ନୂଆଦିଲ୍ଲୀ,୨୨।୧: ବ୍ଲୁ ଟିକ୍ ଦେବା ପାଇଁ ମାଇକ୍ରୋବ୍ଲଗିଂ ସାଇଟ୍ ଟୁଇଟର ଭେରିଫିକେଶନ ପ୍ରକ୍ରିୟା ଆରମ୍ଭ କରିଛି। ୨୦୧୭ରେ ଏହି ସେବାକୁ କମ୍ପାନୀ ପକ୍ଷରୁ ବନ୍ଦ କରିଦିଆଯାଇଥିଲା। ହେଲେ ଏବେ ପୁନର୍ବାର ଏହା କରାଯାଇପାରିବ। ଟୁଇଟର କହିଛି, କମ୍ପାନୀ କେବଳ ବର୍ତ୍ତମାନ ସମୟରେ ଆକ୍ଟିଭ୍ ଥିବା ଏବଂ ସମାଜରେ ପରିଚୟ ସୃଷ୍ଟି କରିଥିବା ଆକାଉଣ୍ଟଧାରୀଙ୍କୁ ଏହି ସୁଯୋଗ ଦେବ। ସେମାନେ ଯେପରି ଅଧିକରୁ ଅଧିକ ଲୋକଙ୍କୁ ପ୍ରଭାବିତ କରିପାରୁଥିବେ।
ପ୍ରାରମ୍ଭିକ ପର୍ଯ୍ୟାୟରେ ଟୁଇଟର ଛଅ ପ୍ରକାର ଆକାଉଣ୍ଟ ଭେରିଫିକେଶନ କରିବ। ସେଥିରେ ସରକାରୀ ବିଭାଗ, ବ୍ରାଣ୍ଡ, ନନ୍ ପ୍ରଫିଟ୍ ଅର୍ଗାନାଇଜେଶନ୍, ନ୍ୟୁଜ୍, ମନୋରଞ୍ଜନ, ଖେଳଜଗତର ସେଲିବ୍ରିଟି, ଅର୍ଗାନାଇଜର ସାମିଲ ରହିବେ। ନିର୍ଦ୍ଧାରିତ ସୀମାଠାରୁ ଅଧିକ ଫଲୋଅର୍ ଥିବା ଆକାଉଣ୍ଟକୁ ମଧ୍ୟ ଭେରିଫାଏ କରାଯିବ ବୋଲି କମ୍ପାନୀ କହିଛି।
କିଛି ଚର୍ଚ୍ଚିତ ଚେହେରା ଦୁନିଆରୁ ବିଦାୟ ନେଇଥିଲେ ହେଁ ତାଙ୍କ ଆକାଉଣ୍ଟ ପୂର୍ବଭଳି ରହିଛି। ଏଣୁ ସେଗୁଡିକରୁ ବ୍ଲୁ ଟିକ୍ ହଟାଯାଇପାରେ ବୋଲି କୁହଯାଉଛି। ଏହାଛଡ଼ା କମ୍ପାନୀ ନିୟମ ଉଲ୍ଲଂଘନ କରୁଥିବା କିଛି ବ୍ୟବହାରକାରୀଙ୍କ ଆକାଉଣ୍ଟରୁ ବ୍ଲୁ ଟିକ୍ ମଧ୍ୟ ହଟାଇପାରେ।
