ମସ୍କୋ/ଓ୍ବାଶିଂଟନ୍,୧୯ା୨: ୟୁକ୍ରେନ୍ ସହ ରୁଷିଆ ମୁହାଁମୁହିଁ ସ୍ଥିତିରେ ଥିବାବେଳେ ଶନିବାର ନ୍ୟୁକ୍ଲିୟର ଡ୍ରିଲ୍ କରିବାକୁ ଶୁକ୍ରବାର ଏହାର ସେନା ପକ୍ଷରୁ ଘୋଷଣା କରାଯାଇଛି। ଏହାକୁ ୟୁକ୍ରେନ୍ ଆକ୍ରମଣର ପ୍ରାକ୍ ପ୍ରସ୍ତୁତି ବୋଲି ବିଶେଷଜ୍ଞମାନେ କହୁଛନ୍ତି। ଅନ୍ୟପକ୍ଷେ ରୁଷିଆ ବିରୋଧରେ ଆମେରିକା କଂଗ୍ରେସରେ ଏକ ସଂକଳ୍ପନାମା ସର୍ବସମ୍ମତି କ୍ରମେ ଗୃହୀତ ହୋଇଛି। ୟୁକ୍ରେନ୍ର ସ୍ବାଧୀନତା, ଅଖଣ୍ଡତା ଓ ସାର୍ବଭୌମତ୍ୱ ପ୍ରତି ସୀମାରେ ରୁଷିଆର ସାମରିକ ଉପସ୍ଥିତି ବିପଦ ସୃଷ୍ଟି କରିଥିବା ଏହି ରିଜୋଲ୍ୟୁଶନ୍ରେ ନିନ୍ଦା କରାଯାଇଛି।
ରୁଷିଆ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ରାଷ୍ଟ୍ରପତି ଭ୍ଳାଡିମିର ପୁଟିନ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କ୍ରିମିଆ ଉପଦ୍ୱୀପର କୃଷ୍ଣସାଗରରେ ଶନିବାର ଆଣବିକ ସମରାଭ୍ୟାସ କରାଯିବ। ଏଥିରେ ଅନେକ ଆନ୍ତଃ ମହାଦେଶୀୟ ଦୂରଗାମୀ କ୍ଷେପଣାସ୍ତ୍ର ଓ କ୍ରୁଜ୍ ମିଶାଇଲ୍ର ପୁନଃ ପରୀକ୍ଷଣ କରାଯିବ। ପଡ଼ୋଶୀ ୟୁକ୍ରେନ୍ ଉପରେ ରୁଷିଆ କିଛିଦିନ ଭିତରେ ଆକ୍ରମଣ କରିପାରେ ବୋଲି ଗୁରୁବାର ଆମେରିକା ରାଷ୍ଟ୍ରପତି ଜୋ ବାଇଡେନ୍ ସତର୍କ କରାଇଥିବାବେଳେ ପୁଟିନ୍ଙ୍କ ସେନା ଉପରୋକ୍ତ ବିବୃତି ଦେଇଛି। ୟୁକ୍ରେନ୍କୁ ତିନିପଟୁ ପ୍ରାୟ ୧୫୦,୦୦୦ ରୁଷିଆ ସୈନ୍ୟ ଘେରିରହିଛନ୍ତି। ରୁଷିଆ ନିଜର ପ୍ରାୟ ୬୦% ସାମରିକ ବଳ ୟୁକ୍ରେନ୍ ବିରୋଧରେ ନିୟୋଜିତ କରିଥିବା ପାଶ୍ଚାତ୍ୟ ଦେଶଗୁଡ଼ିକ ଆଶଙ୍କା କରିଛନ୍ତି। ଯୁଦ୍ଧ ଯୋଜନା ନାହିଁ ବୋଲି କ୍ରେମ୍ଲିନ ସଫେଇ ଦେଉଥିବାବେଳେ ୟୁକ୍ରେନ୍ ତଥା ଅନ୍ୟ ପୂର୍ବ ସୋଭିଏଟ୍ ରାଷ୍ଟ୍ରଗୁଡ଼ିକୁ ଆମେରିକା ଓ ଏହାର ସହଯୋଗୀ ନାଟୋରୁ ବାହାର କରନ୍ତୁ ବୋଲି ମସ୍କୋ ଦାବି କରିଛି। ସେହିପରି ପୂର୍ବ ୟୁରୋପରୁ ନାଟୋ ସୈନ୍ୟଙ୍କୁ ମଧ୍ୟ ହଟାଇବାକୁ ରୁଷିଆ ନିଜ ଦାବି ଦୋହରାଇଛି। ତେବେ ଏହି ଦାବିଗୁଡ଼ିକୁ ଓ୍ବାଶିଂଟନ ପ୍ରତ୍ୟାଖ୍ୟାନ କରିଛି। ୟୁକ୍ରେନ୍ ସମର୍ଥନରେ ଆମେରିକା କଂଗ୍ରେସର ସିନେଟରମାନେ ଏକାଠି ହୋଇ ସଂକଳ୍ପନାମା ପାରିତ କରିଛନ୍ତି। ସୀମାରେ ରୁଷିଆର ସୈନ୍ୟ ଠୁଳକୁ ଏଥିରେ କଡ଼ା ନିନ୍ଦା କରାଯାଇଛି।
