ନୟାଗଡ଼ ଅଫିସ,୧୧।୪: ନୟାଗଡ଼ ମ୍ୟୁନିସିପାଲିଟି ଦେବୋତ୍ତର କଲୋନୀର ୧ନଂ. ଲେନ୍ ରାସ୍ତାପାର୍ଶ୍ୱରେ ଥିବା ଡ୍ରେନ ଭୁଶୁଡ଼ି ପଡ଼ିଛି। ବର୍ଷା ନ ହୋଇ ଡ୍ରେନ ଭୁଶୁଡି ପଡିବା ନିମ୍ନମାନର କାମକୁ ପ୍ରମାଣିତ କରୁଛି । ଆଗକୁ ବର୍ଷାଋତୁ ଥିବାରୁ ରାସ୍ତା ଓ ଡ୍ରେନର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଗୋଟିଏ ସ୍ଥାନରେ ଡ୍ରେନ ଭୁଶୁଡିବା ପରେ ସେଠାରେ ୪ରୁ ୫ଟି ସ୍ଲାବ୍ ପକାଯାଇ ସେହି ସ୍ଥାନକୁ ଲୁଚାଇବାକୁ ଉଦ୍ୟମ କରାଯାଇଛି । ଅନ୍ୟ ସ୍ଥାନରେ ବି ଡ୍ରେନ ଭୁଶୁଡ଼ି ପଡ଼ିବା ଅବସ୍ଥାରେ ରହିଛି। ଅନ୍ୟପକ୍ଷେ ୨ମାସ ତଳେ ନିର୍ବାଚନ ପୂର୍ବରୁ ଦେବୋତ୍ତର କଲୋନୀର ୧ନଂ. ଲେନ୍ ରାସ୍ତା ଓ ଡ୍ରେନ ନିର୍ମାଣ ହୋଇଥିଲା। ନୟାଗଡ଼- ଶରଣକୁଳ ରାସ୍ତାରୁ ଏହି ଲେନ୍କୁ ପ୍ରାୟ ୭୦୦ ମିଟର ରାସ୍ତା ନିର୍ମାଣ ହୋଇଥିଲା। ହେଲେ ସେଠାରେ ସୂଚନା ଫଳକ ଲଗା ଯାଇନାହିଁ । ଏଣୁ ରାସ୍ତା ପାଇ ଁକେତେ ଅନୁଦାନ ମଞ୍ଜୁର ହୋଇଛି ଜଣା ପଡ଼ିନାହିଁ । ଜିଲା ସଦର ମହକୁମା ସହରର ଏଭଳି ବିକାଶର ଚିତ୍ରକୁ ଅନୁଧ୍ୟାନ କଲେ ନିମ୍ନମାନର କାମ କରି ସରକାରୀ ଅନୁଦାନକୁ ଆତ୍ମସାତ୍ କରାଯାଉଥିବା ଅଭିଯୋଗ ଉଠିଛି । ନୟାଗଡ଼ ସହରର ବିକାଶକୁ ଆୟୁଧ କରି ବିଜେଡି ଗତ ପୌର ନିର୍ବାଚନରେ ୧୬ରୁ ୧୬ଟି ୱାର୍ଡରେ ନିଜର କାଉନସିଲର ପ୍ରାର୍ଥୀଙ୍କୁ ବିଜୟ କରାଇବାରେ ସଫଳ ହୋଇଛି । ଅନ୍ୟପକ୍ଷେ ସହରରେ ଉନ୍ନୟନ କାର୍ଯ୍ୟର ସମୀକ୍ଷା କରୁଛନ୍ତି ନୟାଗଡ଼ ବିଧାୟକ ତଥା ମନ୍ତ୍ରୀ ଅରୁଣ ସାହୁ, ଜିଲାପାଳ ପୋମା ଟୁଡୁ, ମ୍ୟୁନିସିପାଲିଟିର ଚେୟାରମ୍ୟାନ ନିରୁପମା ସାହୁ ଓ ନିର୍ବାହୀ ଅଧିକାରୀ ସ୍ବାତୀ ମିଶ୍ର । ଶନିବାର ବିଧାୟକ, ଜିଲାପାଳ, ଅଧ୍ୟକ୍ଷ ଓ ନିର୍ବାହୀ ଅଧିକାରୀ ସହରର ୩,୪,୫,୭,୮ ଓ ୯ନଂ. ୱାର୍ଡ ପରିକ୍ରମା କରି ଉନ୍ନୟନ କାର୍ଯ୍ୟ ସମୀକ୍ଷା କରିଛନ୍ତିଃ ଏହି ପରିପ୍ରେକ୍ଷୀରେ ସହରର ବିକାଶ ଉପରେ ଗୁରୁତ୍ୱ ଦିଆଯାଇଛି। ହେଲେ ଅଧିକାଂଶ ସମୟରେ ନିମ୍ନମାନର କାମ ହେଉଥିବା ଅଭିଯୋଗ ହୋଇଛି।
