ଦିଗପହଣ୍ଡି,୫।୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଗୋକର୍ଣ୍ଣପୁର ପଞ୍ଚାୟତ ଅନଙ୍ଗପୁର ଗ୍ରାମରେ ଗତ ଏପ୍ରିଲ ୨୧ ତାରିଖ ସକାଳେ ପୈତୃକ ସମ୍ପତ୍ତି ପାଇଁ ପାରିବାରିକ ହିଂସା ଦେଖିବାକୁ ମିଳିଥିଲା । ଏହି କାରଣରୁ ବଡ଼ଭାଇ ବି.ଦଣ୍ଡ ରେଡ୍ଡୀ ତାଙ୍କ ସାନଭାଇ ବି.ନାରାୟଣ ରେଡ୍ଡୀଙ୍କୁ ଖଣ୍ଡାରେ ହାଣି ହତ୍ୟା ଉଦ୍ୟମ କରିଥିଲେ । ଛଡ଼ାଇବାକୁ ଯାଇଥିବା ଭଉଣୀ କେ. ସାରସା ରେଡ୍ଡୀଙ୍କ ମୁଣ୍ଡକୁ ମଧ୍ୟ ଦଣ୍ଡ ହାଣି ଦେଇଥିଲେ।
ପରେ ନାରାୟଣ, ନାରାୟଣଙ୍କ ସ୍ତ୍ରୀ କାବେରୀ, ଶାଳକ ବି. ଦେବେନ୍ଦ୍ର ରେଡ୍ଡୀ, ଭଉଣୀ ସାରସା ପ୍ରମୁଖ ଦଣ୍ଡ ଏବଂ ତାଙ୍କ ସ୍ତ୍ରୀ ଲଳିତାଙ୍କୁ ନିସ୍ତୁକ ମାଡ ମାରି ସଂଘବଦ୍ଧ ଭାବେ ହତ୍ୟା ଉଦ୍ୟମ କରିଥିଲେ । ଆହାତମାନଙ୍କୁ ଗୁରୁତର ଅବସ୍ଥାରେ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ସେମାନଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଏହି ଘଟଣାରେ ତଦନ୍ତକାରୀ ଅଧିକାରୀ ଏଏସଆଇ ଦିଲ୍ଲୀପ ଗରଡ଼ ରବିବାର ଅଭିଯୁକ୍ତ ୨ ଭାଇଙ୍କୁ ଥାନା ମାମଲା ନଂ.୧୭୩/୨୬ ଏବଂ ୧୭୪/୨୬ ଅନୁଯାୟୀ ପୃଥକ ମକଦ୍ଦମାରେ ଗିରଫ କରି କୋର୍ଟ ଚାଲାଣ କରିଛନ୍ତି ।
ଉଭୟଙ୍କ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତ ୨ ଭାଇଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି । ପୈତୃକ ସମ୍ପତ୍ତି ଭାଗ ବଣ୍ଟନକୁ କେନ୍ଦ୍ରକରି ଦୀର୍ଘଦିନ ହେଲା ନାରାୟଣ ଏବଂ ଦଣ୍ଡ ଦୁଇ ପରିବାର ମଧ୍ୟରେ ଗଣ୍ଡଗୋଳ ଲାଗିରହିଥିଲା। ପୂର୍ବରୁ ଗତ ଏପ୍ରିଲ ୧୯ ତାରିଖରେ ନାରାୟଣ ଘରେ ନଥିବା ବେଳେ ତାଙ୍କ ସ୍ତ୍ରୀ କାବେରୀଙ୍କୁ ଦେଢ଼ଶୁର ଦଣ୍ଡ , ଯାଆ ଲଳିତା ଏବଂ ତାଙ୍କ ସହଯୋଗୀ ଆନନ୍ଦ ସେଠୀ ଘର ସମ୍ମୁଖରେ ଅସଦାଚରଣ କରିବା ସହ ମାଡ଼ ମାରିଥିଲେ। ଏନେଇ କାବେରୀ ଦିଗପହଣ୍ଡି ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ ଅଭିଯୁକ୍ତମାନଙ୍କ ନାଁ ରେ ମକଦ୍ଦମା ରୁଜୁ କରିଥିଲେ।
ଘଟଣାର ଦୁଇଦିନ ପରେ ୨୧ ତାରିଖ ସକାଳ ପ୍ରାୟ ସାଢେ ୬ ଟାରେ ନାରାୟଣ କାମ ପାଇଁ ଯାଉଥିବା ବେଳେ ତାଙ୍କୁ ରାସ୍ତାରେ ଅଟକାଇ ଆକ୍ରମଣ କରାଯାଇଥିଲା।ତାଙ୍କୁ ଛଡ଼ାଇବାକୁ ଯାଇଥିବା ଭଉଣୀ ସାରସାଙ୍କୁ ସେମାନେ ଘେରିଯାଇ ବେକ ଓ କାନରୁ ସୁନା ଅଳଙ୍କାର ଛଡାଇ ନେବା ସହ ଦଣ୍ଡ ଧରିଥିବା ଖଣ୍ଡାରେ ତାଙ୍କ ମୁଣ୍ଡକୁ ଚୋଟ ପକାଇଥିଲେ। ପରେ ନାରାୟଣ, ସ୍ତ୍ରୀ କାବେରୀ, ଶାଳକ ଦେବେନ୍ଦ୍ର, ଭଉଣୀ ସାରସା, ଦଣ୍ଡ ଏବଂ ତାଙ୍କ ସ୍ତ୍ରୀ ଲଳିତା ଙ୍କୁ ସଂଘବଦ୍ଧ ଆକ୍ରମଣ କରି ହତ୍ୟା ଉଦ୍ୟମ କରିଥିଲେ ବୋଲି ତଦନ୍ତକାରୀ ଅଧିକାରୀ କହିଛନ୍ତି।
