ଚଣ୍ଡିଖୋଲ,୧୯ା୨(ଡି.ଏନ.ଏ.): ବଡ଼ଚଣା ବ୍ଲକରେ ନିର୍ବାଚନକୁ ନେଇ ବିଭିନ୍ନ ସ୍ଥାନରେ ହିଂସାତ୍ମକ ପରିସ୍ଥିତି ସୃଷ୍ଟି ହୋଇଛି। ଉକ୍ତ ବ୍ଲକର ବାଲିଚନ୍ଦ୍ରପୁର ଥାନା ଅନ୍ତର୍ଗତ ନଳୀପୁରଠାରେ ଜଣେ ଯୁବକଙ୍କୁ ମାଡ଼ ମାରିବା ଅଭିଯୋଗରେ ଉତ୍ତ୍ୟକ୍ତ ଲୋକେ ନଳୀପୁରଠାରେ ୨ ଘଣ୍ଟାକାଳ ୫୩ ନଂ. ଜାତୀୟ ରାଜପଥ ଅବରୋଧ କରିଥିଲେ। ଜିଲା ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ, ଡିଏସ୍ପି ସଂଗ୍ରାମ ଟୁଡୁ, ଏସ୍ଡିପିଓ ଚିନ୍ମୟ ନାୟକ, ତହସିଲଦାର ପ୍ରଦୀପ କୁମାର ସେଠୀ, ବାଲିଚନ୍ଦ୍ରପୁର ଥାନାଧିକାରୀ ରମାକାନ୍ତ ମୁଦୁଲି, ଧର୍ମଶାଳା ଥାନାଧିକାରୀ ରାକେଶ ତ୍ରିପାଠୀ, ଜେନାପୁର ଥାନାଧିକାରୀ ଉମାକାନ୍ତ ନାୟକ ପ୍ରମୁଖ ପହଞ୍ଚି ଲୋକଙ୍କୁ ବୁଝାଶୁଝା କରିବା ସହ ଅଭିଯୁକ୍ତଙ୍କୁ ଗିରଫ କରାଯିବାର ପ୍ରତିଶ୍ରୁତି ଦେଇଥିଲେ। ଏହାପରେ ଆନ୍ଦୋଳନକାରୀ ରାସ୍ତା ଅବରୋଧରୁ ଓହରି ଯାଇଥିଲେ।
ପୋଲିସ ସୂଚନା ମୁତାବକ, ନଳୀପୁର ନୋଡାଲ ବିଦ୍ୟାଳୟରେ ମତଦାନ ବୁଥ୍ ହୋଇଥିଲା। ତେବେ ସେଠାରେ ୨ ନମ୍ବର ବୁଥ୍ ଜବରଦଖଲ ହେଉଥିବା ନେଇ ଖବର ମିଳିବା ପରେ ନଳୀପୁର ଗ୍ରାମର ସେକ୍ ଫର୍ଜୁଲ ହକ୍ ସେଠାକୁ ଯାଇଥିଲେ। ସକ୍ ଫର୍ଜୁଲ ହକ୍ ସରପଞ୍ଚ ପ୍ରାର୍ଥୀ ହୋଇଥିବା ଅବଦୁଲ ଗନିଙ୍କ ସମର୍ଥକ ହୋଇଥିବାରୁ ସେ ଯାଇ ବୁଥ୍ ଜବରଦଖଲକୁ ବିରୋଧ କରିଥିଲେ। ତେବେ ସେଠାରେ ଅନ୍ୟତମ ସରପଞ୍ଚ ପ୍ରାର୍ଥୀ ରଶ୍ମିରଞ୍ଜନ ବଳ ଓ ତାଙ୍କ ସାନଭାଇ ମିହିର ରଞ୍ଜନ ବଳ, ପୂର୍ବତନ ସରପଞ୍ଚ ମନ୍ମଥକେଶରୀ ସାହେବରାୟ ଓ ଜ୍ୟୋତିରଞ୍ଜନ ବଳ ପ୍ରମୁଖ ଫର୍ଜୁଲଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏହାର ପ୍ରତିବାଦରେ ଅବଦୁଲ ଗନିଙ୍କ ହଜାର ହଜାର ସମର୍ଥକ ଜାତୀୟ ରାଜପଥ ଅବରୋଧ କରିବା ସହ ଟାୟାରଜାଳି ପ୍ରତିବାଦ କରିଥିଲେ। ୨ ନମ୍ବର ବୁଥକୁ ଜୋର ଜବରଦସ୍ତ ରଶ୍ମିରଞ୍ଜନ ବଳ ଓ ତାଙ୍କ ସମର୍ଥକ ଦଖଲ କରିଥିବା ଆନ୍ଦୋଳନକାରୀ ଅଭିଯୋଗ କରିଥିଲେ। ତେଣୁ ତୁରନ୍ତ ପୁନଃମତଦାନ କରିବାକୁ ଦାବି କରିଥିଲେ। ପ୍ରିଜାଇଡିଂ ଅଫିସର ଯଦି ବୁଥ ଦଖଲ ନେଇ ଅଭିଯୋଗ କରନ୍ତି ତେବେ ନିର୍ବାଚନ କମିଶନ ପୁନଃ ମତଦାନ ନେଇ ନିଷ୍ପତ୍ତି ନେବେ ବୋଲି ପ୍ରଶାସନିକ ଅଧିକାରୀ ସୂଚନା ଦେଇଥିଲେ।
