କେନ୍ଦ୍ରାପଡ଼ା, ୨୯ା୪ (ଜଗନ୍ନାଥ ଧଳ):କେନ୍ଦ୍ରାପଡ଼ା ବିଧାନସଭା ନିର୍ବାଚନ ରାଜନୀତି ଏକ ରୋଚକ ସ୍ଥିତିରେ ପହଞ୍ଚତ୍ଛି। ରାଜ୍ୟର ପ୍ରମୁଖ ୩ ରାଜନୈତିକ ଦଳର ବିଧାୟକ ପ୍ରାର୍ଥୀ ଘୋଷଣା ପରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେବାକୁ ଯାଉଥିବା ସ୍ପଷ୍ଟ ହୋଇଛି। ଏହି ନିର୍ବାଚନମଣ୍ଡଳୀ ପାଇଁ ଗଣେଶ୍ୱର ବେହେରା ବିଜେଡିରୁ ପ୍ରାର୍ଥୀ ହୋଇଛନ୍ତି। ସେହିପରି ତାଙ୍କର ଦୁଇ ମହିଳା ପ୍ରତିଦ୍ୱନ୍ଦ୍ୱୀ ଭାବେ କଂଗ୍ରେସର ଡ. ସିପ୍ରା ମଲ୍ଲିକ ଓ ଭାଜପାର ଗୀତାଞ୍ଜଳି ସେଠୀ ଦଳୀୟ ସଙ୍ଗଠନକୁ ଏକାଠି କରି ଗ୍ରାମ ଓ ସହରାଞ୍ଚଳରେ ପ୍ରଚାର କାର୍ଯ୍ୟ ଆରମ୍ଭ କରିଛନ୍ତି।
କେନ୍ଦ୍ରାପଡ଼ା ବ୍ଲକ ଓ ପୌରାଞ୍ଚଳ ସହ ପଟ୍ଟାମୁଣ୍ଡାଇର ୧୨ ପଞ୍ଚାୟତକୁ ନେଇ ଗଠିତ ଏହି ନିର୍ବାଚନ କ୍ଷେତ୍ରରେ ମୋଟ ଭୋଟରଙ୍କ ସଂଖ୍ୟା ୨,୨୮,୫୯୬। ଏଥିରୁ ପୁରୁଷଙ୍କ ସଂଖ୍ୟା ୧,୧୭,୯୪୧ ଓ ମହିଳାଙ୍କ ସଂଖ୍ୟା ୧,୧୦,୬୪୬। ପ୍ରାୟ ୭ ହଜାର ମହିଳାଙ୍କ ସଂଖ୍ୟା କମ୍ ରହିଥିଲେ ମଧ୍ୟ ମତଦାନ କେନ୍ଦ୍ରରେ ଏମାନଙ୍କ ଯୋଗଦାନ ପୁରୁଷଙ୍କଠାରୁ ଅଧିକ। ୨୦୧୭ ପଞ୍ଚାୟତ ନିର୍ବାଚନ, ୨୦୧୯ ସାଧାରଣ ନିର୍ବାଚନ ଓ ୨୦୨୨ ପଞ୍ଚାୟତ ନିର୍ବାଚନକୁ ଆକଳନ କଲେ ପୁରୁଷଙ୍କଠାରୁ ମହିଳାଙ୍କ ମତଦାନ ହାର ପ୍ରାୟ ୧୨ ପ୍ରତିଶତ ଅଧିକ। ଏହାକୁ ଦୃଷ୍ଟିରେ ରଖି ପ୍ରତ୍ୟେକ ରାଜନୈତିକ ଦଳ ରଣନୀତି ପ୍ରସ୍ତୁତ କରିଛନ୍ତି। ଅପରପକ୍ଷରେ ଚଳିତ ନିର୍ବାଚନରେ ପ୍ରାର୍ଥୀଙ୍କ ଦଳ ବଦଳ ଚର୍ଚ୍ଚାରେ ଅଛି। ଗଣେଶ୍ୱର କଂଗ୍ରେସ ଛାଡି ବିଜେଡି, ସିପ୍ରା ଓ ଗୀତାଞ୍ଜଳି ବିଜେଡି ଛାଡି କଂଗ୍ରେସ ଓ ଭାଜପାର ପ୍ରାର୍ଥୀ ହୋଇଛନ୍ତି। ୨୦୦୯ରେ ଗଣେଶ୍ୱରଙ୍କ ସହ ସିପ୍ରାଙ୍କ ମୁକାବିଲା ହୋଇଥିଲା। ସେହି ନିର୍ବାଚନରେ ସିପ୍ରା ବିଜୟୀ ହୋଇଥିଲେ। ସେହିପରି ଗୀତାଞ୍ଜଳି ୨୦୨୨ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପରେ ଜିଲା ପରିଷଦ ସଭାପତି ଭାବେ କାର୍ଯ୍ୟ ତୁଲାଇଛନ୍ତି। ଗଣେଶ୍ୱରଙ୍କ କଂଗ୍ରେସ ସମର୍ଥକ ବିଜେଡିରେ ଯୋଗ ଦେଇଛନ୍ତି। ଏହାସତ୍ତ୍ୱେ ବିଜେଡିର ଆଭ୍ୟନ୍ତର କନ୍ଦଳ ଅଦ୍ୟାବଧି ସମାଧାନ ହୋଇନାହିଁ। ଅସନ୍ତୁଷ୍ଟ ବିଜେଡି ନେତାଙ୍କ ମଧ୍ୟରେ ସମନ୍ବୟ ପାଇଁ ରଣନୀତି ପ୍ରସ୍ତୁତ ହୋଇଥିଲେ ମଧ୍ୟ ଅଦ୍ୟାବଧି କାର୍ଯ୍ୟକାରୀ ହୋଇନାହିଁ। ପ୍ରତ୍ୟେକ ପ୍ରାର୍ଥୀ ପାଇଁ ବିଧାନସଭା କ୍ଷେତ୍ରର ଆଞ୍ଚଳିକ ସମସ୍ୟା ସମାଧାନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପାଲଟିଛି। ପୂର୍ବରୁ ଏହି ବିଧାନସଭା କ୍ଷେତ୍ରରେ ମେଡିକାଲ କଲେଜ, କୃଷି ବିଶ୍ୱବିଦ୍ୟାଳୟ, କେନ୍ଦ୍ରାପଡ଼ା ସ୍ବୟଂଶାସିତ ମହାବିଦ୍ୟାଳୟକୁ ବିଶ୍ୱବିଦ୍ୟାଳୟ ମାନ୍ୟତା, କୃଷି କ୍ଷେତ୍ରକୁ ଜଳ ପରିଚାଳନା ଆଦିକୁ ନେଇ ଗଣେଶ୍ୱର ଆନ୍ଦୋଳନ କରୁଥିଲେ। ଏବେ ଏହି ସମସ୍ୟାକୁ କଂଗ୍ରେସ ପ୍ରାର୍ଥୀ ସିପ୍ରା ଓ ଭାଜପା ପ୍ରାର୍ଥୀ ଗୀତାଞ୍ଜଳି ଉଠାଇଲେଣି। ଏହାବ୍ୟତୀତ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଋଣ ଅବ୍ୟବସ୍ଥା, ମହିଳା ନିର୍ଯାତନା ଆଦିକୁ ବିରୋଧୀ ପ୍ରସଙ୍ଗ କରିଛନ୍ତି। ସେହିପରି ନିର୍ବାଚନମଣ୍ଡଳୀରେ ଧୋୟା ଅଞ୍ଚଳର ସମସ୍ୟା, ରାଶନ କାର୍ଡ, ଭତ୍ତା, ଆବାସ ଯୋଜନା ଆଦିର ଅବ୍ୟବସ୍ଥାକୁ ଶାସକ ଦଳ ପ୍ରାର୍ଥୀ ଗଣେଶ୍ୱରଙ୍କୁ ଅପ୍ରୀତିକର ପରିସ୍ଥିତିରେ ପକାଇବା ସମ୍ଭାବନା ଦେଖାଦେଇଛି। ତେବେ ଶାସକ ଦଳର ଉନ୍ନୟନ କାର୍ଯ୍ୟକୁ ଆଧାର କରି ଗଣେଶ୍ୱର ପ୍ରଚାର କାର୍ଯ୍ୟ ଆରମ୍ଭ କରିଛନ୍ତି। ରାଜନୀତିରେ ଅଭିଜ୍ଞ ପ୍ରାର୍ଥୀ ନିର୍ବାଚନ ମଇଦାନରେ ଥିବାରୁ ଆଗକୁ ଏହି ପ୍ରତିଦ୍ୱନ୍ଦ୍ୱିତା ତୀବ୍ର ହେବ ବୋଲି ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି।
