ଆଘାତ କାରଣରୁ ହାତୀଟି ଜଙ୍ଗଲ ଭିତରୁ ବାହାରି ଆସି ପରେଷ୍ଟ ବିଟ୍ ହାଉସ ନିକଟରେ ଧୀରେ ଧୀରେ ବୁଲୁଥିଲା। ଏହା ଦେଖିବା ପରେ ପୂର୍ବାଞ୍ଚଳ ବନ ବିଭାଗ ରେଞ୍ଜର ବିଭୁ ରଞ୍ଜନ ରାୟଙ୍କ ନେତୃତ୍ୱରେ ସାତକୋଶିଆ ବନ୍ୟପ୍ରାଣୀ ଚିକିତ୍ସକ ଟିମ୍ ସହ ନରସିଂହପୁର ପ୍ରାଣୀ ଚିକିତ୍ସକ ବିଜୟ କୁମାର ସେନାପତି ଘଟଣାସ୍ଥଳକୁ ଯାଇ ଅସୁସ୍ଥ ହାତୀଟିକୁ ପଣସ ମାଧ୍ୟମରେ ଔଷଧ ଖାଇବାକୁ ଦେଇଥିଲେ। ଆଠଗଡ଼ ଡିଏଫ୍ଓ ସୁଦର୍ଶନ ଯାଦବଙ୍କ ନିର୍ଦ୍ଦେଶକ୍ରମେ ନରସିଂହପୁର ଏସ୍ସିଏଫ୍ ଘନଶ୍ୟାମ ମୁଦୁଲି ଓ ରେଞ୍ଜର ବିଭୁ ରଞ୍ଜନ ରାୟ ଉଭୟ ସ୍ଥାନକୁ ଯାଇ ଅସୁସ୍ଥ ହାତୀ ୨ଟିର ଗତିବିଧି ଉପରେ ନଜର ରଖିବା ସହ ସେଠାରେ କର୍ମଚାରୀଙ୍କୁ ମୁତୟନ କରାଯାଇଛି। ଅସୁସ୍ଥ ହାତୀ ୨ଟିର ସ୍ବାସ୍ଥ୍ୟରେ ସାମାନ୍ୟ ପରିବର୍ତ୍ତନ ଆସିଥିବା ରେଞ୍ଜର ରାୟ ସୂଚନା ଦେଇଛନ୍ତି। ହାତୀ ୨ଟିର ଗୋଡ଼ରେ ଏଭଳି ଆଘାତ ହେବାର କାରଣ ଠିକ୍ ଜଣାପଡିନାହିଁ। ପ୍ରାଥମିକ ଚିକିତ୍ସାରେ ଯଦି ଭଲ ନ ହେଲା ତେବେ ହାତୀ ୨ଟିକୁ ଅଧିକ ଚିକିତ୍ସା ନିମନ୍ତେ ବ୍ୟବସ୍ଥା କରାଯିବ ବୋଲି ପ୍ରାଣୀ ଚିକିତ୍ସକ ସେନାପତି କହିଛନ୍ତି। ନରସିଂହପୁର ଜଙ୍ଗଲରେ ୬ ମାସ ମଧ୍ୟରେ ୬ଟି ହାତୀଙ୍କ ମୃତ୍ୟୁ ଘଟି ସାରିଲାଣି। ଏବେ ୨ଟି ହାତୀଙ୍କ ଗୋଡ଼ ସଂକ୍ରମିତ ହେବା ପରିବେଶବିତ୍ମାନଙ୍କୁ ଚିନ୍ତାର କାରଣ ହୋଇଛି ବୋଲି ଶିକ୍ଷାବିତ୍ ଦେବରାଜ ସ୍ବାଇଁ କହିଛନ୍ତି।
